الماتىدا «سيريۋس» ءبىلىم بەرۋ ورتالىعىمەن ىنتىماقتاستىق اياسىندا I تالانتتار ءسامميتى ءوتتى. سامميت بارىسىندا «سيريۋس» مەكتەبى مەن ءبىلىم بەرۋ ورتالىعىنىڭ ىرگەتاسىن قالاۋ ءراسىمى ءوتتى. 

ءىس-شاراعا قازاقستان رەسپۋبليكاسى پرەمەر-ءمينيسترىنىڭ ورىنباسارى - مادەنيەت جانە اقپارات ءمينيسترى ايدا بالاەۆا، قر وقۋ-اعارتۋ ءمينيسترى جۇلدىز سۇلەيمەنوۆا، الماتى قالاسىنىڭ اكىمى دارحان ساتىبالدى، «سيريۋس» فەدەرالدىق اۋماعى كەڭەسىنىڭ توراعاسى جانە «تالانت ي ۋسپەح» قورىنىڭ جەتەكشىسى ەلەنا شمەلەۆا، عىلىمي جانە پەداگوگيكالىق قاۋىمداستىق وكىلدەرى قاتىستى.

«سيريۋس» مەكتەبىندە ماتەماتيكا، فيزيكا، حيميا جانە بيولوگيا پاندەرى بويىنشا كىرىكتىرىلگەن باعدارلامالار، سونداي-اق جاساندى ينتەللەكت، عارىش، ينجەنەريا جانە ءومىر تۋرالى عىلىمدار باعىتىنداعى پانارالىق كۋرستار مەملەكەتتىك جانە ورىس تىلدەرىندە قازاقستان رەسپۋبليكاسىنىڭ مەملەكەتتىك ءبىلىم بەرۋ ستاندارتىنا سايكەس جۇزەگە اسىرىلادى.

قازاقستاندىق وقۋشىلار «سيريۋس» ورتالىعىنىڭ باعدارلامالارىنا قازىردىڭ وزىندە قاتىسۋدا. 2024-2025 جىلدار ارالىعىندا بالالار «ۇلكەن پەرسپەكتيۆالار» عىلىمي-تەحنولوگيالىق بايقاۋىنىڭ جوبالىق كوماندالارىندا جۇمىس ىستەدى. سونىمەن قاتار قازاقستان قۇراماسى جاسوسپىرىمدەر اراسىنداعى IJSO-2025 حالىقارالىق جاراتىلىستانۋ وليمپياداسىندا 6 مەدال جەڭىپ الدى.

سامميتكە دارىندى وقۋشىلار مەن جاراتىلىستانۋ-ماتەماتيكالىق باعىتتاعى پەداگوگتەر قاتىستى. سامميت اياسىندا مەكتەپ پەن ورتالىق جوباسىنىڭ تانىستىرىلىمى، «سيريۋس» ماماندارىنىڭ دارىستەرى مەن شەبەرلىك ساباقتارى، «ۇلكەن پەرسپەكتيۆالار» بايقاۋى جوبالارىنىڭ كورمەسى، سونداي-اق مۇعالىمدەرگە ارنالعان كۋرس ءوتتى.

سامميت باعدارلاماسى اياسىندا وقۋشىلارعا ارنالعان عىلىمي-كوپشىلىك دارىستەر، «سيريۋس» جەتەكشى ساراپشىلارىنىڭ شەبەرلىك ساباقتارى، ماتەماتيكا جانە جاراتىلىستانۋ پاندەرى پەداگوگتەرىنە ارنالعان بىلىكتىلىكتى ارتتىرۋ باعدارلاماسى دا وتكىزىلدى. وقۋشىلار گەنەتيكالىق جانە اقپاراتتىق تەحنولوگيالاردىڭ دامۋىمەن تانىسىپ، كۆادروكوپتەر نەمەسە روبوت قۇراستىرىپ، باعدارلامالاپ كوردى، ميدىڭ جۇمىس ىستەۋ ەرەكشەلىكتەرىن زەردەلەپ، «سيريۋس» ءبىلىم بەرۋ ورتالىعىنىڭ اكادەميالىق جانە يندۋستريالىق سەرىكتەستەرىنەن ۇسىنىلعان جوبالىق تاپسىرمالارمەن جۇمىس ىستەدى.

