ەلىمىزدىڭ سىرتقى ىستەر مينيسترلىگى ۋكراينا مەن ەفيوپيادا رەفەرەندۋم ۋچاسكەلەرىن اشپاۋ تۋرالى شەشىم قابىلدادى. بۇل تۋرالى ورتالىق رەفەرەندۋم كوميسسياسىنىڭ وتىرىسىندا بەلگىلى بولدى. 

جيىندى كوميسسيا توراعاسى نۇرلان ءابدىروۆ بۇعان دەيىن شەتەلدە 82 ۋچاسكە اشىلادى دەگەن مالىمەت بولعانىن اتاپ ءوتتى.

— قازىر سىزدەردىڭ بىزگە بەرگەن مالىمەتتەرىڭىزگە بايلانىستى بۇل سان وزگەرىپ وتىر. 80 ۋچاسكە شەتەلدەردە اشىلادى. وسى وزگەرىس نەمەن بايلانىستى ەكەنىن ءتۇسىندىرىپ بەرسەڭىز، — دەدى ول سىرتقى ىستەر مينيسترلىگىنىڭ ەرەكشە تاپسىرمالار بويىنشا ەلشىسى ەرلان الىمباەۆقا.

مينيسترلىك وكىلى قازىرگى حالىقارالىق جاعدايعا بايلانىستى 64 ەمەس 62 ەلدە ورنالاسقان 80 ۋچاسكەنى تىركەۋ تۋرالى شەشىم قابىلدانعانىن ايتتى.

— ول نەگىزىنەن حالىقارالىق جانە گەوساياسي جاعدايعا بايلانىستى بولىپ وتىر. ونىڭ ىشىندە ۋكراينا مەن ەفيوپياداعى ۋچاسكەلەرىمىزدە رەفەرەندۋم بويىنشا داۋىس بەرۋدى وتكىزبەۋ تۋرالى شەشىم قابىلداندى. ويتكەنى، ۋكرايناداعى ازاماتتارىمىزدى سانى كۇرت ازايدى. تىركەۋدە 500-دەي ازاماتىمىز بولعان. ولاردىڭ كوبى ول ەلدە جوق، سىرتقا شىعىپ كەتتى. كوبى قازاقستاندا ءجۇر. ال ەفيوپيادا 5 ازاماتىمىز تىركەلگەن. ولار — ەلشىلىكتىڭ قىزمەتكەرلەرى. ولاردىڭ ەكەۋى عانا سول جەردە بولادى. ەكەۋى كايرگە بارىپ داۋىس بەرەدى، — دەدى ەرلان الىمباەۆ.

Abai.kz