رەسپۋبليكالىق رەفەرەندۋم – ەلىمىزدە جۇرگىزىلىپ جاتقان كونستيتۋتسيالىق رەفورمالاردىڭ شەشۋشى كەزەڭى. ءبارىمىزدىڭ ورتاق بولاشاعىمىزعا قاتىستى شەشىم قابىلداناتىن سىن ساعاتتا داۋىس بەرۋدەن شەت قالماۋ – ءاربىر قازاقستاندىق ءۇشىن ماڭىزدى بورىش. وسى ورايدا، قوعام ومىرىندەگى ايتۋلى وزگەرىستەرگە قاتىستى ءتۇرلى سالانىڭ وكىلدەرى ءوز پىكىرلەرىن ءبىلدىرىپ جاتىر. ولاردىڭ ىشىندە ونەر مايتالماندارى مەن سپورتشىلار، شىعارماشىلىق يەلەرى دە بار.

بەلگىلى ەسترادا جۇلدىزى ۇلىقپان جولداسوۆ الەۋمەتتىك جەلىدە كونستيتۋتسيالىق رەفورما تۋرالى ويىن بىلدىرە كەلە، بۇنىڭ ەلىمىزدىڭ دامۋىنا جاڭا سەرپىن بەرىپ قانا قويماي، مادەنيەت پەن ونەر سالاسىنىڭ ەركىن وركەندەۋىنە دە مۇمكىندىك اشاتىنىن جازدى. 

«مادەنيەت – ۇلتتىڭ رۋحاني تىرەگى. سوندىقتان ۇلتتىق قۇندىلىقتاردى ساقتاپ، زاماناۋي شىعارماشىلىقپەن ۇشتاستىرۋ – ورتاق مىندەتىمىز»، دەدى ءانشى.

تانىمال اكتەر ەربولات تولەگەن الەۋمەتتىك جەلىگە بولىسكەن بەينەجازباسىندا 15 ناۋرىزدا وتەتىن رەسپۋبليكالىق رەفەرەندۋم قازاق ەلى، وسكەلەڭ ۇرپاق ءۇشىن ماڭىزى ەرەكشە، اتاۋلى كۇن ەكەنىن ايتتى.

«قادىرلى دوستار، زامان وزگەرىپ جاتىر، سوعان بايلانىستى ءبىزدىڭ كونستيتۋتسيامىز دا جاڭارىپ جاتىر. وسى تۇستا رەفەرەندۋمعا قاتىسۋ – ءاربىر قازاقستان ازاماتىنىڭ بورىشى ەكەنىن ەسكە سالعىم كەلەدى، وسى كۇننەن قالىس قالماڭىزدار»، دەپ مالىمدەدى ول.

تەاتر جانە كينو اكتەرى ەركەبۇلان دايىروۆ ەلىمىز ءۇشىن
ماڭىزدى شەشىم قابىلداناتىن رەفەرەندۋم كۇنى جاڭا كونستيتۋتسيا جوباسىنا داۋىس بەرۋ – ءار ازاماتتىڭ جاۋاپكەرشىلىگى ەكەنىن جەتكىزدى. «مەن ءوز تاڭداۋىمدى جاسايمىن. مەن بارامىن!» دەپ جازدى ول.

جازۋشى بەيبىت سارىبايدىڭ ايتۋىنشا، رەفەرەندۋم – تەك داۋىس بەرۋ كۇنى عانا ەمەس، ەلدىڭ كەلەشەگىن ايقىندايتىن ماڭىزدى ساياسي اكت، ءاربىر ازاماتتىڭ وتان الدىنداعى پارىزى.

«ءبىز ءۇشىن ەڭ قىمبات نارسە – ەلىمىزدىڭ بولاشاعى، تىنىشتىعى مەن دامۋى. 2026 جىلدىڭ 15 ناۋرىزىندا رەسپۋبليكالىق رەفەرەندۋم وتەدى. بۇل ءبىزدىڭ ارقايسىمىز ءۇشىن ۇلكەن جاۋاپكەرشىلىك پەن ازاماتتىق مىندەت. ءبىزدىڭ تاڭداۋىمىز – ەلدىڭ قۇقىقتىق نەگىزىنە، ازاماتتىق قوعام مەن دەموكراتيا نەگىزدەرىنە سەنىمىمىز بەن بولاشاعىمىزعا جاسالعان ۇلەس. 15 ناۋرىزدا كەلىپ، ءوزىڭنىڭ ازاماتتىق ۇستانىمىڭا ساي شەشىم شىعار! بىرگە كەلەشەگىمىزدى قالىپتاستىرايىق»، دەپ جازدى ول.

سونىمەن قاتار بەيبىت سارىباي بۇگىندە الەم قارقىندى وزگەرىپ جاتقان ۋاقىتتا، ەلدىڭ كەلەشەگى ءۇشىن ءوز تاڭداۋىڭدى جاساۋ – ءوزىڭنىڭ يدەياڭ مەن كوزقاراسىڭدى ءبىلدىرۋدىڭ ناقتى جولى ەكەنىن، رەفەرەندۋمدا ءار داۋىس ماڭىزدى، ءار پىكىر قۇندى بولاتىنىن ەسكە سالدى.

