مەملەكەت باسشىسى قاسىم-جومارت توقاەۆ ۇلتتىق كومپانيالار مەن «سامۇرىق-قازىنا» قورىنىڭ قىزمەتىنە قاتىستى قاتاڭ سىن ايتتى. ۇكىمەتتىڭ كەڭەيتىلگەن وتىرىسىندا سويلەگەن پرەزيدەنت ۇلتتىق كومپانيالارداعى باسقارۋ جۇيەسى زامان تالابىنا ساي كەلمەيتىنىن اشىق مالىمدەدى.

پرەزيدەنتتىڭ ايتۋىنشا، ۇلتتىق كومپانيالاردىڭ قۇرىلىمى تۇبەگەيلى قايتا قاراۋدى قاجەت ەتەدى.

- قوسشىدان باسشى كوپ. باسشىلىق قۇرامى ەل ايتىپ جۇرگەندەي «سول جاعالاۋدىڭ» ادامدارىنا تولىپ قالعان. تۇسكى ۋاقىتتا قوناقۇيلەردە وتىرىپ، پىكىر الماسىپ، شاي-كوفە ءىشىپ وتىرادى. اشىعىن ايتۋ كەرەك، ولاردىڭ جۇمىسقا كومىلىپ جاتقان ەشتەڭەسى جوق، - دەدى مەملەكەت باسشىسى.

سونىمەن قاتار پرەزيدەنت كەيبىر باسشىلاردىڭ ناقتى جۇمىسپەن اينالىسۋدىڭ ورنىنا الەۋمەتتىك جەلىلەردە پىكىرتالاسقا ارالاسىپ، ءتىپتى كۇماندى ديسكۋسسيالارعا قاتىسىپ جۇرگەنىن دە سىنعا الدى. بۇل جاعداي مەملەكەتتىك باسقارۋداعى تيىمدىلىك پەن جاۋاپكەرشىلىك ماسەلەسىن قايتا كۇن تارتىبىنە شىعاردى.

كۆازي-مەملەكەتتىك سەكتورداعى قايشىلىقتار

پرەزيدەنت كوتەرگەن ماسەلەگە ءماجىلىس دەپۋتاتى، «اق جول» پارتياسىنىڭ توراعاسى ازات پەرۋاشەۆ تە پىكىر ءبىلدىردى. ونىڭ ايتۋىنشا، كۆازي-مەملەكەتتىك سەكتورداعى كادرلىق ارتىقشىلىق پەن شىعىن ماسەلەسى پارلامەنت مىنبەرىندە بىرنەشە جىلدان بەرى ايتىلىپ كەلەدى.

- ءبىز بۇل ماسەلەنى ۇكىمەتتىڭ جىل سايىنعى بيۋدجەت ەسەبىندە كوتەرىپ كەلەمىز. ۇلىبريتانيانى مىسالعا الىپ، كۆازي-مەملەكەتتىك مەكەمەلەردەگى قىزمەتكەرلەردى قىسقارتۋ تاجىريبەسىن ۇسىندىق. سوندا بيۋدجەت ۇنەمدەۋ ءۇشىن قانشا مەملەكەتتىك قىزمەتشى قىسقاردى دەپ سۇراعاندا، بىردە-ءبىر ادام قىسقارماعانى بەلگىلى بولدى، - دەدى دەپۋتات.

ازات پەرۋاشەۆتىڭ ايتۋىنشا، كەيبىر ۇلتتىق كومپانيا قىزمەتكەرلەرى ميلليونداعان سىياقىلار العانىمەن، ولاردىڭ ناقتى جۇمىسىنىڭ ناتيجەسى قوعامعا تۇسىنىكسىز كۇيىندە قالىپ وتىر.

- سىياقى بار، ال ناتيجە قايدا؟ -دەگەن سۇراق ءالى كۇنگە دەيىن اشىق تۇر، - دەپ تۇيىندەدى ول.

قوعام كۇتكەن وزگەرىس

ساراپشىلاردىڭ پىكىرىنشە، پرەزيدەنتتىڭ بۇل مالىمدەمەسى ۇلتتىق كومپانيالاردى باسقارۋ جۇيەسىنە قاتىستى جاڭا كەزەڭنىڭ باستالعانىن اڭعارتادى. قوعام تاراپىنان كوپتەن بەرى ايتىلىپ كەلە جاتقان ارتىق شتات، جوعارى جالاقى مەن تومەن تيىمدىلىك ماسەلەسى ەندى ناقتى رەفورمالارعا ۇلاسۋى ءتيىس.

ۇلتتىق كومپانيالار - مەملەكەتتىڭ ەكونوميكالىق تىرەگى. سوندىقتان ولاردىڭ اشىقتىعى، تيىمدىلىگى جانە ناتيجەگە جۇمىس ىستەۋى تەك بيۋدجەت ءۇشىن ەمەس، قوعامدىق سەنىم ءۇشىن دە شەشۋشى مانگە يە. ال مەملەكەت باسشىسىنىڭ سىنى بۇل سالادا كوسمەتيكالىق ەمەس، جۇيەلى وزگەرىستەر قاجەت ەكەنىن انىق كورسەتىپ وتىر.

Abai.kz