سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆ سۋ تاسقىنى قاۋپى قاي وڭىرلەردە بار ەكەنىن، الدىن الۋ ءۇشىن قانداي شارالار قولعا الىنعانىن ايتىپ بەردى. 

— 1 اقپاندا «قازگيدرومەت» رمك الدىن الا بولجام جاريالادى. وسى بولجامعا سايكەس، تاسقىن سۋ قاۋپى جوعارى ايماقتار قاتارىندا اقمولا، سولتۇستىك قازاقستان، شىعىس قازاقستان جانە قاراعاندى وبلىستارى بار. 1 ناۋرىزدا «قازگيدرومەت» تاعى دا ناقتىلانعان بولجام ۇسىنادى. سول كەزدە ناقتى قانداي وڭىرلەردە قانداي قاۋىپتەر بار ەكەنى ايقىن كورىنەدى، — دەپ جاۋاپ بەردى نۇرلان الدامجاروۆ ءتىلشى سۇراعىنا.

گيدروتەحنيكالىق قۇرىلىستار بويىنشا بارلىق نىسان سۋ تاسقىنى كەزەڭىنە دايىن. قاجەتتى تەكسەرۋلەر تولىق جۇرگىزىلگەن. سۋ قويمالارىندا شامامەن 14,5 ملرد تەكشە مەتر كولەمىندە بوس ورىن بار.

— ال «تاسقىن» اقپاراتتىق جۇيەسىنە قاتىستى جۇمىستى جاساندى ينتەللەكت مينيسترلىگى جۇرگىزەدى. ءبىز سۋ قويمالارىنىڭ جۇمىس رەجيمدەرى جونىندە دەرەكتەردى كۇن سايىن ەنگىزىپ وتىرامىز. وسى مالىمەتتەر نەگىزىندە مينيسترلىك ماماندارى مودەلدەۋ جۇرگىزەدى جانە سۋ تاسقىنى كەزەڭى الدىندا ءتيىستى بولجامدى بىزگە بەرەدى، — دەدى ۆيتسە-مينيستر.

Abai.kz