تىكەلەي رەيس اشۋعا قاتىستى اقش-تىڭ تالاپتارى قاتاڭ.

قازاقستاننان اقش-قا تىكەلەي رەيستەردى ىسكە قوسۋ ءۇشىن بىرقاتار ماڭىزدى شارت ورىندالۋى قاجەت. بۇل تۋرالى Air Astana كومپانياسىنىڭ باسشىسى يبراحيم جانلىەل مالىمدەدى. ونىڭ سوزىنشە، قازىرگى تاڭدا نەگىزگى كەدەرگىنىڭ ءبىرى – ناقتى ءارى قولجەتىمدى اۋە باعىتىنىڭ بولماۋى.

يبراحيم جانلىەل اقش باعىتىنا رۇقسات الۋ پروتسەسى باسقا ەلدەرمەن سالىستىرعاندا كۇردەلىرەك ەكەنىن جەتكىزدى. ونىڭ سوزىنشە، امەريكا قۇراما شتاتتارى بۇل تۇرعىدا ەرەكشە تالاپتار قويادى.

كومپانيا باسشىسى تىكەلەي رەيستەر ءۇشىن پوليارلىق مارشرۋتتى پايدالانۋ مۇمكىندىگى دە ماڭىزدى فاكتور ەكەنىن اتاپ ءوتتى. ياعني ماسەلە تەك ۇشاقتىڭ تەحنيكالىق مۇمكىندىگىنە تىرەلمەيدى، سونىمەن بىرگە بەلگىلى ءبىر ەلدەردىڭ اۋە كەڭىستىگى ارقىلى ۇشۋ رۇقساتىنا دا بايلانىستى.

قازىر ناقتى ۋادە بەرىپ، مىندەت الا المايمىن. ويتكەنى بۇل تولىقتاي ءبىزدىڭ باقىلاۋىمىزداعى ماسەلە ەمەس، – دەدى ول.

يبراحيم جانلىەل بۇل جەردە سانكتسيالار ماسەلەسى مەن رەسەي فەدەراتسياسىنىڭ اۋماعى ارقىلى ۇشۋ مۇمكىندىگى شەشۋشى ءرول اتقاراتىنىن ايتتى. ەگەر وسى باعىتتاعى شەكتەۋلەر ساقتالسا، قازاقستاننان اقش-قا تىكەلەي رەيستەردى اشۋ مەرزىمى ءتىپتى كەيىنگە شەگەرىلۋى مۇمكىن.

بۇعان دەيىن قازاقستان مەن اقش اراسىندا نيۋ-يورك باعىتى بويىنشا تىكەلەي اۋە رەيسىن اشۋ ماسەلەسىنە قاتىستى اقش-تىڭ قازاقستانداعى ەلشىسى دجۋلي م. ستاففت تا پىكىر بىلدىرگەن ەدى.

Abai.kz