ەۋروپاداعى اكتيۆتەر

Telegram-داعى «ۆىحود ك موريۋ» ارناسىنىڭ مالىمەتىنشە، اسلان مۋسين وتباسىنىڭ ۆەنا قالاسىنداعى پاتەرى Mondscheingasse (قازاقشا «اي ساۋلەسى اللەياسى») كوشەسىندە ورنالاسقان. بۇل جەر ۆەنا وپەراسى، راتۋشا جانە مۋزەي كۆارتالىنا جاياۋ جەتەتىن قاشىقتىقتا.

جىلجىمايتىن مۇلىك Bazantner GmbH اتىنا تىركەلگەن. قارجىلىق ەسەپتەرگە قاراعاندا، بۇل – كومپانيانىڭ جالعىز اكتيۆى. كومپانيانى سەرگەي كۋشەنوۆ باسقارادى، ول مۋسيندەر اۋلەتىنىڭ شەتەلدەگى جوبالارىنداعى كوپتەن بەرگى سەرىكتەسى سانالادى.

زەرتتەۋدە كورسەتىلگەندەي، Bazantner GmbH بولگارلىق Arkentum ارقىلى ءباا-ءنىڭ راس-ەل-حايما ەميراتىندا تىركەلگەن UNCIA قورىنا تيەسىلى. بۇل قور ءمۋسيننىڭ ۇلى ساۋرانبەك پەن ونىڭ جيەنى انۋاربەكپەن بايلانىستى دەپ ايتىلادى. ولار وتباسىنىڭ لاتۆيا مەن بولگارياداعى نەگىزگى اكتيۆتەرىن دە باسقارادى.

شەتەلدەگى اكتيۆتەر تەك اۆستريامەن شەكتەلمەيدى. لاتۆيادا ولاردىڭ جالپى قۇنى 20 ملن ەۋرودان اساتىن مۇلىككە يە ەكەنى ايتىلادى. سونىڭ ىشىندە شامامەن 5,6 ملن ەۋروعا ساتىپ الىنعان ءىرى ريتەيل بيزنەسى بار.

بلوگاريانىڭ «التىن» ازاماتى

ءمۋسيننىڭ جۇبايى گۇلبانۋ ۇكىتايقىزى مەن ۇلى ساۋرانبەك بولگاريانىڭ «التىن» ازاماتتىعىن العان. ولار ينۆەستور رەتىندە راسىمدەلىپ، ءتىپتى جەرگىلىكتى سايلاۋلارعا، سونىڭ ىشىندە ەۋروپارلامەنت سايلاۋىنا قاتىسقانى ايتىلعان.

ال ءمۋسيننىڭ ءوزى 2020 جىلى چەرنوگوريانىڭ قۇرمەتتى ازاماتى اتانعان. كەيىن بۇل ەلدە «قۇرمەتتى پاسپورتتارعا» بايلانىستى تەكسەرىس باستالىپ، ونى پرەمەر ميلويكو سپايچ قولعا العان. بۇل تەكسەرىستەر بيزنەسمەن ناسەر رامايعا قاتىستى سالىقتان جالتارۋ ىسىمەن بايلانىستى بولعان. سول تىزىمدە رەسەيلىك تەلەجۇرگىزۋشى ەكاتەرينا اندرەەۆا دا اتالعان.

مۋسين كىم؟ 

اقتوبە وبلىسىنىڭ تۋماسى اسلان مۋسين نۇرسۇلتان نازارباەۆ كەزەڭىندە جوعارى مەملەكەتتىك قىزمەتتەردە بولعان. ول وبلىس اكىمى، ەكونوميكا ءمينيسترى، ءماجىلىس سپيكەرى، پرەزيدەنت اكىمشىلىگىنىڭ باسشىسى جانە ەسەپ كوميتەتىنىڭ توراعاسى قىزمەتتەرىن اتقاردى.

اسىرەسە پرەزيدەنت اكىمشىلىگىن باسقارعان كەزەڭى ونىڭ ىقپالى كۇشەيگەن ۋاقىت رەتىندە باعالانادى. سول كەزدە ونى بەيرەسمي تۇردە «سۇر كاردينال» دەپ اتاعان.

2017 جىلى مەملەكەتتىك قىزمەتتەن كەتكەننەن كەيىن ديپلوماتيالىق قىزمەتكە اۋىسىپ، بالقان ەلدەرىندە ەلشى بولدى.

سوڭعى جىلدارى ونىڭ ەسىمى بۇرىنعى ەليتا وكىلدەرىمەن بىرگە قايتا اتالىپ ءجۇر. ماسەلەن، ەكى جىل بۇرىن لوندوندا مۋسين مەن بەرگەي رىسقاليەۆتىڭ بىرگە تۇسكەن سۋرەتى تاراعان.

Abai.kz