مادەنيەت جانە اقپارات ۆيتسە-ءمينيسترى ەۆگەني كوچەتوۆ ەلىمىزدە كەيبىر كونتسەرتتەردى وتكىزۋگە تىيىم سالۋ نەمەسە ولاردى توقتاتا تۇرۋعا قاتىستى نورماعا تۇسىنىكتەمە بەردى.

بۇل نورما بۇگىن سەنات ماقۇلداعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەاتيۆتى يندۋستريالاردى قولداۋ جانە دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا ەنگىزىلگەن.

قازىرگى كەزەڭدە قاي ارتىستەرگە، نەگە قاتىستى قانداي دا ءبىر تىيىم سالىنۋى مۇمكىن ەكەنى جونىندە ناقتى تۇسىنىك جوق. قازاقستان بارشاعا ءاردايىم اشىق، بىزدە ءوزىن-ءوزى ءبىلدىرۋ ەركىندىگى تولىق مويىندالادى. بۇگىنگى كۇنگە دەيىن قانداي تاجىريبە بولدى؟ ايتالىق، شەتەلدىك ءارتىس قازاقستاننىڭ بەلگىلى ءبىر قالاسىنا گاسترولدىك ساپارمەن كەلگىسى كەلدى دەلىك. مەحانيزم مىناداي ەدى: ونىڭ پروموۋتەرى نەمەسە پروديۋسەرى، نە بولماسا جۇمىس ىستەيتىن ۇيىمى ەشقانداي كەلىسىمشارت جاساماستان بيلەت ساتۋدى باستاپ كەتەتىن. ەگەر بيلەتتەر ساتىلسا، سودان كەيىن عانا كەلىسىمشارت جاسالىپ، تيىسىنشە اكىمدىكپەن جۇمىس باستالاتىن، – دەپ ءتۇسىندىردى ەۆگەني كوچەتوۆ سەناتتا وتكەن ءباسپاسوز ءماسليحاتىندا بەرگەن سۇحباتىندا.

ونىڭ ايتۋىنشا، سونىڭ سالدارىنان جەرگىلىكتى بيلىك پەن مينيسترلىك كەيبىر ورىنداۋشىلاردىڭ جوسپارىنان بەيحابار بولىپ قالۋى مۇمكىن ەدى.

ءبىزدىڭ ويىمىزشا، بۇل – ونشا دۇرىس ەمەس، ويتكەنى الەمدىك تاجىريبە مۇلدە باسقاشا. ەندى مەحانيزم مىناداي بولادى: بەلگىلى ءبىر قالادا تۋر جوسپارلانا سالىسىمەن، ەڭ الدىمەن كەلىسىمشارت جاسالۋى جانە اكىمدىكپەن جۇمىس باستالۋعا ءتيىس. كەلىسىمشارتتا ءارتىستىڭ ورىنداۋعا مىندەتتى تالاپتارى كورسەتىلەدى، ءارى ول تالاپتاردى بۇزباۋى كەرەك. بۇل مىندەتتەمەلەر، ەڭ الدىمەن، ورىندايتىن اندەرىنە قاتىستى بولادى: ولار ەلىمىزدىڭ ۇلتتىق قۇرىلىمىنا نۇقسان كەلتىرمەۋى، پورنوگرافيانى، ەسىرتكى قولدانۋدى ناسيحاتتاماۋى ءتيىس، ياعني زاڭعا قايشى كونتەنتتىڭ بۇكىل ءتىزىمى قامتىلادى. ەگەر ءبارى تالاپقا ساي بولسا، ءارتىس بەلگىلى ءبىر قالادا ونەر كورسەتۋگە قۇقىلى. بىزدىڭشە، مۇنىڭ ءبارى قيسىندى ءارى دۇرىس، – دەدى كوچەتوۆ.

جۋرناليستەر: "ەگەر ورىنداۋشىنىڭ شىعارماشىلىعىندا تىيىم سالىنعان تاقىرىپتار بولسا، ونىڭ قازاقستانعا كەلۋى مۇمكىن بە، جوق پا؟" دەگەن سۇراقتى ناقتىلادى.

ءبىز ونداي مۋزىكالىق كومپوزيتسيالاردى ورىنداماۋعا كەڭەس بەرەمىز، – دەپ ءتۇسىندىردى ەۆگەني كوچەتوۆ.

Abai.kz