بەيجىڭدە وتكەن قازاقستان مەن قىتاي مادەنيەتىنىڭ توعىسپالى جىلىنىڭ سالتاناتتى اشىلۋىنا مىڭعا جۋىق ادام قاتىستى.

بەيجىڭ قالاسىندا قازاقستان مەن قىتاي مادەنيەتىنىڭ توعىسپالى جىلىنىڭ اشىلۋىنا ارنالعان سالتاناتتى گالا-كونتسەرت ءوتتى. تاعىلىمدى كەش ەكى ەل اراسىنداعى دوستىق پەن ءوزارا تۇسىنىستىكتىڭ نىعايا تۇسكەنىن بىلدىرەتىن ماڭىزدى مادەني وقيعاعا اينالدى.

سۋرەت: قر مادەنيەت جانە اقپارات مينيسترلىگىنەن الىندى.

ءىس-شارا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي تسزينپين اراسىنداعى ۋاعدالاستىقتار اياسىندا ۇيىمداستىرىلدى. وسى كەلىسىمگە سايكەس، 2026 جىل قازاقستان مەن قىتايدىڭ مادەنيەت جىلى بولىپ جاريالانعان ەدى.

سالتاناتتى كەشتىڭ قۇرمەتتى قوناقتارى قاتارىندا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى سۋن ەلي، قازاقستان رەسپۋبليكاسىنىڭ قىتاي حالىق رەسپۋبليكاسىنداعى توتەنشە جانە وكىلەتتى ەلشىسى شاحرات نۇرىشەۆ، سونداي-اق ديپلوماتيالىق كورپۋس وكىلدەرى مەن قىتايدىڭ شىعارماشىلىق زيالى قاۋىم وكىلدەرى بولدى.

سۋرەت: قر مادەنيەت جانە اقپارات مينيسترلىگىنەن الىندى.

قىتاي ۇلتتىق وپەرا تەاترىنىڭ ساحناسىندا قۇتتىقتاۋ ءسوز سويلەگەن پرەمەر-ءمينيستردىڭ ورىنباسارى ايدا بالاەۆا قازاقستان مەن قىتاي اراسىنداعى مادەني ىنتىماقتاستىقتىڭ جاڭا مازمۇنمەن تولىعا تۇسكەنىن اتاپ ءوتتى. ونىڭ ايتۋىنشا، بۇگىندە بىرلەسكەن جوبالار تابىستى جۇزەگە اسىرىلىپ، گاسترولدەر، كونتسەرتتەر، كورمەلەر مەن فەستيۆالدەر تۇراقتى تۇردە وتكىزىلىپ كەلەدى. سونىمەن قاتار، بەيجىڭدە قازاقستاننىڭ مادەني ورتالىعىنىڭ اشىلۋى ەكى ەل اراسىنداعى بايلانىستى نىعايتۋ جولىنداعى ماڭىزدى قادام بولدى. مينيستر مۇنداي باستامالاردىڭ بولاشاققا بەرىك نەگىز قالايتىنىن جانە جاس ۇرپاقتى جاڭا جەتىستىكتەرگە جىگەرلەندىرەتىنىن ەرەكشە اتاپ ءوتتى.

سۋرەت: قر مادەنيەت جانە اقپارات مينيسترلىگىنەن الىندى.

«بۇگىنگى كەش – جاي عانا كونتسەرت ەمەس، اۋدارمانى قاجەت ەتپەيتىن مادەنيەتتەر ديالوگى. مەملەكەت باسشىسى قاسىم-جومارت توقاەۆ اتاپ وتكەندەي، مادەنيەت – ۇلتتىڭ بەت-بەينەسىن ايقىندايدى، ال الەم ەلدى ەڭ الدىمەن ونىڭ ونەرى ارقىلى تانيدى. وسىنداي كەزدەسۋلەر، مۋزىكا، تەاتر جانە شىعارماشىلىق ارقىلى ءبىز ءبىر-ءبىرىمىزدى تەرەڭىرەك ءتۇسىنىپ، جاقىنداي تۇسەمىز. مادەنيەتتەردىڭ توعىسپالى جىلى بىزگە جاڭا مۇمكىندىكتەر اشادى. بىرلەسكەن جوبالارعا جول اشىپ، شىعارماشىلىق ىزدەنىستەردى جانداندىرىپ، ءوزارا رۋحاني بايىتۋعا سەرپىن بەرەدى»، – دەدى قر پرەمەر-ءمينيسترىنىڭ ورىنباسارى.

ءوز كەزەگىندە قىتايدىڭ مادەنيەت جانە تۋريزم ءمينيسترى مادەنيەت جىلىنىڭ گۋمانيتارلىق بايلانىستاردى تەرەڭدەتىپ، ەكىجاقتى ىنتىماقتاستىقتى دامىتۋداعى ماڭىزدى الاڭ ەكەنىن ايتتى.

سۋرەت: قر مادەنيەت جانە اقپارات مينيسترلىگىنەن الىندى.

«قىتاي مەن قازاقستان مادەنيەتىنىڭ توعىسپالى جىلى اياسىندا ەكى ەلدىڭ مۋزەيلەرى مەن عىلىمي-زەرتتەۋ قۇرىلىمدارى بىرلەسىپ ارحەولوگيالىق زەرتتەۋلەر جۇرگىزۋگە، ونەر قايراتكەرلەرى قىتاي–قازاقستان مۋزىكانتتارىنىڭ دوڭگەلەك ۇستەلى سياقتى الاڭداردا تەرەڭ ديالوگ ورناتۋعا مۇمكىندىك الادى. ساحنالىق ونەر مەن كرەاتيۆتى يندۋستريا سالالارىندا بىرلەسكەن كادر دايارلاۋ جۇمىستارى دا كۇشەيتىلەدى. «قىتاي مەن قازاقستان مادەنيەتىنىڭ توعىسپالى جىلى» مادەنيەت جانە ونەر ۇيىمدارى اراسىنداعى پراكتيكالىق ىنتىماقتاستىقتىڭ ماڭىزدى پلاتفورماسىنا، سونداي-اق ەكى ەلدىڭ مادەني بايلىعىن تانىتاتىن جارقىن الاڭعا اينالارىنا سەنىمدىمىز»، – دەدى سۋن ەلي.

سۋرەت: قر مادەنيەت جانە اقپارات مينيسترلىگىنەن الىندى.

گالا-كونتسەرتكە قازاقستان مەن قىتايدىڭ بەلگىلى ونەر شەبەرلەرى قاتىستى. كەشتىڭ ايرىقشا رۋحىن ەلىمىزدىڭ جەتەكشى شىعارماشىلىق ۇجىمدارى – قۇرمانعازى اتىنداعى قازاق ۇلتتىق حالىق اسپاپتار وركەسترى، «استانا وپەرا» تەاترى، HasSak ەتنو-فولكلورلىق توبى، «استانا بالەت» تەاترى، بەيجىڭ حورەوگرافيا ينستيتۋتى جانە قىتاي وپەرا جانە بالەت تەاترىنىڭ ۇلتتىق وركەسترى ايشىقتاي ءتۇستى.

Abai.kz