قازاقستاندا ءدىني ءبىلىمسىز ءوز بەتىنشە ۇلتتىق داستۇرگە تىيىم سالاتىن پسەۆدويمامدار مەن بلوگەرلەردىڭ ارەكەتىنە زاڭ شەڭبەرىندە قاتاڭ جاۋاپ بەرىلمەك. بۇل تۋرالى مادەنيەت جانە اقپارات ۆيتسە-ءمينيسترى قانات ىسقاقوۆ مالىمدەدى.

ۆيتسە-ءمينيستردىڭ ايتۋىنشا، ەلىمىزدىڭ زاڭناماسىندا «ءدىني ناسيحات» دەگەن ۇعىم جوق، الايدا قوعامنىڭ بەرەكەسىن الاتىن راديكالدى جانە ەكسترەميستىك يدەولوگيانى تاراتۋعا تىيىم سالىنعان.

سوڭعى ۋاقىتتا الەۋمەتتىك جەلىلەردە دومبىرانى «حارام»، ناۋرىزدى «كۇنا» دەپ جاريالاپ، ۇلتتىق قۇندىلىقتارعا قارسى شىعىپ جۇرگەن ادامدار كوبەيدى. قانات ىسقاقوۆ مۇنداي ارەكەتتەردى ناعىز پسەۆدودىنشىلدىك دەپ اتادى.

«پسەۆدودىنشىلدىك دەگەن نە؟ بۇل ومىرىندە قۇراندى وقىماعان، ءدىني ءبىلىمى جوق ادامداردىڭ ويدان شىعارعان تىيىمدارى. دومبىرانى حارام، ناۋرىزدى كۇنا دەپ ايتۋ تازا پسەۆدودىنشىلدىك. ناۋرىزدى جوققا شىعارعان ادام اكىمشىلىك جازاعا تارتىلدى»، – دەدى ول.

ۆيتسە-مينيستر جاقىندا ەلدى شۋلاتقان «ايەلىن شاكىرتىنە سىيلادى» دەگەن مالىمدەمە اۆتورى دا اكىمشىلىك جاۋاپكەرشىلىككە تارتىلىپ، ايىپپۇل سالىنعانىن راستادى. الايدا سول سۇحباتتى جۇرگىزگەن ءجۋرناليستىڭ جازالانۋىنا قاتىستى مينيسترلىك ارالاسا المايتىنىن اتاپ ءوتتى.

«ول كىسى ايەلىن سىيعا تارتۋ تۋرالى مالىمدەمەسى ءۇشىن اكىمشىلىك جاۋاپقا تارتىلىپ، ايىپپۇل تولەدى. ال سۇحبات العان جۋرناليستكە قاتىستى ماسەلەنى ءبىز بىلەمىز، قازىر تەكسەرىپ جاتىرمىز. بىراق سوتتىڭ ىسىنە ارالاسۋعا قۇقىمىز جوق، سوندىقتان وعان پىكىر بىلدىرە المايمىن»، – دەدى ىسقاقوۆ.

ول سونداي-اق الەۋمەتتىك جەلىدە تاراعان TikTok پەن Reels-تەگى ۆيدەولارعا دا جەكە توقتالدى. بۇل روليكتەردە ءوزىن يمام دەپ تانىستىرعان ازاماتتار قازاقستاندىق قىز-كەلىنشەكتەردى باسىنا ورامال تاقپاعانى ءۇشىن سىنعا الىپ، قوعام الدىندا قورلاپ، ايىپتاپ كەلگەن بولاتىن.

مينيسترلىك وكىلى مۇنداي ارەكەتتەر زاڭ بۇزۋشىلىق بولىپ سانالاتىنىن جانە ونىڭ جاۋاپكەرشىلىگى اۋىر ەكەنىن ەسكەرتتى.

«مۇنداي ادامداردى بۇعان دەيىن جاۋاپقا تارتتىق، الداعى ۋاقىتتا دا بۇل جۇمىستار جالعاسادى. ولار تاراتقان اقپارات جالعان، قوعامدا ءدىني جانە الەۋمەتتىك ارازدىقتى قوزدىرۋعا باعىتتالعان. بۇل زاڭ بۇزۋشىلىق بولىپ تابىلادى جانە مىندەتتى تۇردە جازاسىن الادى. مينيسترلىك مۇنداي ارەكەتتەردىڭ الدىن الۋ جانە جولىن كەسۋ ءۇشىن ءتيىستى شارالاردى تۇراقتى جۇرگىزەدى»، – دەدى قانات ىسقاقوۆ.

Abai.kz