قر كونستيتۋتسيالىق
سوتىنىڭ ءتورايىمى
ە.ءا.ازيموۆاعا!

قۇرمەتتى ەلۆيرا ابىلحاسىمقىزى!

پرەزيدەنت: «پارلامەنتتى تەك قانا پارتيالىق ءتىزىم بويىنشا سايلاعان ءجون دەپ سانايمىن»، - دەدى.

مەن قاسىم-جومارت كەمەلۇلىنىڭ بۇل ۇسىنىسىن قولدايمىن!

ەندى، قۇداي بۇيىرسا، قۇرىلتايدىڭ 145 دەپۋتاتى پارتيالىق ءتىرىم بويىنشا سايلانادى.

بىراق، مىنا ماسەلەگە ءسىزدىڭ نازارىڭىزدى باسا بۇرعىم كەلەدى.

كونستيتۋتسيانىڭ 33-بابىنىڭ 2 تارماعىندا: «رەسپۋبليكا ازاماتتارىنىڭ مەملەكەتتىك ورگاندار مەن جەرگىلىكتى ءوزىن-ءوزى باسقارۋ ورگاندارىن سايلاۋعا جانە ولارعا سايلانۋعا، سونداي-اق رەسپۋبليكالىق رەفەرەندۋمعا قاتىسۋعا قۇقىعى بار»، - دەپ جازىلعان.

بۇل جەردە — 33-باپتا «رەسپۋبليكا پارتيالارىنىڭ» ەمەس، «رەسپۋبليكا ازاماتتارىنىڭ» دەپ كورسەتىلگەن.

سوندىقتان، سايلاۋشىلار ەڭ الدىمەن رەسپۋبليكا پارتيالارىنا ەمەس، رەسپۋبليكا ازاماتتارىن سايلاۋعا قۇقىقتى;

ال، سايلانۋعا ەڭ الدىمەن رەسپۋبليكا پارتيالارى ەمەس، رەسپۋبليكا ازاماتتارى قۇقىقتى.

ەگەر، قۇرىلتاي دەپۋتاتتارىن سايلاۋ وسىعان دەيىنگى «سايلاۋلارداعىداي» جالاڭ پارتيالارعا «داۋىس بەرۋ» تارتىبىمەن سايلانسا، وندا كونستيتۋتسيانىڭ 33-بابىنىڭ 2-تارماعى ءولدى دەگەن ءسوز! جاي ەمەس، ارام ءولدى دەگەن ءسوز!!

قۇرمەتتى ەلۆيرا ابىلحاسىمقىزى!

كونستيتۋتسيالىق سوت كونستيتۋتسيانىڭ ءار بابىن كوزىنىڭ قاراشىعىنداي قورعاۋ كەرەك!

مىنە، كونستيتۋتسيالىق رەفورما جونىندەگى كوميسسيانىڭ ءۇش وتىرىسى ءوتتى، كوز الماي قاراپ وتىرمىز، بۇل ماسەلە تۋرالى ءبىر اۋىز ءسوز ايتىلعان جوق.

ەندەشە، سىزگە سۇراق، قۇرىلتاي دەپۋتاتتارىن پارتيالىق ءتىزىم بويىنشا سايلاۋدا كونستيتۋتسيانىڭ 33-بابىنىڭ 2-تارماعىنىڭ ساقتالۋى قالاي قامتاماسىز ەتىلەدى؟!

وسى ماسەلە بويىنشا ماعان ءوزىڭىزدىڭ ناقتى جاۋاپ بەرۋىڭىزدى سۇرايمىن!

قۇرمەتپەن،

اۋىت مۇقيبەك،

«قۇرمەت» وردەنىنىڭ يەگەرى

Abai.kz