قازاقستان رەسپۋبليكاسىنىڭ ۇلتتىق وليمپيادالىق كوميتەتى جاساندى ينتەللەكتىنى دامىتۋ جونىندە QazAI قاۋىمداستىعىمەن رەسمي كەزدەسۋ وتكىزدى.

كەزدەسۋگە قر ۇوك باس حاتشىسى ءالىمجان اقاەۆ، قر ۇوك باس ديرەكتورى نۇرلان نوگەربەك، QazAI قاۋىمداستىعىنىڭ توراعاسى تەمىرلان زياتوۆ جانە توراعا ورىنباسارى انار تولەۋباەۆا قاتىستى.

جيىن بارىسىندا سپورت سالاسىنا زاماناۋي تسيفرلىق تەحنولوگيالار مەن جاساندى ينتەللەكتكە نەگىزدەلگەن شەشىمدەردى ەنگىزۋ ماسەلەلەرى كەڭىنەن تالقىلاندى. اتالعان باعىتتاردى دامىتۋ مەملەكەت دەڭگەيىندەگى باسىمدىقتارعا تولىق سايكەس كەلەدى.

ايتا كەتەيىك، قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىمەن 2026 جىل ەلىمىزدە تسيفرلاندىرۋ جانە جاساندى ينتەللەكت جىلى بولىپ جاريالانعان. ىنتىماقتاستىقتىڭ العاشقى پراكتيكالىق قادامدارىنىڭ ءبىرى رەتىندە QazAI ساراپشىلارى حالىقارالىق وليمپيادالىق كوميتەتتىڭ Olympic Solidarity باعدارلاماسى اياسىندا جۇزەگە اسىرىلاتىن سپورت مەنەدجەرلەرىنە ارنالعان ءبىلىم بەرۋ باعدارلامالارىنا قاتىسادى.

اتاپ ايتقاندا، 22–23 قاڭتار ارالىعىندا نازارباەۆ ۋنيۆەرسيتەتىنىڭ مەديتسينا مەكتەبىندە سپورتتاعى جاساندى ينتەللەكتىنى قولدانۋ جانە تسيفرلىق ترانسفورماتسيا تاقىرىبىنا ارنالعان ءدارىس وتكىزۋ جوسپارلانعان.

سونىمەن قاتار تاراپتار قر ۇوك قىزمەتىن حالىقارالىق وليمپيادالىق كوميتەتتىڭ جاساندى ينتەللەكت سالاسىنداعى جاھاندىق كۇن تارتىبىمەن ۇيلەستىرۋگە ەرەكشە نازار اۋداردى. حوك وليمپيادالىق قوزعالىستىڭ نەگىزگى ۇدەرىستەرىنە جاساندى ينتەللەكتىنى جۇيەلى تۇردە ەنگىزىپ كەلەدى. بۇل باعىتتارعا سپورتتىق دەرەكتەردى تالداۋ، باسقارۋشىلىق شەشىمدەردى قولداۋ، تسيفرلىق سەرۆيستەردى دامىتۋ، سپورتشىلاردىڭ اقپاراتتىق قاۋىپسىزدىگىن قامتاماسىز ەتۋ، سونداي-اق Olympic AI Agenda جاھاندىق ستراتەگياسى مەن Trustworthy AI Framework ستاندارتتارى اياسىندا تەحنولوگيالاردى ەتيكالىق ءارى جاۋاپتى پايدالانۋ قاعيداتتارىن قالىپتاستىرۋ كىرەدى.

كەزدەسۋ بارىسىندا سپورتتىق ۇيىمداردىڭ قىزمەتىن تسيفرلاندىرۋعا باعىتتالعان ىشكى ءىى-ەكوجۇيە تۇجىرىمداماسى تانىستىرىلدى. تاراپتار ينتەللەكتۋالدى مەديا-مۇراعات پەن مەرزىمدەردى اۆتوماتتى باقىلاۋ جۇيەلەرى سەكىلدى قۇرالداردى ازىرلەۋ ماسەلەلەرىن قاراستىردى. تالقىلاۋ بارىسىندا سپورتشىلاردىڭ كاسىبي كورسەتكىشتەرى مەن دامۋ ۇدەرىسىن ناقتى ۋاقىت رەجيمىندە باقىلاۋعا، سونداي-اق ولاردىڭ مانساپتاعى ءاربىر كەزەڭىندە جان-جاقتى تالداۋ جۇرگىزۋگە جول اشاتىن ارنايى باعدارلامالىق ونىمدەر مەن "بىرىڭعاي تسيفرلىق پروفيل" قۇرۋ ماسەلەسى نەگىزگى باسىمدىق رەتىندە اتالدى.

"بۇگىندە حالىقارالىق وليمپيادالىق كوميتەت جاساندى ينتەللەكتىنى باسقارۋ تيىمدىلىگىن ارتتىرۋ مەن سپورتشىلاردى قولداۋدىڭ ماڭىزدى قۇرالدارىنىڭ ءبىرى رەتىندە قاراستىرىپ وتىر. ءبىز ءۇشىن باستامالارىمىزدى حوك تاسىلدەرىمەن ۇيلەستىرىپ، سپورتشىلار مەن سپورت ۇيىمدارىنىڭ مۇددەسىنە قىزمەت ەتەتىن تسيفرلىق جۇيە قالىپتاستىرۋ اسا ماڭىزدى", - دەدى ءالىمجان اقاەۆ.

كەزدەسۋ سوڭىندا تاراپتار تسيفرلىق باستامالاردى بىرلەسە دامىتۋعا ءوزارا كەلىسىپ، ورتاق جوبالاردى جۇزەگە اسىرۋدىڭ الداعى قادامدارىن ايقىندادى.

Abai.kz