«بۇگىن عيماراتتىڭ العاشقى كىرپىشى قالاندى. بۇل جاي عانا سيمۆولدىق قادام ەمەس، بۇل مەكتەپتىڭ قالاي قۇرىلاتىنىن ايقىندايتىن پراكتيكالىق جۇمىستىڭ باستالۋى. ول ءبىلىم بەرۋ باعدارلامالارىن قالىپتاستىرۋدان باستاپ وقۋ پروتسەسىن ۇيىمداستىرۋعا دەيىنگى بارلىق كەزەڭدى قامتيدى. جوبا جاراتىلىستانۋ عىلىمدارى مەن زاماناۋي تەحنولوگيالار سالاسىنا  كىرىكتىرىلگەن باعىتتارعا نەگىزدەلىپ، قازاقستان رەسپۋبليكاسىنىڭ مەملەكەتتىك ءبىلىم بەرۋ ستاندارتتارىنا سايكەس جۇزەگە اسىرىلادى»، - دەپ اتاپ ءوتتى ايدا بالاەۆا.

«بۇگىن ءبىز مەملەكەتتەرىمىزدىڭ باسشىلارى قويعان ستراتەگيالىق مىندەتتى شەشىپ وتىرمىز. ۇزدىك پەداگوگتەرمەن، عالىمدارمەن جانە تەحنولوگيالىق كومپانيالاردىڭ وكىلدەرىمەن بىرلەسە وتىرىپ، قازاقستان وقۋشىلارىنىڭ تالانتىن دامىتۋعا بارلىق جاعداي جاسالعان زياتكەرلىك، مازمۇندى جانە قاۋىپسىز ورتا قالىپتاستىرىپ جاتىرمىز. قازىرگى بالالار كەيدە تاجىريبەلى مامانداردىڭ ءوزى قينالاتىن ماسەلەلەردى شەشۋگە دايىن. سوندىقتان «سيريۋس» جوبالىق قىزمەتتى دامىتۋعا ەرەكشە ءمان بەرەدى. ءبىزدىڭ فلاگماندىق جوبامىز سانالاتىن “ۇلكەن پەرسپەكتيۆالار” بايقاۋى وسىنىڭ ايقىن دالەلدەيدى. بيىل بايقاۋ 11-رەت وتكىزىلىپ، حالىقارالىق مارتەبە الدى»، - دەدى ەلەنا شمەلەۆا.

سونىمەن قاتار، قر وقۋ-اعارتۋ مينيسترلىگى قر عىلىم جانە جوعارعى ءبىلىم مينيسترلىگىمەن بىرلەسىپ اباي اتىنداعى قازاق ۇلتتىق پەداگوگيكالىق ۋنيۆەرسيتەتى مەن قازاق ۇلتتىق قىزدار پەداگوگيكالىق ۋنيۆەرسيتەتىنىڭ بازاسىندا «سيريۋس» ۋنيۆەرسيتەتىنىڭ «عىلىمي-تەحنولوگيالىق ءبىلىم بەرۋ كوشباسشىلارى» اتتى ەكى جىلدىق ماگيسترلىك باعدارلاماسىن ىسكە قوسادى. باعدارلاما دارىندى بالالارمەن جۇمىس ىستەۋگە، جاراتىلىستانۋ جانە تەحنيكالىق باعىتتار بويىنشا، سونىڭ ىشىندە پەداگوگيكادا جاساندى ينتەللەكتىنى قولدانۋ سالاسىندا ماماندار دايارلاۋعا باعىتتالعان.

Abai.kz