ەلىمىزدىڭ سپورت ساڭلاقتارى دا كونستيتۋتسيالىق رەفورمالاردى تالقىلاۋدان شەت قالمادى. وليمپيادانىڭ قولا جۇلدەگەرى، دزيۋدوشى عۇسمان قىرعىزباەۆ سپورتتا دا، ومىردە دە جەتىستىككە جەتۋدىڭ كىلتى – جاۋاپكەرشىلىك پەن ءتارتىپ ەكەنىن تىلگە تيەك ەتتى.

«ءاربىر سپورتشى ءۇشىن كوك تۋدى جەلبىرەتۋ – وتان الدىنداعى جوعارعى ماراپات. وليمپيادا تاتاميىندە بۇكىل حالىقتىڭ دەمىن سەزىنەسىڭ. بۇل سەنى تاباندى بولۋعا، ەرەجەنى ساقتاي وتىرىپ كۇرەسۋگە جانە جەڭىس ءۇشىن بار كۇش-جىگەرىڭدى سالۋعا مىندەتتەيدى. شىنايى جەڭىسكە تەمىردەي ءتارتىپ پەن سپورت ەرەجەلەرىنە قۇرمەتپەن قاراماي جەتە المايسىڭ. ءادىل باسەكە مەن جۇيەلى ءتارتىپ قانا الەمدىك دەڭگەيدە مويىندالۋعا جول اشادى. ءاربىر بەلدەسۋ كوماندانىڭ ناتيجەسى، ءار سپورتشىنىڭ جىگەرى مەن ۇلەسىنە بايلانىستى ەكەنىن ۇعىندىرادى. ەل ىشىندەگى باستى جەتىستىكتەر دە ورتاق تارتىپتەن باستالادى. الداعى رەفەرەندۋم – بۇكىل قازاقستان ءۇشىن ءادىل قاعيدالاردى بەكىتۋ مۇمكىندىگى. ءبىزدىڭ بولاشاعىمىز – ءوز قولىمىزدا!» دەپ جازدى بەلگىلى سپورتشى.

الەمدىك دودادا قازاق ەلىنىڭ قورجىنىنا جۇلدە سالىپ جۇرگەن تاعى ءبىر تانىمال دزيۋدوشىمىز ءابيبا ابۋجاقىنوۆا دا الدا كەلە جاتقان رەفەرەندۋمنىڭ ماڭىزى جايىندا ويىمەن ءبولىستى. ول ءوز ءسوزىن ومىردەگى كۇرەس تاتاميدەگى بەلدەسۋگە ۇقسايتىنىنان باستادى.

«دزيۋدوداعى جەڭىس تاتاميدەگى ءادىس جاساۋدان ەمەس، ەرەجەنى جاقسى بىلۋدەن باستالادى. الەمدىك رەيتينگكە باستار جولدا كەزدەيسوقتىق بولمايدى. ءاربىر ءادىس، ءاربىر قيمىل سانسىز جاتتىعۋدىڭ جانە شەشۋشى ساتتە تولىق جاۋاپكەرشىلىكتى ءوز موينىڭا الا ءبىلۋدىڭ ناتيجەسى. تاتاميگە شىققاندا ارتىڭدا ميلليونداعان ءۇمىت تۇرعانىن سەزەسىڭ. ول ساعان سوڭىنا دەيىن كۇرەسۋگە كۇش بەرەدى. ۇلكەن سپورتتا تابىس وزىڭە ادال بولىپ، تاڭداعان جولىڭا بەرىك بولۋدان باستالادى»، دەگەن سپورتشى بىلايعى ءومىر دە ءدال سونداي جاۋاپكەرشىلىكتى تالاپ ەتەتىنىن ايتتى.

«سوندىقتان الداعى جاڭا كونستيتۋتسيا بويىنشا رەفەرەندۋم – بارشامىز ءۇشىن ماڭىزدى تاڭداۋ ءساتى. نەگىزگى زاڭعا ەنگىزىلگەن وزگەرىستەر ءار ازاماتقا ءادىل مۇمكىندىك بەرىپ، جاستاردىڭ قۇقىعىن قورعاۋعا باعىتتالعان. 15 ناۋرىزدا مەن ەلىمىزدىڭ بولاشاعىن قورعاپ، وسى رەفورمالاردى قولداپ، رەفەرەندۋمعا قاتىسامىن»، دەدى ءا.ابۋجاقىنوۆا.

قازاقتىڭ ماڭدايىنا بىتكەن شاحماتشى قىزى ءبيبىسارا اساۋباەۆا دا رەفەرەندۋمنان تىس قالمايتىنىن اڭعارتىپ: «مەن قازاقستان اتىنان ونەر كورسەتەتىن سپورتشى رەتىندە ىلگەرى داميتىنىمىزعا سەنەمىن، سونداي-اق ەلىمىزدىڭ تۇراقتىلىعى مەن كەلەشەگىنە باعىتتالعان رەفورمالاردى قولدايمىن»، دەپ جازدى.

Abai.kz