ءماجىلىس دەپۋتاتتارى ءۇ.شاپاق پەن ا.سارىمعا!

ءۇنزيلا شاپاق، سەن: «مەن كونستيتۋتسيالىق قۇقىق مامانىمىن!» دەدىڭ.

بىراق، جاڭا كونستيتۋتسيا جوباسىنىڭ 53-بابىنىڭ 1 تارماعى وسى بەتى قابىلدانىپ كەتسە، ەرتەڭ پارتيالىق ءتىزىم بويىنشا قۇرىلتاي سايلاۋى كەزىندە 12 416 759 سايلاۋشى مەن سايلانۋشىنىڭ قۇقىعى بۇزىلاتىنىن ءبىلىپ تۇرىپ، بۇل ماسەلە تۋرالى اۋىز اشپايسىڭ!

مىنە، ايدان استى، سويلەپ جاتىرسىڭ، سويلەپ جاتىرسىڭ، كوبىك ءسوزدى كوپىرتىپ. بىراق، ءدال وسى ماسەلەگە جولامايسىڭ!

وسى ما سەنىڭ «كونستيتۋتسيالىق قۇقىق مامانى» بولعان ءتۇرىڭ، «الەمنىڭ وزىق ۇلگىدەگى كونستيتۋتسيالارىن زەرتتەپ-زەردەلەگەندەگى» بىلگەنىڭ؟!

ال، ايدوس سارىم: «پروپورتسيونالدىق جۇيگە ءوتۋ — ازاماتتاردىڭ سايلاۋ جانە سايلانۋ قۇقىعىنا قايشى كەلەدى دەگەن سياقتى جالعان تەزيس بار»، - دەپ سوعىپ وتىر!

ايدەكە، جۇرت ولاي ايتىپ وتىرعان جوق!

جۇرت: «جاڭا كونستيتۋتسيا جوباسىنىڭ 53-بابىنىڭ 1 تارماعى وسى بەتى قابىلدانىپ كەتسە، 12 416 759 سايلاۋشىنىڭ سايلاۋ قۇقىعى شەكتەلەدى!» دەپ وتىر.

سول جۇرتتىڭ بىرەۋى — مەن — اۋىت مۇقيبەك!

«ماجوريتارلىق وكرۋگتاردان سايلانۋ قۇقىعى ساقتالىپ وتىر. اكىم بوپ سايلانۋعا بولادى. اۋداندىق ماسليحات، قالالىق، وبلىستىق ماسليحات دەگەندەي…»، - دەپتى سارىم.

بۇل — مۇلدە باسقا ۇعىم!

ونىڭ قۇرىلتاي سايلاۋىمەن تۇك تە قاتىسى جوق!

ماجوريتارلىق وكرۋگتارداعى سايلاۋ قۇقىعىنىڭ ساقتالۋى — قۇرىلتاي سايلاۋىنداعى 12 416 759 سايلاۋشى قۇقىعىنىڭ بۇزىلۋىنىڭ ورنىن باسا المايدى!

سوندا، ايدوس سارىم 12 416 759 سايلاۋشىعا: «سايلاۋ قۇقىعىڭدى ىزدەسەڭ، اۋداندىق، قالالىق، وبلىستىق ماسليحات سايلاۋىنا بار. قۇرىلتايعا كىمدەردىڭ دەپۋتات بولاتىنىن ءبىز شەشەمىز»، - دەمەكشى مە؟!
كوپتىڭ ءسوزى، قوعامدىق پىكىر دەگەندى قاپەرگە الۋدى مۇلدەم قويعان بولماساڭدار، ەكەۋىڭنىڭ ايتقاندى ەستيتىن، جازعاندى كورەتىن كەزدەرىڭ بولدى عوي!

كوزدەرىڭدى اشىپ، جاڭا كونستيتۋتسيا جوباسىنىڭ 35-بابىنىڭ 2 تارماعىن ءبىر دۇرىستاپ وقىڭدارشى، اينالايىندار!

35-باپ

1. قازاقستان رەسپۋبليكاسى ازاماتتارىنىڭ مەملەكەتتىك ورگاندار مەن جەرگiلiكتi ءوزiن-ءوزi باسقارۋ ورگاندارىن سايلاۋعا جانە ولارعا سايلانۋعا، سونداي-اق جالپىحالىقتىق رەفەرەندۋمعا قاتىسۋعا قۇقىلى.

