استانادا بولاشاق دارىگەرلەردىڭ قۇقىقتىق ساۋاتىن ارتتىرۋعا باعىتتالعان كەزدەسۋ ءوتتى. ستۋدەنتتەرگە كونستيتۋتسيا تالاپتارى ءتۇسىندىرىلىپ، زاڭدى ءبىلۋ تەك تەوريا ەمەس، كاسىبي قاجەتتىلىك ەكەنى ايتىلدى.
ءىس-شارا استانا مەديتسينا ۋنيۆەرسيتەتى بازاسىندا ۇيىمداستىرىلدى. نەگىزگى ماقسات - ستۋدەنتتەردىڭ قۇقىقتىق مادەنيەتىن قالىپتاستىرۋ جانە اتا زاڭ نورمالارىن كۇندەلىكتى تاجىريبەمەن ۇشتاستىرۋ.
گۇلميرا بازاروۆا، استانا مەديتسينا ۋنيۆەرسيتەتى سوت مەديتسيناسى جانە قۇقىق كافەدراسىنىڭ اعا وقىتۋشىسى: "سوڭعى جىلدارى ءبىزدىڭ ۋنيۆەرسيتەتتە سوت مەديتسيناسى جانە قۇقىق كافەدراسى جۇمىس ىستەپ كەلەدى. بۇل كافەدرانىڭ ماڭىزى وتە جوعارى. سەبەبى مەديتسينا قىزمەتكەرلەرى تەك ەمدەۋ ءىسىن عانا ەمەس، زاڭدى دا جاقسى ءبىلۋى كەرەك.
وكىنىشكە قاراي، مەكتەپتەن كەلگەن قۇقىقتىق ءبىلىم كوبىنە فورمالدى دەڭگەيدە بولادى. سول سەبەپتى ءبىز ستۋدەنتتەرمەن تۇراقتى جۇمىس جۇرگىزىپ كەلەمىز.
ءبىزدىڭ ماقسات - تەك كونستيتۋتسيا نورمالارىن ءتۇسىندىرۋ ەمەس، قۇقىقتىق مادەنيەتتى قالىپتاستىرۋ. سونىمەن قاتار "زاڭ مەن ءتارتىپ" جوباسى اياسىندا ارنايى كەڭەس بەرۋ كابينەتى اشىلدى. وندا ستۋدەنتتەر كەز كەلگەن قۇقىقتىق ماسەلە بويىنشا كومەك الا الادى.
سونىمەن قاتار، ول ستۋدەنتتەردىڭ قۇقىقتىق ساۋاتتىلىعىن ارتتىرۋ ماقساتىندا تۇراقتى تۇردە كەزدەسۋلەر، اشىق دارىستەر جانە ءتۇسىندىرۋ ساباقتارىنىڭ ۇيىمداستىرىلاتىنىن ايتتى. بۇل جۇمىستار مەكتەپتەن كەيىن ۋنيۆەرسيتەتكە كەلگەن جاستاردىڭ قۇقىقتىق بىلىمىندەگى ولقىلىقتاردى تولىقتىرۋعا باعىتتالعان", - دەيدى ول.
كەزدەسۋگە ستۋدەنتتىك ۇيىم جەتەكشىلەرى دە قاتىسىپ، قۇقىقتىق ساۋاتتىلىقتى ارتتىرۋ بويىنشا ۇسىنىستارىن ءبىلدىردى. ولار مۇنداي اشىق فورماتتاعى كەزدەسۋلەردىڭ تۇراقتى ءوتۋى قاجەت ەكەنىن ايتادى.
"كەيبىر قۇقىقتىق نورمالاردى بۇرىن تەك تەوريا رەتىندە قابىلدايتىنبىز. بۇگىن ناقتى مىسالدار ارقىلى ءتۇسىندىرۋ الدەقايدا تۇسىنىكتى بولدى", - دەيدى ستۋدەنتتەر.
ماسەلەن، استانا مەديتسينا ۋنيۆەرسيتەتىنىڭ 3-كۋرس ستۋدەنتى نافيسا سايداقباروۆانىڭ ايتۋىنشا، زاڭدى ءبىلۋ - تەك ەمتيحان ءۇشىن ەمەس، كۇندەلىكتى ءومىر ءۇشىن دە وتە ماڭىزدى. "وسىنداي كەزدەسۋلەر ءجيى وتسە، قۇقىقتىق تۇسىنىگىمىز ودان ءارى تەرەڭدەيدى", - دەيدى ول.

مامانداردىڭ ايتۋىنشا، قۇقىقتىق ساۋات تەك دارىستە ەمەس، تاجىريبەدە قالىپتاسادى. سوندىقتان مۇنداي اشىق فورماتتاعى كەزدەسۋلەر بولاشاق دارىگەرلەردىڭ قۇقىقتىق مادەنيەتىن ارتتىرۋدا ماڭىزدى ءرول اتقارادى.
سونىمەن قاتار مۇنداي فورماتتاعى تالقىلاۋلاردىڭ وقۋ ورداسىندا ءبىر رەتتىك شارا ەمەس، سوڭعى جىلدارى تۇراقتى جۇرگىزىلەتىن جۇيەلى جۇمىس ەكەنىن ەسكەرسەك، تاجىريبەنى تەك ءبىر ۋنيۆەرسيتەتپەن شەكتەمەي، وزگە وقۋ ورىندارى دا ەنگىزسە - ستۋدەنتتەردىڭ قۇقىقتىق ساۋاتى ارتىپ، قۇقىقتىق مادەنيەت جۇيەلى تۇردە قالىپتاسار ەدى. مەملەكەتتىڭ دامۋى ءار ازاماتىنىڭ ءوز قۇقىعىنىڭ قورعالىپ، جاۋاپكەرشىلىگىن سەزىنە بىلۋىندە ەمەس پە؟!

Abai.kz