ءتيىستى قاۋلىعا ەلىمىزدىڭ باس مەملەكەتتىك سانيتاريالىق دارىگەرى سارحات بەيسەنوۆا قول قويدى.    

قىزىلشا انىقتالعان جاعدايدا ەكپە الماعان بالالار بالاباقشا مەن مەكتەپكە ۋاقىتشا قابىلدانبايدى. بۇل شارا ينفەكتسيانىڭ تارالۋىن تەجەۋگە باعىتتالعان.

قۇجات 19 اقپاننان باستاپ كۇشىنە ەندى.

قاۋلىعا سايكەس، ءبىلىم بەرۋ باسقارمالارىنىڭ باسشىلارى بالالاردى ۆاكتسينامەن قامتۋ دەڭگەيىن كەمىندە 90%-دان تومەن تۇسىرمەۋدى باقىلاۋعا، سونداي-اق ءبىلىم بەرۋ ۇيىمدارىندا كۇن سايىن "تاڭعى تەكسەرىس" جۇرگىزۋگە مىندەتتى.

ياعني، تاڭەرتەڭ وقۋشىلار مەن پەداگوگتەر تەكسەرىلىپ، اۋرۋ بەلگىلەرى بار ادامداردىڭ عيماراتقا كىرۋىنە جول بەرىلمەيدى. سونىمەن بىرگە اتا-انالارعا يممۋنداۋدىڭ ماڭىزى تۋرالى ءتۇسىندىرۋ جۇمىستارى كۇشەيتىلەدى.

وسىلايشا قىزىلشا تىركەلگەن جاعدايدا ەكپە الماعان بالالاردى بالاباقشا مەن مەكتەپتەن ۋاقىتشا شەتتەتۋ تاپسىرىلىپ وتىر.

Abai.kz