ءاربىر سپورتشىعا 2500 اقش دوللارى كولەمىندە قاراجات بەرىلدى. بۇل تۋرالى ۇوك حابارلادى. 

2028 جىلى اقش-تىڭ لوس-اندجەلەس قالاسىندا وتەتىن وليمپيادا ويىندارىنا دايىندىق اياسىندا حالىقارالىق وليمپيادالىق كوميتەتىنىڭ (حوك) جەكە ستيپەنديالىق باعدارلاماسىنا ەنگەن قازاقستاندىق سپورتشىلارعا العاشقى قارجىلىق تولەم جاسالدى.

ءاربىر سپورتشىعا 2500 اقش دوللارى كولەمىندە قاراجات بەرىلدى.

اتالعان باعدارلاما وليمپياداعا ىرىكتەۋ كەزەڭى مەن دايىندىق بارىسىندا سپورتشىلارعا قارجىلاي قولداۋ كورسەتۋگە باعىتتالعان. قازاقستاندىق اتلەتتەردىڭ ستيپەنديا يەگەرلەرى قاتارىنا قوسىلۋىنا قازاقستان ۇلتتىق وليمپيادالىق كوميتەتى باستاماشى بولدى. ۇوك ۇلتتىق فەدەراتسيالارمەن جانە حوك-پەن بىرلەسىپ جۇمىس جۇرگىزىپ، ءوتىنىم بەرۋ پروتسەسىن تولىق ۇيلەستىردى.

— ستيپەنديا 2028 جىلعى وليمپيادا ويىندارىنىڭ باعدارلاماسىنا ەنگەن جەكە سپورت تۇرلەرىندە باق سىنايتىن سپورتشىلارعا بەرىلەدى. ىرىكتەۋ بارىسىندا ۇمىتكەرلەردىڭ ناتيجەلەرى، وليمپياداعا جولداما الۋعا مۇمكىندىگى جانە جوعارى ناتيجە كورسەتۋ الەۋەتى باستى نازارعا الىندى. سونىمەن قاتار دوپينگكە قاتىستى ەرەجە بۇزۋشىلىقتاردىڭ بولماۋى جانە وليمپيادالىق حارتيا تالاپتارىنا قايشى كەلەتىن جايتتاردىڭ جوقتىعى ماڭىزدى تالاپتاردىڭ ءبىرى بولدى، — دەلىنگەن ۇوك حابارلاماسىندا.

بولىنگەن قاراجات وقۋ-جاتتىعۋ جيىندارىن وتكىزۋگە، جەكە دايىندىققا، جاتتىقتىرۋشىلار مەن مامانداردىڭ ەڭبەكاقىسىن تولەۋگە، مەديتسينالىق جانە عىلىمي قولداۋعا، ساقتاندىرۋعا، سونداي-اق، تۇرۋ مەن تاماقتانۋ شىعىندارىن وتەۋگە جۇمسالۋى مۇمكىن. قارجىنىڭ جۇمسالۋى بەلگىلەنگەن تارتىپكە ساي تۇراقتى تۇردە ەسەپكە الىنادى.

2028 جىلعى وليمپياداعا دايىندىق كەزەڭى باستالدى. ءاربىر دايىندىق ساتىسىنىڭ ماڭىزى زور. بۇل ستيپەنديا سپورتشىلارعا جاتتىعۋ جوسپارىن جۇيەلى قۇرىپ، ىرىكتەۋ جارىستارىنا تىڭعىلىقتى ازىرلەنۋگە كومەكتەسەدى. ناتيجەسىندە ولار كوزدەگەن كورسەتكىشتەرىنە قول جەتكىزۋگە مۇمكىندىك الادى، — دەپ مالىمدەدى قازاقستان ۇوك.

Abai.kz