تسيفرلىق ەكونوميكانىڭ قارقىندى دامۋى جاعدايىندا قازاقستان ەلەكتروندىق ۇكىمەتتىڭ زاماناۋي ارحيتەكتۋراسىن جۇيەلى تۇردە قالىپتاستىرىپ كەلەدى. وسى ينفراقۇرىلىمنىڭ نەگىزگى ەلەمەنتتەرىنىڭ ءبىرى – مەملەكەتتىك ورگاندار مەن جەكە سەكتور اراسىنداعى دەرەكتەر الماسۋدى ءتيىمدى قامتاماسىز ەتەتىن Smart Bridge ينتەگراتسيالىق پلاتفورماسى.

قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ اتاپ وتكەندەي، ەلدە مەملەكەتتىك باسقارۋدىڭ اۋقىمدى ءارى ماسشتابتالاتىن تسيفرلىق مودەلى قالىپتاستىرىلعان. بۇل جۇيەدە Smart Bridge ماڭىزدى ءرول اتقارادى – پلاتفورما مەملەكەتتىك ورگانداردىڭ، بيزنەستىڭ جانە ءتۇرلى تسيفرلىق سەرۆيستەردىڭ بىرىڭعاي ەكوجۇيە اياسىنداعى ءوزارا ءىس-قيمىلىن قامتاماسىز ەتەدى.

Smart Bridge – اقپاراتتىق جۇيەلەردى مەملەكەتتىك تسيفرلىق ينفراقۇرىلىمعا قوسۋ ۇدەرىسىن جەڭىلدەتۋگە ارنالعان ەلەكتروندىق ۇكىمەتتىڭ اقپاراتتىق-كوممۋنيكاتسيالىق پلاتفورماسى. پلاتفورما مەملەكەتتىك ورگاندار مەن جەكە كومپانيالارعا ءوز جۇيەلەرىن جىلدام ينتەگراتسيالاۋعا، قاجەتتى دەرەكتەرگە قول جەتكىزۋگە جانە جاڭا تسيفرلىق شەشىمدەردى ازىرلەۋ ءۇشىن مەملەكەتتىك سەرۆيستەردى پايدالانۋعا مۇمكىندىك بەرەدى.

جوبانىڭ نەگىزگى ماقساتى – مەملەكەتتىك اقپاراتتىق رەسۋرستارعا قوسىلۋ كەزىندە تۋىندايتىن بيۋروكراتيالىق جانە تەحنيكالىق كەدەرگىلەردى ازايتۋ، سونداي-اق بۇل پروتسەستى بارلىق قاتىسۋشىلار ءۇشىن اشىق ءارى ىڭعايلى ەتۋ.

پلاتفورما ىسكە قوسىلعانعا دەيىن اقپاراتتىق جۇيەلەردى ينتەگراتسيالاۋ كوبىنە ۇزاق كەلىسۋ راسىمدەرىمەن جانە كۇردەلى تەحنيكالىق پروتسەدۋرالارمەن قاتار جۇرەتىن. Smart Bridge بۇل ۇدەرىستى ەداۋىر وڭتايلاندىرىپ، ءوزارا ءىس-قيمىلدىڭ بىرىڭعاي تەتىگىن قالىپتاستىرۋعا مۇمكىندىك بەردى.

جوبا بويىنشا جۇمىستار 2018 جىلى باستالدى. ونى ىسكە اسىرۋعا قازاقستان رەسپۋبليكاسى پرەمەر-ءمينيسترىنىڭ ورىنباسارىنىڭ حالىقارالىق تاجىريبەنى، اتاپ ايتقاندا ەستونيانىڭ X-Road ينتەگراتسيالىق پلاتفورماسىن پايدالانۋ تاجىريبەسىن ەنگىزۋدى كوزدەيتىن حاتتامالىق تاپسىرماسى نەگىز بولدى.

سول جىلى پلاتفورمانى جوبالاۋعا ارنالعان تەحنيكالىق تاپسىرما ازىرلەندى. 2019 جىلى Smart Bridge اقپاراتتىق قاۋىپسىزدىك تالاپتارى بويىنشا سىناقتاردان ءساتتى ءوتىپ، ونەركاسىپتىك پايدالانۋعا ەنگىزىلدى. 2020 جىلى پلاتفورمانىڭ پيلوتتىق پايدالانۋى باستالدى.

بۇگىندە Smart Bridge قازاقستاننىڭ ەلەكتروندىق ۇكىمەت ەكوجۇيەسىندەگى تسيفرلىق ءوزارا ءىس-قيمىلدىڭ نەگىزگى قۇرالدارىنىڭ بىرىنە اينالدى.

پلاتفورمادا 11 377 ۇيىم تىركەلگەن جانە 2 953 سەرۆيس جاريالانعان. ولاردىڭ ىشىندە 2 091-ءى مەملەكەتتىك، ال 862-ءسى مەملەكەتتىك ەمەس سەرۆيستەر.

جالپى Smart Bridge ارقىلى 4 671 ينتەگراتسيا جۇزەگە اسىرىلعان. ولاردىڭ قاتارىندا مەملەكەتتىك ورگاندار اراسىنداعى ءوزارا ءىس-قيمىل (G2G), بيزنەستىڭ مەملەكەتتىك سەرۆيستەرگە قوسىلۋى (G2B), سونداي-اق جەكە پلاتفورمالار اراسىنداعى ينتەگراتسيالار (B2B) بار.

Smart Bridge-ءتىڭ دامۋى مەملەكەتتىك باسقارۋدى اۋقىمدى تسيفرلىق ترانسفورماتسيالاۋدىڭ ءبىر بولىگى بولىپ تابىلادى. پلاتفورما بيزنەسكە ەلەكتروندىق ۇكىمەت ينفراقۇرىلىمىنا قول جەتكىزۋگە مۇمكىندىك بەرىپ، جاڭا تسيفرلىق شەشىمدەردىڭ پايدا بولۋىنا جاعداي جاسايدى جانە زاماناۋي تەحنولوگيالىق ەكوجۇيەنىڭ قالىپتاسۋىنا ىقپال ەتەدى.

تسيفرلىق تەحنولوگيالار كەڭىنەن ەنگىزىلىپ جاتقان قازىرگى كەزەڭدە مۇنداي شەشىمدەر ەلەكتروندىق ۇكىمەتتىڭ، فينتەح باعىتتارىنىڭ جانە جاڭا تەحنولوگيالىق جوبالاردىڭ ودان ءارى دامۋى ءۇشىن ماڭىزدى نەگىز بولىپ سانالادى.

وسىلايشا، Smart Bridge قازاقستاننىڭ زاماناۋي تسيفرلىق ينفراقۇرىلىمىنىڭ ماڭىزدى ەلەمەنتى رەتىندە مەملەكەت، بيزنەس جانە تسيفرلىق سەرۆيستەر اراسىنداعى ءوزارا ءىس-قيمىلدى اناعۇرلىم ءتيىمدى ۇيىمداستىرۋعا مۇمكىندىك بەرەدى.

Abai.kz