قۇمەتتى دوستار!

بۇگىندە ەلىمىزدە كونستيتۋتسيالىق رەفورما جوباسى بويىنشا كەڭ كولەمدى قوعامدىق تالقىلاۋ ءوتىپ جاتىر. بۇل – قازاقستاننىڭ الداعى جىلدارداعى دامۋ باعىتىن، مەملەكەتتىك باسقارۋ جۇيەسىنىڭ كەلەشەگىن ايقىندايتىن اسا ماڭىزدى كەزەڭ.

مەن قازاقستان ازاماتى ءارى قوعام بەلسەندىسى رەتىندە ۇسىنىلىپ وتىرعان وزگەرىستەردىڭ ءمانى زور ەكەنىنە سەنەمىن جانە مەملەكەتتى ودان ءارى جاڭعىرتۋعا باعىتتالعان باستامالاردى قولدايمىن. 2022 جىلى باستالعان ادىلەتتى قازاقستاندى قۇرۋ جولى – كەزدەيسوق شەشىم ەمەس، ەل بولاشاعىن نىعايتۋعا ارنالعان جۇيەلى قادام. قازىرگى رەفورمالار – سول باعىتتىڭ جالعاسى، ياعني تەرەڭ ءارى جان-جاقتى ويلاستىرىلعان وزگەرىستەر كەزەڭى.

نەگىزگى ماقسات – حالىقتىڭ مۇددەسىن بىلدىرەتىن ينستيتۋتتاردىڭ ىقپالىن كۇشەيتۋ، مەملەكەت پەن قوعام اراسىنداعى سەنىمدى ارتتىرۋ. سپورت سالاسىندا جۇرگەن ادام رەتىندە ايتارىم: ۇلكەن جەتىستىككە جەتۋ ءۇشىن ءتارتىپ، جاۋاپكەرشىلىك جانە بىرلىك قاجەت. مەملەكەت تە ءدال سولاي – بەرىك قاعيداتتار مەن ورتاق ماقساتقا سۇيەنگەندە عانا قۋاتتى بولا الادى.

پرەزيدەنت اتاپ وتكەندەي، شىنايى پاتريوتيزم – بوس ۇران ەمەس، ناقتى ىسپەن دالەلدەنەتىن ۇستانىم. بۇل ءبىز ءۇشىن، اسىرەسە سپورت قاۋىمى ءۇشىن، بۇقارالىق سپورتتى دامىتۋعا، جاس دارىنداردى قولداۋعا جانە سالاۋاتتى ءومىر سالتىن ناسيحاتتاۋعا دەگەن تۇراقتى ەڭبەك.

قوعامدىق تالقىلاۋدىڭ ماڭىزى ەرەكشە. ءار ازاماتتىڭ پىكىرى ەسكەرىلىپ، اشىق ديالوگ ورناعاندا عانا رەفورمالار ءتيىمدى جۇزەگە اسادى. بىرلەسكەن وي مەن ورتاق جاۋاپكەرشىلىك – تابىستىڭ كەپىلى.

مەن بۇل باستامالار ەلىمىزدىڭ تۇراقتىلىعىن نىعايتىپ، تاۋەلسىزدىگىمىزدى بەكەمدەي تۇسەتىنىنە جانە كەلەر ۇرپاققا جارقىن بولاشاق سىيلايتىنىنا سەنىمدىمىن. ءبىز بىرلىك پەن ءوزارا سەنىم ارقىلى قۋاتتى، ادىلەتتى ءارى وركەندەگەن قازاقستاندى بىرگە قالىپتاستىرامىز.

ەرماحان يبرايموۆ، وليمپيادا چەمپيونى

Abai.kz