سادىر جاپاروۆ مۇحتار شاحانوۆتىڭ قازاسىنا بايلانىستى كوڭىل ايتتى. 

قىرعىز رەسپۋبليكاسىنىڭ پرەزيدەنتى سادىر جاپاروۆ قازاقستان پرەزيدەنتى قاسىم-جومارت توقاەۆقا كورنەكتى اقىن، قوعام قايراتكەرى مۇحتار شاحانوۆتىڭ دۇنيەدەن وتۋىنە بايلانىستى كوڭىل ايتۋ جەدەلحاتىن جولدادى. قىرعىز باسشىسى بۇل حاباردى بۇكىل تۇركى الەمى ءۇشىن اۋىر شىعىن جانە «تۇتاس ءبىر ءداۋىردىڭ اياقتالۋى» دەپ باعالادى.

سادىر جاپاروۆ ءوز جەدەلحاتىندا مۇحتار شاحانوۆتىڭ تەك قازاق حالقىنىڭ عانا ەمەس، قىرعىز جۇرتىنىڭ دا «اسقار تاۋى» بولعانىن ەرەكشە اتاپ ءوتتى.

«قىرعىز حالقى دا ءوز رۋحىنىڭ تىرەگىنەن ايىرىلىپ، قابىرعاسى قايىسىپ وتىر. مۇنداي تۇلعالاردىڭ ومىردەن ءوتۋىن ءبىزدىڭ حالىقتا «تۇتاس ءبىر ءداۋىر كەتتى» دەپ ايتادى»، — دەلىنگەن قۇجات ماتىنىندە.

قىرعىز پرەزيدەنتى اقىننىڭ قازاقستاننىڭ قىرعىزستانداعى تۇڭعىش ەلشىسى رەتىندەگى ەڭبەگىن جانە الەمدىك دەڭگەيدەگى جازۋشى شىڭعىس ايتماتوۆپەن باۋىرلاستىق قارىم-قاتىناسىن جوعارى باعالادى.

ول شاحانوۆتى «قىرعىزستاننىڭ حالىق اقىنى» دەپ اتاپ، ونىڭ «جەلتوقسان» وقيعاسى كەزىندەگى باتىلدىعى مەن شىندىقتى ايتۋدان تايسالمايتىن «كوكجال مىنەزىن» ەسكە الدى.

مۇحتار شاحانوۆتىڭ قازاسى تۇركى دۇنيەسىنىڭ بىرلىگى مەن دوستىعىنا ەلەۋلى ۇلەس قوسقان قايراتكەردىڭ قوشتاسۋى رەتىندە قابىلداندى.

جاپاروۆ ءوز ءسوزىن «بەلدى بەكەم بۋىپ، قايرات قىلىڭىزدار، باۋىرلاس قازاق حالقى!» دەگەن ۇندەۋمەن اياقتادى.

Abai.kz