تاياۋ شىعىستاعى قاقتىعىستىڭ 25-ءشى كۇنىندە اقش پرەزيدەنتى ترامپ اقش پەن يراننىڭ «وتە جاقسى جانە ءونىمدى» كەلىسسوزدەر جۇرگىزىپ جاتقانىن ءارى يراننىڭ ەنەرگەتيكالىق ينفراقۇرىلىمىنا جاسالاتىن شابۋىلداردىڭ بەس كۇنگە كەيىنگە قالدىرىلعانىن مالىمدەدى.

يران سىرتقى ىستەر مينيسترلىگى ترامپتىڭ كەلىسسوزدەر تۋرالى مالىمدەمەلەرىن جوققا شىعاردى. دۇيسەنبىدە يران سىرتقى ىستەر مينيسترلىگى اقش-تىڭ يرانمەن ديالوگ جۇرگىزۋ تۋرالى ءوتىنىشى جايىندا «دوس ەلدەردەن» اقپارات العانىن مالىمدەدى، بىراق سوعىس باستالعاننان بەرى اقش-پەن مۇنداي كەلىسسوزدەر جۇرگىزگەنىن تەرىستەدى. بۇعان دەيىن يران تارابى «جاعالاۋداعى نىساندارعا شابۋىل جاسالعان جاعدايدا پارسى شىعاناعىنا مينالار قويىپ، اقش ەنەرگەتيكالىق نىساندارىنا سوققى بەرەمىز» دەپ سەس كورسەتكەن بولاتىن.

ترامپ اقش پەن يران اراسىنداعى كەلىسسوزدەر يراننىڭ جاڭا جوعارعى كوسەمى مودجتابا حامەنەيمەن ەمەس، ءوزى «وتە لايىقتى» سانايتىن اداممەن جۇرگىزىلىپ جاتقانىن اشىق ايتقان. ول سونداي-اق قاقتىعىستا كوپتەگەن جوعارى لاۋازىمدى شەنەۋنىكتەر قازا تاپقاندىقتان، «يرانداعى رەجيمنىڭ وزگەرۋى تابيعي» دەگەن.

Axios سايتى اتى اتالماعان يزرايلدىك شەنەۋنىككە سىلتەمە جاساي وتىرىپ، ترامپتىڭ ارىپتەسى يران پارلامەنتىنىڭ سپيكەرى موحامماد باگەر گاليباف بولعانىن حابارلادى. ول تەگەراننىڭ ەڭ ىقپالدى، قاتتى ءدىنشىل ەمەس تۇلعالارىنىڭ ءبىرى.

بىراق گاليباف X پاراقشاسىندا «ەشقانداي كەلىسسوزدەر جۇرگىزىلمەگەنىن» جازدى.

اقش يرانمەن كەلىسسوزدەر جۇرگىزەتىنىن جاريالاعاننان بەرى مۇناي باعاسى 10%-دان استامعا تومەندەدى جانە قور نارىقتارى كورسەتكىشى كوتەرىلدى.

اقش پەن ءيزرايلدىڭ اپتا سوڭىنداعى يرانعا قارسى سوعىس بىرنەشە اپتاعا سوزىلۋى مۇمكىن دەگەن ەسكەرتۋلەرىنەن كەيىن مۇناي باعاسى تاعى دا كوتەرىلگەن بولاتىن.

اقش ەنەرگەتيكا ءمينيسترى كريس رايت مۇناي نارىعىنداعى ءۇزىلىس پەن قىمباتشىلىقتىڭ «ۋاقىتشا» ەكەنىن مالىمدەدى.

حالىقارالىق ەنەرگەتيكا اگەنتتىگىنىڭ (حەا) باس ديرەكتورى فاتيح بيرول تاياۋ شىعىستاعى سوعىستاردان تۋىنداعان ەنەرگەتيكالىق داعدارىس الەمدىك ەكونوميكاعا «ايتارلىقتاي قاۋىپ» توندىرەتىنىن، «ەشبىر ەل امان قالمايتىنىن» ەسكەرتتى.

بيرول سوعىس سالدارىنان تاياۋ شىعىستىڭ توعىز ەلىندەگى كەم دەگەندە 40 ەنەرگەتيكالىق نىسانعا «اۋىر» زالال كەلگەنىن العا تارتتى.

Abai.kz