ەلىمىزدە سۋ تاسقىنى قاۋپى جوعارى ايماقتاعى 15 ەلدى مەكەندى سۋ شايۋى مۇمكىن. اعىمداعى احۋال جايىندا قر تجم توتەنشە جاعدايلاردىڭ الدىن الۋ كوميتەتى توراعاسىنىڭ مىندەتىن اتقارۋشى روللان ەسماعانبەتوۆ «24KZ» تەلەارناسىنداعى «ءتۇيىن» باعدارلاماسىنا بەرگەن سۇحباتىندا ايتىپ بەردى.

«بىزگە تۇسكەن مالىمەتتەرگە سايكەس، سۋ باسۋ قاۋپى بار 15 ەلدى مەكەن بار. قاۋىپ سەيىلگەن جوق. باتىس وڭىردە جاۋىن-شاشىن مولشەرى ورتاشا دەڭگەيدەن  ارتىق بولۋى مۇمكىن. سوندىقتان قاتاڭ باقىلاۋدا. تاسقىن بولمايدى دەپ ارقانى كەڭگە سالۋعا بولمادى. دايىندىقتى كۇشەيتىپ، ماسەلەلەردى جان-جاقتى تالقىلاۋ كەرەك»، - دەدى  روللان ەسماعانبەتوۆ

قانشا وڭىردە تاسقىن قاۋپى بار؟

8 وبلىسقا سۋ تاسقىنى قاۋپى ءتونىپ تۇر. جالپى 272 ەلدى مەكەن قاۋىپتى ايماققا كىرەدى.

«قىزىل» ايماقتا: باتىس قازاقستان جانە اقتوبە وبلىسى.

«سارى» ايماقتا: اقمولا، سولتۇستىك قازاقستان، قاراعاندى، شىعىس قازاقستان، قوستاناي، اباي وبلىستارى.

سونداي-اق، تجم وكىلى سۋ تاسقىنىنىڭ الدىن الۋ بويىنشا اتقارىلعان جۇمىستارعا توقتالدى:

«اتقارىلعان ىستەر اۋقىمدى. سونىڭ ارقاسىندا سۋ باسۋ قاۋپى بار 1242 ەلدى مەكەندەردىڭ 272-ءسى قالىپ وتىر. بىراق ول 272 ەلدى مەكەننىڭ بارلىعىن سۋ باسادى دەگەن ءسوز ەمەس، بۇل جەردە قاۋىپ بار دەگەن ءسوز. اۋا رايى مەن جاۋىن-شاشىننىڭ دەڭگەيى باقىلانادى. قازىر بولجام بويىنشا 15 ەلدى مەكەندە قاۋىپ بار», - دەدى ول.

سۋ تاسقىنى احۋالى كۇردەلەنسە؟

قاۋىپتى ايماقتاردا سۋ دەڭگەيى كۇرت كوتەرىلسە، قوسىمشا كۇشتەر تارتىلادى.

«جاعداي شيەلەنىسىپ جاتاتىن بولسا، تجم 930 ادامنان، 113 تەحنيكادان تۇراتىن ارنايى رەزەرۆىن دايىنداپ وتىر»، - دەدى روللان ەسماعانبەتوۆ.

قازىردىڭ وزىندە سولتۇستىك قازاقستان وبلىسىنا الماتى وبلىسىنان قۇتقارۋشىلار جاساعى باردى. ولار قىزىلجار اۋدانى مەن زارەچنىي كەنتىندە بوگەتتەردى نىعايتىپ جاتىر. بيىل وڭىردە توڭ قالىڭ. بۇل قۇبىلىس ەرىگەن قار سۋىنىڭ توپىراققا تەز سىڭۋىنە كەدەرگى كەلتىرەدى. سينوپتيكتەر وزەن-كولدەردەگى سۋ دەڭگەيى قار ەرۋىنە بايلانىستى ءساۋىردىڭ باسىندا كوتەرىلە باستايتىنىن بولجاۋدا.

سۋ تاسقىنى كەزەڭىنە قانشا تەحنيكا دايىن؟

قر تجم جەكە قۇرامىنان 39 مىڭنان استام ادام، 12 مىڭنان استام تەحنيكا، 5 مىڭعا جۋىق سۋ ايداۋ جانە 701 ءجۇزۋ قۇرالدارى، 35 سورعى جىلجىمالى ستانتسيادان تۇراتىن سۋ تاسقىنىنا تارتىلاتىن كۇشتەر مەن قۇرالداردىڭ توپتاماسى دايىندالدى.

2025 جىلى توتەنشە جاعدايلار مينيسترلىگىنە 842 ارنايى تەحنيكا، 27 كاتەر، 683 سۋ سورۋ قۇرىلعىسى ساتىپ الىندى.

كوكتەم باستالعالى تجم 205 ەلدى مەكەننىڭ ۇستىنەن 29 رەت تىكۇشاقپەن بارلاۋ جۇرگىزدى. 218 ۇشقىشسىز باسقارىلاتىن ۇشۋ اپپاراتى بار. ولارمەن 583 رەت ۇشۋ جۇمىستارى جۇرگىزىلدى.

ايتا كەتەيىك، ەل بويىنشا 547 گيدروتەحنيكالىق نىسان جوندەۋدى تالاپ ەتەدى. 2025 جىلى 47-ءسى جوندەۋدەن ءوتتى.

Abai.kz