انە، ۇلكەن ارىپپەن بادىرايتىپ تۇرىپ جازىپ قويدىم، «رەسپۋبليكا پارتيالارىنىڭ» ەمەس، «رەسپۋبليكا ازاماتتارىنىڭ» دەپ تۇر.

جاڭا كونستيتۋتسيانىڭ 53-بابىنىڭ 1 تارماعىنا ساي، ەندى قۇرىلتاي سايلاۋىندا سايلاۋشىلار تەك پارتياعا عانا داۋىس بەرە الادى.

بىراق، پارتيا ۇسىنعان كانديداتقا داۋىس بەرە المايدى!

سوندا:

1) سايلاۋدا پارتيا ۇسىنعان كانديداتتار وزدەرىنە قاي ءوڭىردىڭ سايلاۋشىلارى قانشا داۋىس بەرگەنىن جانە ءوزىنىڭ جالپى سايلاۋ قورتىندىسى بويىنشا قانشا داۋىس العانىن قالاي ەسەپتەيدى؟

2) پارتيالىق تىزىممەن سايلاۋعا تۇسكەن، بىراق جالپىعا بىردەي، تەڭ جəنە توتە سايلاۋ قۇقىعى نەگىزىندە سايلاۋشىلاردىڭ تىكەلەي بىردە-ءبىر داۋىسىن الماعان كانديداتتاردى ورتالىق سايلاۋ كوميسسياسى قۇرىلتاي دەپۋتاتتىعىنا قالاي ىرىكتەمەك؟

3) «قۇرىلتاي دەپۋتاتتارى جالپىعا بىردەي، تەڭ جəنە توتە سايلاۋ قۇقىعى نەگىزىندە جاسىرىن داۋىس بەرۋ ارقىلى سايلانادى»، - دەگەن جاڭا كونستيتۋتسيانىڭ 54-بابىنىڭ 1 تارماعى قايدا قالادى؟

ول از دەسەڭىز، كونستيتۋتسيانىڭ 4-بابىنىڭ 1 تارماعىندا: «قازاقستان حالقى – مەملەكەتتىك بيلىكتىڭ بىردەن-ءبىر باستاۋى جانە ەگەمەندىك يەسى»، - دەپ جازۋلى تۇر.

سوندا، مەملەكەتتىك بيلىكتىڭ بىردەن-ءبىر باستاۋى جانە ەگەمەندىك يەسى بولعان 12 416 759 سايلاۋشى مەن سايلاۋشىنىڭ قۇقىعىن شەكتەيتىن نورمانىڭ وزگەرىسسىز كەتىپ بارا جاتقانىن كورىپ، ەستىپ تۇرىپ، قالاي ءۇنسىز قالاسىڭدار؟!

ءۇنزيلا، ساعان ايتام، ايدوس، سەن دە تىڭدا!

كونستيتۋتسيا — ويىنشىق ەمەس! ول — قۇراننان كەيىنگى قاسيەتتى قۇجات!

سونىمەن بىرگە، 12 416 759 سايلاۋشى مەن سايلانۋشى — از حالىق ەمەس. قازاقستان حالقىنىڭ تەڭ جارىمىنان استامى. وسىنشاما ازاماتتىڭ قۇقىعىن شەكتەيتىن نورمانى كورىپ تۇرىپ، سول بەتى قابىلداتىپ جىبەرۋ — قىلمىس! قۇداي الدىندا كەشىرىلمەس كۇنا!

ەگەر، وزدەرىڭ ايتىپ جۇرگەندەي، بىرەۋىڭنىڭ كونستيتۋتسياقىق قۇقىق مامانى، بىرەۋىڭنىڭ كاسىبي ساياساتتانۋشى ەكەنىڭ راس بولسا، بۇگىننەن باستاپ وسى قۇرىلتاي سايلاۋىنداعى سايلاۋشىلاردىڭ قۇقىعى بويىنشا وزدەرىڭنىڭ اشىق پىكىرلەرىڭدى بىلدىرىڭدەر!

اۋىت مۇقيبەك

Abai.kz