2026 جىلعى 19 تامىزداعى جاعداي بويىنشا ەسەپتى اپتادا قازاقستاندا بىرقاتار الەۋمەتتىك ماڭىزى بار ازىق-تۇلىك تاۋارلارىنىڭ باعاسى ءتۇستى، دەپ حابارلايدى قر ستراتەلگيالىق جوسپارلاي جانە رەفورمالار اگەنتتىگى ۇلتتىق ستاتيستيكا بيۋروسى.

اپتا ىشىندە پيازدىڭ باعاسى 4,9%، كارتوپ 4,1%، الما 2,7%، اق قاۋداندى قىرىققابات 2,2%، ءسابىز 1,9%، قيار 1,5%، قوي ەتى، ونىڭ ىشىندە سۇيەكسىز ەت 0,6%، قىزاناق 0,4% ارزاندادى.

ەسەپتى اپتادا ءبىرىنشى سۇرىپتى ۇننان جاسالعان بيداي نانىنىڭ، قايماقتىڭ، سارى مايدىڭ جانە تۇزدىڭ باعاسى وزگەرىسسىز قالدى.

وڭىرلىك بولىنىستە ەلىمىزدىڭ بىرقاتار قالاسىندا دەفلياتسيالىق ديناميكا بايقالدى.

الەۋمەتتىك ماڭىزى بار ازىق-تۇلىك تاۋارلارىنىڭ جالپى باعا دەڭگەيى ءبىر اپتا ىشىندە قاراعاندىدا – 0,7%-عا، كوكشەتاۋ مەن وسكەمەندە – 0,5%-عا، قوناەۆتا – 0,4%-عا، جەزقازعان مەن تالدىقورعاندا – 0,3%-عا تومەندەدى.

استانا، شىمكەنت، اقتوبە، ورال، پاۆلودار، پەتروپاۆل جانە سەمەي قالالارىندا باعالار الدىڭعى اپتا دەڭگەيىندە ساقتالدى.

رەسپۋبليكا بويىنشا پيازدىڭ ورتاشا باعاسى 1 كيلوگرامىنا 188 تەڭگەنى قۇرادى. بۇل رەتتە ەڭ تومەن باعا تۇركىستان قالاسىندا – 135 تەڭگە دەڭگەيىندە تىركەلدى.

كارتوپتىڭ رەسپۋبليكا بويىنشا ورتاشا باعاسى 1 كيلوگرامىنا 248 تەڭگەنى قۇرادى. ەڭ قولجەتىمدى باعا پاۆلوداردا – 180 تەڭگە، تۇركىستاندا – 218 تەڭگە دەڭگەيىندە قالىپتاستى.

ەل بويىنشا المانىڭ ورتاشا باعاسى 1 كيلوگرامىنا 776 تەڭگەنى قۇرادى. ەڭ تومەن باعا شىمكەنت قالاسىندا – 639 تەڭگە دەڭگەيىندە تىركەلدى.

وسىعان دەيىن قازاقستاننىڭ ەۋرازيانىڭ ازىق-تۇلىك حابىنا اينالىپ كەلە جاتقانى تۋرالى جازدىق.

Abai.kz