ولجاس بەكتەنوۆ پرەزيدەنت اتىنان XXV جازعى سۋردليمپيادا ويىندارىنىڭ جۇلدەگەرلەرى مەن جاتتىقتىرۋشىلارىنا مەملەكەتتىك ناگرادالار تابىس ەتتى.

مەملەكەت باسشىسى قاسىم-جومارت توقاەۆتىڭ تاپسىرماسى بويىنشا پرەمەر-مينيستر ولجاس بەكتەنوۆ بيىل 15-26 قاراشا ارالىعىندا توكيو قالاسىندا (جاپونيا) وتكەن XXV جازعى سۋردليمپيادا ويىندارىنا قاتىسۋشى قازاقستاندىق سپورتشىلارعا مەملەكەتتىك ناگرادالار تابىس ەتتى.

پرەمەر-مينيستر ولجاس بەكتەنوۆ سپورتشىلاردى قولداۋ ۇكىمەت جۇمىسىنىڭ باسىم باعىتتارىنىڭ ءبىرى ەكەنىن اتاپ ءوتىپ، ۇلتتىق قۇراماعا، ونىڭ ماماندارى مەن باپكەرلەر قۇرامىنا جەڭىسكە جەتۋ جولىندا تاباندىلىق پەن ەرىك-جىگەردىڭ ۇلگىسىن كورسەتكەن ۇيلەسىمدى جانە ناتيجەلى جۇمىستارى ءۇشىن العىسىن ءبىلدىردى.

2025 جىلعى سۋردليمپيادا ويىندارىنا 81 مەملەكەتتەن 3 مىڭعا جۋىق سپورتشى قاتىستى. قازاقستاندىق سپورتشىلار سەگىز سپورت تۇرىنەن ەل نامىسىن قورعاپ، 8 التىن، 4 كۇمىس جانە 13 قولا – بارلىعى 25 مەدال جەڭىپ الدى. ناتيجەسىندە قر ۇلتتىق قۇراماسى جالپى كوماندالىق ەسەپتە 9-شى ورىندى يەلەندى.

«مەملەكەت باسشىسى قاسىم-جومارت توقاەۆ حالىققا جولداۋىندا بۇقارالىق سپورتتى دامىتۋعا، ەرەكشە قاجەتتىلىكتەرى بار ازاماتتار ءۇشىن سپورت عيماراتتارىن سالۋعا باسا نازار اۋدارۋ قاجەتتىگىن اتاپ ءوتتى. سۋردليمپيادا ويىندارى ءبىزدىڭ ەلىمىزدەگى سۋردليمپيادا قوزعالىسىنىڭ تۇراقتى دامىپ كەلە جاتقانىن ايعاقتايدى. بۇل سپورتتىق ۇيىمداردىڭ، جاتتىقتىرۋشىلاردىڭ سونداي-اق، ءوز ەڭبەگىمەن بولاشاق جەڭىستەرگە بەرىك نەگىز قالايتىن سپورتشىلاردىڭ ۇيلەسىمدى جانە تىنىمسىز جۇمىسىنىڭ ناتيجەسى. پرەزيدەنتتىڭ تاپسىرمالارىن جۇزەگە اسىرۋ شەڭبەرىندە ۇكىمەت كاسىبي جانە بۇقارالىق سپورتتى دامىتۋ، سپورتشىلاردى قولداۋ بويىنشا جۇمىستار جۇرگىزۋدە، جاڭا ينفراقۇرىلىم نىساندارى سالىنۋدا. جۇيەلى جانە ۋاقتىلى شارالار جالپى جەتىستىكتى ارتتىرۋعا جانە بۇكىل سپورت سالاسىن ودان ءارى دامىتۋعا مۇمكىندىك بەرەدى»، - دەپ اتاپ ءوتتى ولجاس بەكتەنوۆ.

ماراپاتتاۋ بارىسىندا سۋردو دزيۋدو سپورتشىلارىنىڭ جەتىستىكتەرى اتاپ ءوتىلدى. ولاردىڭ جوعارى دەڭگەيدە ونەر كورسەتۋى قازاقستانعا 11 مەدال (5 التىن، 2 كۇمىس جانە 4 قولا) الىپ كەلدى جانە سۋردليمپيادا ويىندارىنىڭ جارقىن جەتىستىكتەرىنىڭ ءبىرى بولدى. كوماندا كوشباسشىلارىنىڭ قاتارىندا ءۇش دۇركىن جانە ەكى دۇركىن چەمپيون اتانعان ەركەبۇلان قانافين مەن شاديار قۋاندىق بار.

ال بيىكتىككە سەكىرۋدەن ۇلتتىق قۇراما قورجىنىنا التىن مەدال سالعان جەڭىل اتلەتشى فاينا مەيرمانوۆا 1,79 مەتردى باعىندىرىپ، ويىنىڭ رەكوردىن ورناتتى.

ەركىن جانە گرەك-ريم كۇرەسىندە چەمپيون اتانعان بالۋاندار اندرەي سامارين مەن شاديار پەرنەش تە جالپى ناتيجەگە ايتارلىقتاي ۇلەس قوستى.

ۇستەل تەننيسىندە قانات كونكۋباەۆ، دانيار ەسكەندىروۆ، بيجان تولەباەۆ جانە ابىلاي بۇركىتباي قولا جۇلدەگە يە بولدى.

تاەكۆوندودا ايان ابدراش، ايجامول ابديكاتوۆا جانە ايدا ماكاتوۆا قولا جۇلدەگەر اتاندى.

پرەمەر-مينيستر قول جەتكىزىلگەن بارلىق ناتيجەلەر قازاقستاندىق سپورتشىلاردى دايارلاۋدىڭ جوعارى دەڭگەيى جانە ولاردىڭ اسا ماڭىزدى سپورتتىق سىن-قاتەرلەرمەن ويداعىداي كۇرەسۋگە قابىلەتتىلىگىن كورسەتەتىنىن اتاپ ءوتتى.

Abai.kz