جاڭا كونستيتۋتسيا جوباسىندا پرەزيدەنتتىڭ جەكە باسىنا ارتىقشىلىق بەرەتىن بىردە-ءبىر پۋنكت جوق، ال وليگارحتاردان مەملەكەتكە قايتارىلعان اكتيۆتەر مەكتەپتەرگە، اۋرۋحانالارعا جانە ۇلتتىق ەكونوميكاعا قىزمەت ەتۋدە

قازاقستان رەسپۋبليكاسىنىڭ جاڭا كونستيتۋتسياسىنىڭ جوباسى الدىڭعى بارلىق رەفورمادان ساياسي سپەكۋلياتسيالاردىڭ جانە جەكە تۇلعاعا تابىنۋ ەلەمەنتتەرىنىڭ بولماۋىمەن تۇبەگەيلى ەرەكشەلەنەدى. بۇل تۋرالى ءماجىلىس دەپۋتاتى ەرلان سايروۆ «AMANAT» پارتياسى فراكتسياسىنىڭ وتىرىسىندا مالىمدەدى. ونىڭ ايتۋىنشا، اتالعان قۇجات مەملەكەتتىك بيلىكتى جەكەلەندىرۋدەن باس تارتۋدى كوزدەيدى جانە مەملەكەت دامۋىنىڭ ينستيتۋتسيونالدىق نەگىزىن ايقىندايدى.

ەرلان سايروۆ 2019 جىلعا دەيىن ەلدە جۇرگىزىلگەن بارلىق كونستيتۋتسيالىق رەفورمانىڭ بەلگىلى ءبىر ساياسي تۇلعالاردىڭ جەكە مارتەبەسىن بەكىتۋگە باعىتتالعان ارەكەتتەرمەن قاتار جۇرگەنىن ەسكە سالدى. ال جاڭا كونستيتۋتسيا جوباسى، كەرىسىنشە، مەملەكەت باسشىسى ءۇشىن قانداي دا ءبىر جەكە ارتىقشىلىق كوزدەلمەي ازىرلەندى.

«قازاقستاندا 30 جىل ىشىندە بىرنەشە كونستيتۋتسيالىق رەفورما جۇرگىزىلدى، الايدا 2019 جىلعا دەيىنگى بارلىق رەفورمادا ساياسي سپەكۋلياتسيا مەن جەكە باسقا تابىنۋ ەلەمەنتتەرى بولدى. جاڭا كونستيتۋتسيا جوباسىندا پرەزيدەنتتىڭ جەكە باسىنا ارتىقشىلىق بەرەتىن بىردە-ءبىر نورما جوق. بۇل – بۇرىنعى تاجىريبەدەن تۇبەگەيلى باس تارتۋ ءارى پرەزيدەنت قاسىم-جومارت توقاەۆتىڭ ءوز مورالدىق جانە ساياسي قاعيداتتارىنا ادال ەكەنىنىڭ ايقىن دالەلى»، – دەدى ەرلان سايروۆ.

ونىڭ ايتۋىنشا، جاڭا كونستيتۋتسيا جاھاندىق تۋربۋلەنتتىلىك جاعدايىندا جانە الەمنىڭ پوستدەموكراتيالىق شىندىققا ءوتۋ كەزەڭىندە قالىپتاسۋدا، مۇنداي جاعدايدا دەموكراتيانىڭ بۇرىنعى ۇلگىلەرى مازمۇندىق تۇرعىدان بارعان سايىن السىرەۋدە. وسى جاعدايدا اتا زاڭ قازاقستاننىڭ ەگەمەندىگى مەن تاۋەلسىزدىگىن قورعاۋدىڭ نەگىزگى قۇرالىنا اينالادى.

دەپۋتات رەفورمالاردىڭ الەۋمەتتىك-ەكونوميكالىق ولشەمىنە جانە الەۋمەتتىك ادىلدىكتى قالپىنا كەلتىرۋ ماسەلەسىنە ەرەكشە نازار اۋداردى. سوڭعى جەتى جىلدا قازاقستان ساياسي دەموكراتيالاندىرۋ باعىتىندا عانا ەمەس، سونداي-اق ەكونوميكالىق رەسۋرستاردى قوعام يگىلىگىنە قايتا ءبولۋ ىسىندە دە ايتارلىقتاي ىلگەرىلەدى.

«وسى جىلدار ىشىندە ەل ادىلەتتىلىككە قاراي ەلەۋلى قادام جاساعانىن كورىپ وتىرمىز: وليگارحتاردىڭ زاڭسىز يەمدەنگەن مۇلكى مەملەكەتكە قايتارىلۋدا، بۇل قاراجاتقا مەكتەپتەر مەن اۋرۋحانالار سالىنۋدا، ءىرى كاسىپورىندار مەن ستراتەگيالىق اكتيۆتەر ۇلتتىق يۋريسديكتسياعا قايتارىلۋدا. بۇل – جاي دەكلاراتسيالار ەمەس، بۇل ەكونوميكانىڭ دا، قوعامنىڭ دا ناقتى سەزىنىپ وتىرعان شىنايى وزگەرىستەرى»، – دەدى سايروۆ.

سونداي-اق ول جاڭا كونستيتۋتسيادا ماڭىزدى الەۋمەتتىك كەپىلدىكتەر بەكىتىلگەنىن ەسكە سالدى. ولاردىڭ قاتارىندا مىندەتتى ورتا ءبىلىم بەرۋ جانە جاستاردىڭ تەگىن جوعارى ءبىلىم الۋ قۇقىعى بار. ونىڭ ايتۋىنشا، بۇل نورما الەمنىڭ كوپتەگەن ەلدەرىندە جوق جانە مەملەكەتتىڭ بولاشاق ۇرپاق الدىنداعى ستراتەگيالىق جاۋاپكەرشىلىگىن ايقىن كورسەتەدى.

قورىتىندىلاي كەلە، دەپۋتات جاڭا كونستيتۋتسيانىڭ ۇزاقمەرزىمدى سيپاتقا يە ەكەنىن جانە ەلدىڭ ورنىقتى ەكونوميكالىق، الەۋمەتتىك ءارى رۋحاني دامۋىنىڭ نەگىزىن قالايتىنىن اتاپ ءوتتى.

«بۇگىنگى كونستيتۋتسيا – ءبىر عانا ساياسي كەزەڭگە ارنالعان قۇجات ەمەس. ول قازاقستاننىڭ تۇراقتى دامۋىن ونجىلدىقتار بويى قامتاماسىز ەتۋگە قابىلەتتى، سول سەبەپتى مەن بۇل جوبانى تولىقتاي قولدايمىن»، – دەپ قورىتىندىلادى ەرلان سايروۆ.

Abai.kz