بۇل تۋرالى ء"ادىل ءسوز" ءسوز بوستاندىعىن قورعاۋ قورىنىڭ باسشىسى قارلىعاش جامانقۇلوۆا باستاما كوتەرگەن. 

ول قازاقستانداعى جۋرناليستەرگە قاتىستى قىلمىستىق جاۋاپكەرشىلىكتى جەڭىلدەتۋ، ياعني كەيبىر قۇقىقبۇزۋشىلىقتى اكىمشىلىك جاۋاپكەرشىلىك ساناتىنا كوشىرۋدى ۇسىنعان.

ۇلتتىق قۇرىلتايدا ءسوز سويلەگەن ول اقپاراتتىق كەڭىستىكتەگى بايلانىستى نىعايتىپ، بۇقارالىق اقپارات قۇرالدارىن قولداۋ قاجەتتىگىن اتاپ ءوتتى.

– ساپالى ءارى شىنايى اقپاراتقا دەگەن سۇرانىس ازايعان جوق. وتاندىق بۇقارالىق اقپارات قۇرالدارى بىرقاتار قيىندىققا قاراماستان، ءوز جۇمىسىن جالعاستىرىپ كەلەدى. وسىعان بايلانىستى، قۇرمەتتى پرەزيدەنت مىرزا، سىزدەن باق-تى قولداۋىڭىزدى سۇرايمىز. ءسىز جۋرناليستەردىڭ قاۋىپسىزدىگى ماسەلەسىن كوتەردىڭىز. وسى تۇرعىدا كەيبىر قۇقىقبۇزۋشىلىقتى اكىمشىلىك جاۋاپكەرشىلىككە اۋىستىرۋدى ۇسىنامىز. بۇل جۋرناليستەردىڭ كاسىبي قىزمەتىن ءتيىمدى قورعاۋعا مۇمكىندىك بەرەدى. كاسىبي قاۋىمداستىق اقپاراتتىق بوپسالاۋ مەن قىسىم كورسەتۋ تاجىريبەسىن قاتاڭ ايىپتايدى. وسىعان وراي، جوعارعى سوتتىڭ باق-قا قاتىستى ىستەر بويىنشا سوت تاجىريبەسىنىڭ اشىقتىعى مەن بىرىزدىلىگىن قامتاماسىز ەتۋگە باعىتتالعان نورماتيۆتىك قاۋلى ازىرلەۋ تۋرالى شەشىمىن قولدايمىز، – دەدى جامانقۇلوۆا ۇلتتىق قۇرىلتايدا سويلەگەن سوزىندە.

ونىڭ سوزىنشە، وڭىرلىك باسىلىمداردى دامىتۋ ارقىلى ەل ىشىندە ءوزىمىزدىڭ اقپاراتتىق نارراتيۆتەرىمىزدى قالىپتاستىرۋعا مۇمكىندىك تۋادى. بۇل سىرتقى ىقپال كۇشەيىپ وتىرعان كەزەڭدە اسا ماڭىزدى.

– سىرتقى ىقپال كۇن سايىن ارتىپ كەلەدى. سوندىقتان بولىپ جاتقان وقيعالاردىڭ مازمۇنىن ءوزىمىز ايقىنداپ، ونى ءتۇسىندىرۋدىڭ لوگيكاسىن دا ءوزىمىز قۇرۋىمىز كەرەك. ول ءۇشىن مەدياساۋاتتىلىقتى جۇيەلى تۇردە كۇشەيتۋ قاجەت. مەدياساۋاتتىلىق قوعامدى سىرتقى مانيپۋلياتسيالاردان قورعايدى. مەدياساۋاتتى ازاماتتار جالعان اقپاراتتى اجىراتا الادى، – دەدى ء"ادىل ءسوز" ءسوز بوستاندىعىن قورعاۋ قورىنىڭ باسشىسى.

Abai.kz