قازاقستاندا ەلدى مەكەندەر ءۇشىن ارنايى قۇقىقتىق رەجيمدەردى كونستيتۋتسيالىق تۇرعىدان بەكىتۋ ۇسىنىلدى
قازاقستان كونستيتۋتسياسى ءاربىر ازاماتقا تۇسىنىكتى بولۋعا، ال جەكەلەگەن اۋماقتارعا ارنايى مارتەبە بەرۋ مۇمكىندىگى – ناقتى كونستيتۋتسيالىق نەگىزگە يە بولۋعا ءتيىس. مۇنداي پىكىردى كونستيتۋتسيالىق كوميسسيانىڭ ءبىرىنشى وتىرىسىندا قر ادىلەت ءمينيسترى ەرلان سارسەمباەۆ ايتتى.
ادىلەت ءمينيسترى نەگىزگى زاڭ تەك زاڭ اكتىسى عانا ەمەس، سونىمەن بىرگە قوعامدىق كەلىسىم قۇجاتى بولىپ تابىلاتىنىن، سوندىقتان ونىڭ ءتىلى نورمالاردى تىكەلەي جانە بىرجاقتى قابىلداۋدى قامتاماسىز ەتۋى ءتيىس ەكەنىن اتاپ ءوتتى.
ونىڭ ايتۋىنشا، كۇردەلى جانە اسا قۇرمالاس تۇجىرىمدار ازاماتتاردىڭ قۇقىقتارى مەن مىندەتتەرىن ءتۇسىنۋدى قيىنداتادى، سونداي-اق كونستيتۋتسيانىڭ ۇستەمدىك ءپرينتسيپىن السىرەتەدى.
«كونستيتۋتسيانىڭ ءماتىنى مازمۇننىڭ قۇقىقتىق دالدىگى مەن تەرەڭدىگىنە نۇقسان كەلتىرمەستەن قول جەتىمدى جانە تۇسىنىكتى تۇردە تۇجىرىمدالۋى كەرەك. كونستيتۋتسيالىق ەرەجەلەر تۇسىنىكتى، قيسىندى جانە ستيليستيكالىق تۇرعىدان دۇرىس بولۋى ءتيىس»، – دەپ اتاپ ءوتتى ەرلان سارسەمباەۆ.
سونىمەن قاتار، مينيستر كونستيتۋتسيادا جەكەلەگەن اۋماقتار ءۇشىن ارنايى قۇقىقتىق رەجيمدەردى ەنگىزۋ مۇمكىندىگىن بەكىتۋدى ۇسىندى.
ول پرەزيدەنتتىڭ جارلىعىمەن الاتاۋ قالاسىنا وزىڭقى دامۋشى قالا مارتەبەسى بەرىلگەنىن، ال بولاشاقتا بۇل مارتەبەنى جەكەلەگەن كونستيتۋتسيالىق زاڭمەن رەسىمدەۋ بولجانىپ وتىرعانىن ەسكە سالدى. ونىڭ پىكىرىنشە، مۇنداي ءتاسىل وسى تەتىكتى ينستيتۋتسيوناليزاتسيالاۋعا، قۇقىقتىق بولجامدىلىقتى قامتاماسىز ەتۋگە جانە قۇقىقتىق كەڭىستىكتىڭ بىرلىگىن ساقتاۋعا مۇمكىندىك بەرەدى.
«اۋماقتىڭ ەرەكشە مارتەبەسى ءوزىنىڭ قۇقىقتىق تابيعاتى بويىنشا قۇقىقتىق رەتتەۋدىڭ جالپى رەجيمىنەن ەرەكشەلىك بولىپ تابىلادى. مۇنداي ەرەكشەلىكتەرگە ولاردىڭ تىكەلەي كونستيتۋتسيالىق نەگىزى، ناقتى زاڭنامالىق رەسىمدەلۋى جانە قۇقىقتىق مەملەكەت قاعيداتتارىن قاتاڭ ساقتاۋ شارتىمەن عانا جول بەرىلەدى»، – دەپ اتاپ ءوتتى مينيستر.
سوڭىندا ول ارنايى رەجيمدەردى كونستيتۋتسيالىق بەكىتۋ ينۆەستيتسيالار تارتۋ جانە ينفراقۇرىلىمدى دامىتۋ ءۇشىن تۇراقتى جانە اشىق قۇقىقتىق بازا قۇراتىنىن ايتتى. بۇل رەتتە كەز كەلگەن شەشىمدەر ماقساتتارى مەن مەرزىمدەرى بويىنشا شەكتەلۋگە، ازاماتتار ءۇشىن الەۋمەتتىك جانە قۇقىقتىق كەپىلدىكتەر دەڭگەيىن تومەندەتپەۋگە ءتيىس.
Abai.kz
