استانادا ءوتىپ جاتقان كونستيتۋتسيالىق رەفورما جونىندەگى كوميسسيانىڭ العاشقى وتىرىسىندا قولدانبالى ەكونوميكالىق زەرتتەۋلەر ورتالىعىنىڭ عىلىمي جەتەكشىسى جاقسىبەك كۇلەكەەۆ ەلىمىزدەگى عىلىمي قىزمەتتىڭ اتا زاڭ دەڭگەيىندە ناقتى رەتتەلمەگەنىن، سونىڭ سالدارىنان ەل دامۋىن قامتاماسىز ەتۋدەگى عىلىمنىڭ ءرولى مەن مارتەبەسى تومەن ەكەنىن مالىمدەدى.

ونىڭ ايتۋىنشا، ەلىمىزدىڭ قازىرگى دامۋ كەزەڭىندەگى باستى باسىمدىقتىڭ ءبىرى – زاماناۋي تسيفرلىق تەحنولوگيالار مەن جاساندى ينتەللەكتىنى كەڭىنەن قولدانۋعا نەگىزدەلگەن ءبىلىم مەن يننوۆاتسياعا سۇيەنگەن ەكونوميكانى قالىپتاستىرۋ. بۇل باعىت ەلىمىزدىڭ باسەكەگە قابىلەتتىلىگىن ارتتىرىپ قانا قويماي، ونىڭ گەوەكونوميكالىق جانە گەوساياسي كەڭىستىكتەگى ۇستانىمىن ايقىنداي تۇسەدى.

«الەمدە عىلىم كەز كەلگەن قوعامنىڭ ەڭ ماڭىزدى وندىرگىش كۇشىنە اينالىپ وتىر. بۇل تۇرعىدا ءبىلىم ەكونوميكاسىن دامىتۋ عىلىممەن تىكەلەي بايلانىستى ەكەنىن اڭعارماۋ مۇمكىن ەمەس. الايدا ەلىمىزدەگى عىلىمي قىزمەت سالالىق زاڭنامالارمەن عانا رەتتەلىپ، ونىڭ نەگىزگى قاعيداتتارى كونستيتۋتسيا دەڭگەيىندە ناقتى بەكىتىلمەگەن. اتا زاڭدا عىلىمعا قاتىستى ارنايى نورمالاردىڭ بولماۋى عىلىمي سالانى اعىمداعى مەملەكەتتىك ساياساتقا تاۋەلدى ەتىپ، ەلدىڭ تۇراقتى دامۋىن قامتاماسىز ەتۋدەگى ءرولى مەن مارتەبەسىن السىرەتىپ وتىر» دەدى ول.

جاقسىبەك كۇلەكەەۆ عىلىم مەن يننوۆاتسيانىڭ كونستيتۋتسيالىق دەڭگەيدە بەكىتىلۋى عىلىمي قىزمەتتى تۇراقتى قارجىلاندىرۋعا بەرىك قۇقىقتىق نەگىز قالىپتاستىرىپ، زەرتتەۋ ورتالىقتارىنىڭ، ۋنيۆەرسيتەتتەردىڭ جانە تەحنولوگيالىق كومپانيالاردىڭ جۇيەلى ءارى ورنىقتى جۇمىس ىستەۋىنە جول اشاتىنىن ايتتى.

ونىڭ سوزىنشە، مۇنداي نورمالار كوپتەگەن دامىعان مەملەكەتتەردىڭ كونستيتۋتسيالارىندا بار. اتاپ ايتقاندا، عىلىم مەن يننوۆاتسياعا سۇيەنىپ، ەلەۋلى ەكونوميكالىق تابىسقا قول جەتكىزگەن گەرمانيا، جاپونيا، وڭتۇستىك كورەيا سياقتى ەلدەردى مىسالعا كەلتىرۋگە بولادى. سونداي-اق فينليانديا، يسپانيا جانە پورتۋگاليانىڭ ءوز كونستيتۋتسيالارىندا عىلىمي اۆتونوميا مەن اكادەميالىق ەركىندىككە قۇقىقتى ناقتى بەكىتكەنىن تىلگە تيەك ەتكەن مامان ۇلتتىڭ بولاشاعى ازاماتتاردىڭ زياتكەرلىك جانە تەحنولوگيالىق دامۋىنا تىكەلەي بايلانىستى ەكەنىن تەرەڭ تۇسىنۋدەن تۋىندايتىنىن جەتكىزدى.

«ۇلتتىق قاۋىپسىزدىك تۇرعىسىنان العاندا، ءوزىمىزدىڭ عىلىمي جانە تەحنولوگيالىق ازىرلەمەمىزدى دامىتۋ تەحنولوگيالىق تاۋەلسىزدىكتى نىعايتىپ، ەكونوميكانىڭ جانە ونىڭ اسا ماڭىزدى ينفراقۇرىلىمىنىڭ تۇراقتىلىعىن قامتاماسىز ەتەدى. سونىمەن قاتار، كونستيتۋتسيادا عىلىمعا قاتىستى نورمالاردىڭ بولۋى مەملەكەتتىڭ حالىقارالىق بەدەلىن ارتتىرىپ، ونى پروگرەسس پەن يننوۆاتسياعا باعدارلانعان ەل رەتىندە تانىتادى. بۇل عىلىمي-تەحنيكالىق دامۋدىڭ باسىمدىق ەكەنىن ايقىن كورسەتىپ، ينۆەستيتسيا تارتۋعا ىقپال ەتەدى. سونداي-اق الەمدىك قاۋىمداستىقتاعى ابىرويىمىزدى كۇشەيتىپ، الەۋمەتتىك، ەكونوميكالىق جانە تەحنولوگيالىق تۇراقتىلىقتىڭ بەرىك نەگىزىن قالايدى»، – دەدى ول.

Abai.kz