قازاقستان كاسىپقوي بوكس فەدەراتسياسىنىڭ پرەزيدەنتى راحىمجان ەردەنبەكوۆ WBO جانە IBF نۇسقاسىنىڭ الەم چەمپيونى جانىبەك ءالىمحانۇلىنا قاتىستى دوپينگ داۋىن تەرگەۋگە بايلانىستى جايدى جاريا ەتتى. 

2025 جىلدىڭ 6 جەلتوقسانىنا جوسپارلانعان WBA نۇسقاسى بويىنشا الەم چەمپيونى ەريسلاندي لارامەن 3 تيتۋل ءۇشىن وتەتىن جەكپە-جەككە ءۇش كۇن قالعاندا قازاقستاندىق چەمپيوننىڭ سىناماسىنان تىيىم سالىنعان مەلدوني زاتى تابىلعانى جاريالاندى.

20 قاڭتار كۇنى سپورتشىنىڭ «ۆ» سىناماسىندا دا دوپينگ بارى راستالدى.

وسىدان كەيىن World Boxing Organization ورتا سالماقتاعى الەم چەمپيونى جانىبەك ءالىمحانۇلىنا تىيىم سالىنعان مەلدوني زاتى بويىنشا وڭ ناتيجە كورسەتكەن دوپينگ سىناماسىنا بايلانىستى ءبىر جىل مەرزىمگە جارىستاردان شەتتەتۋ جازاسىن قولداندى.

دەگەنمەن، چەمپيوندىق اتاقتارى سپورتشىنىڭ وزىندە قالدىرىلدى. شەتتەتۋ مەرزىمى ىشىندە بوكسشى كەز كەلگەن كاسىبي نەمەسە كورسەتىلىم جەكپە-جەكتەرىنە قاتىسا المايدى.

قازاقستان كاسىپقوي بوكس فەدەراتسياسىنىڭ پرەزيدەنتى راحىمجان ەردەنبەكوۆتىڭ ايتۋىنشا، 9 قاڭتاردان باستاپ فەدەراتسيا ءتورت وتىرىس وتكىزىپ، 5 ساۋىردەن (جانىبەكتىڭ سوڭعى جەكپە-جەگىنىڭ كۇنى) باستاپ، جەكپە-جەك الدىنداعى تەستىلەۋدەن وتكەنگە دەيىنگى ۋاقىت ارالىعىنداعى وقيعالاردىڭ حرونولوگياسىن ەگجەي-تەگجەيلى قالپىنا كەلتىرگەن. ءاربىر جاتتىعۋ، تاماقتانۋ ءتارتىبى، قالپىنا كەلۋ ۇدەرىسى جانە دارۋمەندەر قابىلداۋى قاراستىرىلعان. سول كەزدە ءالىمحانۇلىنىڭ مامىردا دەنساۋلىعىنىڭ ناشارلاۋىنا بايلانىستى ءماجبۇرلى تۇردە جەكەمەنشىك كلينيكاعا بارىپ، مەلدونيى بار ەكپە العانى انىقتالعان.

— قازاقستان رەسپۋبليكاسىنىڭ كونستيتۋتسياسىنا سايكەس، ءاربىر ازاماتتىڭ دەنساۋلىعىن قورعاۋعا جانە مەديتسينالىق كومەك الۋعا قۇقىعى كەپىلدەندىرىلگەن. بۇل قۇقىقتان ەشكىم ايىرا المايدى. اتالعان جاعدايدا سپورتتىق كورسەتكىشتەرىن جاقسارتۋ ماقساتىندا تىيىم سالىنعان زاتتى ادەيى قولدانۋ نيەتى بولماعان. زات سپورتشىنىڭ اعزاسىنا ومىرلىك كورسەتكىشتەر بويىنشا تۇسكەن. سپورتشىنىڭ ءوزى پرەپارات قۇرامىندا مەلدوني بار ەكەنىن بىلمەگەن. ال تەكسەرۋدەن كەيىن ەمدەلۋ شۇعىل تۇردە جۇگىنگەن مەديتسينالىق مەكەمەدە باستالعان. سەبەبى دەمالىس كۇنى بولعان جانە جاعدايى جەدەل ارالاسۋدى تالاپ ەتكەن، — دەدى فەدەراتسيا باسشىسى.

ونىڭ ايتۋىنشا، دارىگەر رەگلامەنتتەلگەن نورمالارعا جانە پاتسيەنتتىڭ جاعدايىنا بايلانىستى ارەكەت ەتكەن.

— سونداي-اق، تاعايىندالعان «رەپرونات» پرەپاراتى قازاقستاندا تىيىم سالىنباعان جانە ەل بويىنشا مەديتسينالىق تاجىريبەدە كەڭىنەن قولدانىلاتىنىن، ءدارىحانالاردا ەركىن ساتىلاتىنىن اتاپ وتكىم كەلەدى. سپورت سالاسىنا قاتىسى جوق دارىگەر VADA-نىڭ تىيىم سالىنعان پرەپاراتتار حاتتاماسىن بىلۋگە مىندەتتى ەمەس. تەك مامانداندىرىلعان سپورت دارىگەرلەرى عانا VADA حاتتامالارىمەن ەگجەي-تەگجەيلى تانىس. سەبەبى ولار سول باعىتتا جۇمىس ىستەيدى. مەديتسينالىق قورىتىندىدا كورسەتىلگەن بەلگىلەر قۇرامىندا تسيتوپروتەكتور رەتىندەگى مەلدونيى بار «ريپرونات» ءدارىسىن شۇعىل قولدانۋدىڭ دۇرىستىعىن دالەلدەيدى، — دەپ جازدى راحىمجان ەردەنبەكوۆ Instagram پاراقشاسىندا.

قكبف باسشىسى فەدەراتسيانىڭ سۇراۋىنان كەيىن مەديتسينالىق كلينيكا تولىق مەديتسينالىق قۇجات ۇسىنعانىن اتاپ ءوتتى.

— كلينيكا تەرگەۋ جۇرگىزۋ بارىسىندا ىنتىماقتاستىققا اشىق بولدى. مەديتسينالىق كومەككە جۇگىنۋ فاكتىسى مەملەكەتتىك مەديتسينالىق قىزمەتتەر تىزىلىمىندە تىركەلگەن. بۇل دەرەكتەردى ءوتىپ كەتكەن داتامەن وزگەرتۋ مۇمكىندىگىنە جول بەرمەيدى، — دەپ سەندىردى فەدەراتسيا باسشىسى.

Abai.kz