2026 جىلعى 17 اقپاندا استانا قالاسىنداعى دوستىق ۇيىندە ەتنومادەني بىرلەستىكتەردىڭ «جاڭا كونستيتۋتسيا - ادىلەتتى جانە پروگرەسسيۆتى قازاقستاننىڭ بەرىك نەگىزى» تاقىرىبىندا  جالپى رەسپۋبليكالىق فورۋمى ءوتتى.

فورۋم جۇمىسىنا قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ، پارلامەنت دەپۋتاتتارى، «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ مۇشەلەرى، رەسپۋبليكالىق جانە وڭىرلىك ەتنومادەني بىرلەستىكتەردىڭ باسشىلارى مەن اكتيۆى، قحا قوعامدىق قۇرىلىمدارىنىڭ، «اسسامبلەيا جاستارى»، ساراپشىلىق قاۋىمداستىق وكىلدەرى قاتىستى.

فورۋم جۇمىسىنا وڭىرلىك دوستىق ۇيلەرى ونلاين فورماتتا قوسىلدى، بۇل وبلىستاردىڭ كەڭ قامتىلۋىن قامتاماسىز ەتتى.

تالقىلاۋ بارىسىندا جاڭا كونستيتۋتسيا جوباسىنىڭ نەگىزگى ەرەجەلەرى جانە ولاردىڭ مەملەكەتتىڭ ودان ءارى دامۋى ءۇشىن ماڭىزى اتاپ ءوتىلدى. قوعامدىق كەلىسىمدى، بىرلىك پەن ىنتىماقتى نىعايتۋعا، سونداي-اق ەلدىڭ ورنىقتى جانە جۇيەلى دامۋىنىڭ ماڭىزدى فاكتورى رەتىندە ەتنوسارالىق ءوزارا ءىس-قيمىلدى دامىتۋعا ەرەكشە نازار اۋدارىلدى.

2026 جىلعى 15 ناۋرىزدا وتەتىن الداعى رەسپۋبليكالىق رەفەرەندۋمعا ايرىقشا ءمان بەرىلدى. جاڭا كونستيتۋتسيانى قابىلداۋ بويىنشا رەفەرەندۋم قازاقستاننىڭ ساياسي جۇيەسىن جاڭعىرتۋدىڭ جانە ەل دامۋىنىڭ قۇقىقتىق نەگىزدەرىن ۇزاق مەرزىمدى پەرسپەكتيۆادا نىعايتۋدىڭ ماڭىزدى كەزەڭى بولاتىنى اتاپ ءوتىلدى.

سۋرەت: استانا قالاسىنداعى دوستىق ۇيىنەن الىندى.

قۇجاتتىڭ اۋقىمدى قوعامدىق تالقىلاۋ ناتيجەسىندە ازىرلەنگەنى جانە جاڭارتىلعان نەگىزگى زاڭدى قالىپتاستىرۋعا ازاماتتاردىڭ جاپپاي قاتىسقانىن ايقىن كورسەتەتىنى اتاپ ءوتىلدى.

ءىس-شارا قورىتىندىسى بويىنشا فورۋمعا قاتىسۋشىلار جاڭا كونستيتۋتسيا جوباسىن جانە مەملەكەت باسشىسى باستاماشى بولعان رەفورمالاردى ءبىراۋىزدان قولدايتىندارىن ءبىلدىردى.

قازاقستان حالقى اسسامبلەياسىنىڭ اكتيۆى قوعاممەن اشىق ديالوگتى قامتاماسىز ەتۋگە جانە جۇرتشىلىقتى كەڭىنەن تارتۋعا باعىتتالعان اۋقىمدى اقپاراتتىق-ءتۇسىندىرۋ جۇمىسىن جالعاستىرۋعا دايىن ەكەنىن راستادى، سونداي-اق وتانداستاردى 2026 جىلعى 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسىپ، ازاماتتىق جاۋاپكەرشىلىك تانىتۋعا شاقىردى.

Abai.kz