قۇجات ەلىمىزدە العاش رەت پسيحولوگيالىق كومەك كورسەتۋ سالاسىنىڭ قۇقىقتىق نەگىزدەرىن قالىپتاستىرۋعا باعىتتالعان ماجىلىستە «پسيحولوگيالىق قىزمەت تۋرالى» زاڭ جوباسى ءبىرىنشى وقىلىمدا قارالىپ جاتىر.

بۇل تۋرالى بايانداعان ءماجىلىس دەپۋتاتى اينا ءمىسىرالىموۆا سوڭعى جىلدارى قازاقستاندا پسيحولوگيالىق قىزمەتكە سۇرانىس ايتارلىقتاي ارتقانىن اتاپ ءوتتى. ونىڭ ايتۋىنشا، بۇل ءبىلىم بەرۋ ۇيىمدارىنا تۇسەتىن وتىنىشتەردەن، داعدارىس ورتالىقتارىنىڭ جۇمىسى مەن الەۋمەتتىك قىزمەتتەردىڭ ديناميكاسىنان، سونداي-اق ماجىلىسكە كەلىپ تۇسەتىن ازاماتتاردىڭ وتىنىشتەرى مەن الەۋمەتتىك جەلىلەردەگى تالقىلاۋلاردان انىق بايقالادى.

- الايدا قازىرگى تاڭدا پسيحولوگيالىق قىزمەت نارىعى تولىق رەتتەلمەگەن. ياعني كەز كەلگەن ادام ارنايى ءبىلىمى مەن كاسىبي بىلىكتىلىگىن راستاماي-اق ءوزىن پسيحولوگ رەتىندە تانىستىرا الادى. بۇل جاعداي ناقتى ماسەلەلەرگە الىپ كەلىپ وتىر. اتاپ ايتقاندا، ساپاسىز كورسەتىلگەن قىزمەت ادامنىڭ جاعدايىن ودان ءارى ۋشىقتىرىپ، جالپى جۇيەگە دەگەن سەنىمنىڭ تومەندەۋىنە سەبەپ بولۋى مۇمكىن، - دەيدى ءماجىلىس دەپۋتاتى اينا ءمىسىرالىموۆا.

وسىعان بايلانىستى زاڭ جوباسى ەڭ الدىمەن قوعامداعى قاۋىپسىزدىك پەن قىزمەت ساپاسىنا دەگەن سۇرانىسقا جاۋاپ رەتىندە ازىرلەنگەن. پسيحولوگيالىق كومەك - ادامنىڭ وسال كۇيىمەن جۇمىس ىستەۋدى تالاپ ەتەتىن سالا بولعاندىقتان، ول زاڭ اياسىنان تىس قالماۋى ءتيىس.

- زاڭ جوباسىنىڭ نەگىزگى باعىتتارىنىڭ ءبىرى - پسيحولوگ ۇعىمىن ناقتى انىقتاۋ. قۇجاتتا پسيحولوگ كىم ەكەنى، بۇل قىزمەتپەن كىمدەردىڭ اينالىسا الاتىنى جانە ولارعا قويىلاتىن كاسىبي تالاپتار ايقىندالادى، - دەپ ءتۇسىندىردى دەپۋتات.

سونىمەن قاتار پسيحولوگتاردىڭ قىزمەتىندە كاسىبي قۇپيانى ساقتاۋ، ەتيكالىق نورمالاردى ۇستانۋ جانە مانيپۋلياتسيالىق تاسىلدەردى قولدانۋعا تىيىم سالۋ قاعيدالارى ەنگىزىلەدى.

Abai.kz