XXI عاسىرداعى ۋنيۆەرسيتەتتىڭ باستى ميسسياسى مەن جاڭا فۋنكتسيالارى تومەندەگىدەي ايقىندالعان:

اشىقتىق پەن قولجەتىمدىلىك

ۋنيۆەرسيتەت وقۋعا ىنتالى، بەلگىلى ءبىر ءبىلىم قورى بار جانە وقۋعا دەگەن جوعارى موتيۆاتسياسى بار ءاربىر جان ءۇشىن اشىق بولۋى ءتيىس.

زەرتتەۋگە باعىتتالعان ءبىلىم بەرۋ ورتاسى

ۋنيۆەرسيتەت ءبىلىم بەرۋ باعدارلامالارىن وڭتايلى ءبىلىم بەرۋ جانە زەرتتەۋ قۇرىلىمىن قامتاماسىز ەتۋگە باعىتتاۋى قاجەت. رەكتوردان باستاپ زەرتحاناشىعا دەيىن بۇكىل قۇرام عىلىمي-زەرتتەۋ جۇمىستارىنا بەلسەنە قاتىسادى. مۇندا ستۋدەنتتى تەك وقىتىپ قانا قويماي، جاستارعا زەرتتەۋشىلىك ءادىس-تاسىلدەردى دامىتىپ، ولاردىڭ قاتىسۋىمەن بىرلەسە وتىرىپ جاڭا بيزنەس-يدەيالار مەن ءبىلىمدى قالىپتاستىراتىن ورتاعا اينالعان.

زاماناۋي ينفراقۇرىلىم مەن كاسىبي تالاپ

ۋنيۆەرسيتەت ءبىلىم بەرۋ ۇيىمىنىڭ زاماناۋي ارحيتەكتۋرالىق قۇرىلىمىن قۇرۋعا كوڭىل ءبولىپ، وقىتۋدىڭ جاڭا ديزاينىمەن قاتار ەڭ قولايلى ورتانى قالىپتاستىرۋعا باسىمدىق بەرۋى ءتيىس.

XXI عاسىردىڭ مامانى كوپسالالى عىلىمي بىلىمگە يە، ءوزىن-ءوزى دامىتۋعا قابىلەتتى، زەرتتەۋ مەن تالداۋ قۇرالدارىن مەڭگەرگەن بولۋى شارت. ال وقۋ پروتسەسىن بىلىكتى زەرتتەۋشىلەر مەن ساراپشىلار جۇرگىزەدى. وزىندىك زەرتتەۋ باعىتىن قالىپتاستىرماعان، ءوز عىلىمىنا شىن بەرىلمەگەن وقىتۋشىلار وقۋ پروتسەسىنە تارتىلمايدى.

تىكەلەي قارىم-قاتىناس پەن كرەاتيۆتىلىك

XXI عاسىر ۋنيۆەرسيتەتى ستۋدەنت پەن وقىتۋشىنىڭ تىعىز بايلانىسىنا جانە شىعارماشىلىق الەۋەتىنە ەرەكشە نازار اۋدارادى. وقىتۋ ورتاسى ستۋدەنتتىڭ كرەاتيۆتى ويلاۋىن، سىن تۇرعىسىنان قاراۋىن، جاڭاشىلدىقتى سەزىمتالدىقپەن قابىلداۋىن جانە ستاندارتتى ەمەس كوزقاراسىن دامىتۋعا باعىتتالعان. وقۋدىڭ تەحنيكالىق بازاسىنان بولەك، عىلىمي سايتتار مەن ارنايى باعدارلامالىق قامتاماسىز ەتۋگە باسىمدىق بەرىلەدى.

قوعامدىق جانە حالىقارالىق اشىقتىق

XXI عاسىر ۋنيۆەرسيتەتى قوعام ءۇشىن اشىق بولىپ قانا قويماي، ونىڭ زەرتتەۋلەرى مەن وقىتۋ پروتسەسى تەك ەل ىشىندەگى ەمەس، سونىمەن بىرگە شەتەلدىك جانە ايماقتىق وزەكتى ماسەلەلەر مەن قاجەتتىلىكتەرگە نەگىزدەلەدى.

ازاماتتىق جانە ەتيكالىق قۇندىلىقتاردى قالىپتاستىرۋ

ۋنيۆەرسيتەتتىڭ وقىتۋ ستراتەگياسى تەك مامان دايارلاۋمەن شەكتەلمەي، بويىندا الەۋمەتتىك جانە ەتيكالىق قۇندىلىقتارى بار ازاماتتى تاربيەلەۋگە باعىتتالعان. سوندىقتان ۋنيۆەرسيتەتتىڭ باستى ميسسياسى – جەكە تۇلعانىڭ قۇندىلىعىن قوعام قاجەتتىلىگىمەن ۇشتاستىرا الاتىن بەلسەندى دە شىعارماشىل ازاماتتى قالىپتاستىرۋ. ستۋدەنتتى اشىق، جەكە جاۋاپكەرشىلىگى بار، وزگەلەردى قۇرمەتتەيتىن، ۇجىمدا جۇمىس ىستەي الاتىن، ادال تۇلعا رەتىندە دامىتۋ بولىپ تابىلادى.

اكادەميالىق ەركىندىك جانە قوعامدىق كوشباسشىلىق

XXI عاسىرداعى ۋنيۆەرسيتەت ماقساتتارىنىڭ ءبىرى – ونىڭ وزىندىك بەلسەندى الەۋمەتتىك ينستيتۋت رەتىندە دامۋى. ۋنيۆەرسيتەت ساياسي ىقپالداردان اۋلاق بولىپ، اكادەميالىق ەركىندىكتى بارىنەن جوعارى قويۋى ءتيىس. ۋنيۆەرسيتەتتىڭ قۇندىلىعى ونىڭ قوعامعا اكەلەتىن پايداسى مەن ىقپالىمەن ولشەنەدى. وتكەن كەزەڭدەگى ۋنيۆەرسيتەتتىڭ تەك «مامان دايارلاۋ» فۋنكتسياسى بۇگىندە ەسكىرگەن كوزقاراسقا اينالدى. ۋنيۆەرسيتەت قوعامدىق دامۋدىڭ كوشباسشى ينستيتۋتىنا اينالىپ كەلەدى.

زەرتتەۋ مەن دامۋدىڭ اشىق كورپوراتسياسى

ۋنيۆەرسيتەت تەك ءبىلىم ورتالىعى بولۋ شەڭبەرىنەن شىعىپ، زەرتتەۋ مەن دامۋدىڭ كوپسالالى قىزمەتىن اتقاراتىن اشىق كورپوراتسياعا اينالدى. قوعام دا مۇنى مويىنداپ، كەز كەلگەن تۇيتكىلدى ماسەلەلەردى ۋنيۆەرسيتەتتىڭ قاتىسۋىمەن شەشۋدى ءجون كورەدى جانە ونى دامۋدىڭ وزەگى دەپ سانايدى. كەز كەلگەن ەلدىڭ ەكونوميكاسى مەن بيزنەس-ورتاسى قازىرگى تاڭدا ۋنيۆەرسيتەتتەردىڭ دەڭگەيىمەن جانە ولاردىڭ بەلسەندىلىگىمەن ايقىندالاتىن بولدى.

امانتاي تويشىبايۇلى

Abai.kz