ءماسليحات دەپۋتاتتارىنىڭ سايلاۋى قارساڭىندا ەلىمىزدىڭ بارلىق وڭىرىندەگى سايلاۋ كوميسسيالارىنىڭ مۇشەلەرى ارنايى وقىتۋ سەمينارلارىنان وتەدى. بۇل ۇدەرىستى ۇيىمداستىرۋدىڭ ەرەكشەلىكتەرى تۋرالى بۇگىن ورتالىق سايلاۋ كوميسسياسىنىڭ وتىرىسىندا وسك حاتشىسى شاۆحات وتەمىسوۆ باياندادى.

«بارلىق دەڭگەيدەگى ءماسليحات دەپۋتاتتارىنىڭ سايلاۋىن ساپالى ۇيىمداستىرۋ جانە وتكىزۋ سايلاۋ كوميسسيالارى مۇشەلەرى مەن سايلاۋ پروتسەسىنە باسقا دا قاتىسۋشىلاردىڭ ءوز وكىلەتتىكتەرىن ءتيىمدى ورىنداۋىنا جانە زاڭنامادا بەلگىلەنگەن سايلاۋ راسىمدەرىن قاتاڭ ساقتاۋىنا بايلانىستى. بۇل ءۇشىن سايلاۋ زاڭناماسىن جەتىك ءبىلۋ قاجەت. وسىعان بايلانىستى قىسقا مەرزىم ىشىندە 86 مىڭنان استام سايلاۋ كوميسسياسىنىڭ مۇشەسىن، ونىڭ ىشىندە 1 729 اۋماقتىق سايلاۋ كوميسسياسىنىڭ مۇشەسىن، 15 مىڭنان استام وكرۋگتىك سايلاۋ كوميسسياسىنىڭ مۇشەسىن جانە 70 مىڭعا جۋىق ۋچاسكەلىك سايلاۋ كوميسسياسىنىڭ مۇشەسىن دايارلاۋدى قامتاماسىز ەتۋىمىز كەرەك. مۇنداي اۋقىمدى جۇمىس سايلاۋ كوميسسيالارىنىڭ ءار دەڭگەيىندە زاڭناما، راسىمدەر مەن ءىس-قيمىل الگوريتمدەرىن بىرىڭعاي ءتۇسىنۋدى قامتاماسىز ەتەتىن، جۇيەلى ءارى كەزەڭ-كەزەڭىمەن جۇزەگە اسىرىلاتىن وقىتۋ جۇيەسىن تالاپ ەتەدى»، - دەپ حابارلادى شاۆحات وتەمىسوۆ.

وسك حاتشىسىنىڭ ايتۋىنشا، وقىتۋ پروتسەسى سايلاۋ كوميسسيالارىنىڭ ءبىر دەڭگەيىنەن ەكىنشىسىنە ءبىلىم مەن ادىستەمەلىك تاسىلدەردى كەزەڭ-كەزەڭىمەن جەتكىزۋ قاعيداتى بويىنشا ۇيىمداستىرىلادى. بۇل ءتاسىل سايلاۋ زاڭناماسىن بىرىڭعاي ءتۇسىنۋدى جانە بارلىق دەڭگەيدەگى كوميسسيالاردىڭ ءوزارا ۇيلەسىمدى جۇمىس ىستەۋىن قامتاماسىز ەتۋگە مۇمكىندىك بەرەدى.

سونىمەن قاتار ورتالىق دەڭگەيدە تۇراقتى ونلاين كەڭەستەر مەن جينالىستار وتكىزىلىپ تۇرادى. ونىڭ اياسىندا اۋماقتىق سايلاۋ كوميسسيالارىنىڭ باسشىلارى مەن جاۋاپتى مۇشەلەرىنە جەكەلەگەن سايلاۋ راسىمدەرىن قولدانۋ ەرەكشەلىكتەرى جانە سايلاۋ ناۋقانى بارىسىندا تۋىندايتىن پراكتيكالىق ماسەلەلەر بويىنشا ءتۇسىندىرۋ جۇمىستارى جۇرگىزىلەدى.

Abai.kz