جەتىسۋ وبلىسىندا وتان قورعاۋشىلار كۇنىنە وراي ەلدىك رۋح پەن ەرلىك ۇعىمىن ۇلىقتاعان ەرەكشە مادەني جوبا جۇرت نازارىنا ۇسىنىلدى. جەتىسۋ وڭىرىندە اسكەري-پاتريوتتىق رۋحتى كوتەرۋ ماقساتىندا «بەيبىت ەلدىڭ قالقانى» اتتى مۋرالدىڭ سالتاناتتى اشىلۋ ءراسىمى ءوتتى. تاعىلىمى تەرەڭ تۋىندى قوعامدىق كەڭىستىكتى كوركەيتىپ قانا قويماي، جاس بۋىننىڭ جۇرەگىنە وتانسۇيگىشتىك رۋح دارىتۋدى كوزدەگەن مازمۇندى باستاماعا اينالدى.

تەگىندە، قابىرعاعا بەدەرلەنگەن ءاربىر بەينە مەن بوياۋدىڭ استارىندا ۋاقىتتىڭ ءۇنى، ەلدىڭ مۇراتى جاتادى. وسى رەتتە «كوكتەم» ىقشاماۋدانىنداعى ەڭسەلى مۋرال بەيبىتشىلىك پەن باتىرلىقتىڭ، سەرت پەن سەنىمنىڭ، ەلدىك پەن ەرلىكتىڭ كوركەم بەينەسىندەي اسەر قالدىرادى. وندا ءباھادۇر بابالاردىڭ ايبىنى، بۇگىنگى ساربازداردىڭ كەلبەتى مەن كەلەشەك ۇرپاقتىڭ جارقىن بەينەسى ساباقتاسىپ، حالىقتىڭ ازات رۋحى مەن بەيبىت كۇننىڭ قادىرى كورىنىس تاپقان.

ەرەكشە اتاپ وتەرلىگى، اتالمىش مۋرالدىڭ كوركەمدىك تۇجىرىمداماسى «Zhetisý jastary» كوممۋنالدىق مەملەكەتتىك مەكەمەسىنىڭ باستاماسىمەن جاساندى ينتەللەكت تەحنولوگياسى ارقىلى ازىرلەنگەن. زاماناۋي تسيفرلىق مۇمكىندىكتەر مەن ۇلتتىق رۋحتى ساباقتاستىرعان تىڭ جوبا ءۇش كۇن ىشىندە جۇزەگە اسقان. قىسقا مەرزىمدە بوي كوتەرگەن اۋقىمدى تۋىندى شاھار كەلبەتىنە جاڭا سيپات بەرىپ، قوعامدىق ورتاعا سونى تىنىس اكەلدى.

جوبانىڭ باستى ماقساتى – جاستار اراسىندا اسكەري-پاتريوتتىق تاربيەنى نىعايتۋ، ەلگە دەگەن سۇيىسپەنشىلىكتى ارتتىرۋ جانە اسكەري قىزمەتتىڭ ماڭىزىن كەڭىنەن ناسيحاتتاۋ. سونىمەن قاتار بەيبىت ءومىردىڭ قادىرىن ۇعىندىرىپ، ەل تىنىشتىعىن كۇزەتىپ تۇرعان ازاماتتاردىڭ ەڭبەگىن دارىپتەۋ ارقىلى جاس ۇرپاقتىڭ بويىندا جاۋاپكەرشىلىك پەن ازاماتتىق ۇستانىمدى قالىپتاستىرۋ كوزدەلگەن.

سالتاناتتى راسىمگە جەتىسۋ وبلىسىنىڭ قورعانىس ىستەرى جونىندەگى دەپارتامەنتىنىڭ باستىعى، پولكوۆنيك مەدەت تۇرىسكەلديەۆ پەن «Zhetisý jastary» كمم ديرەكتورىنىڭ مىندەتىن اتقارۋشى ارناي بايجۋرىنوۆ قاتىستى. شارا بارىسىندا قوناقتار مۋرالدىڭ كوركەمدىك مازمۇنىمەن تانىسىپ، جوبانىڭ جۇزەگە اسىرىلۋ بارىسى جونىندە پىكىر الماستى. ءىس-شاراعا جاستار، قوعام بەلسەندىلەرى، شىعارماشىلىق ورتا  وكىلدەرى جانە قالا تۇرعىندارى قاتىستى.

جيىندا ءسوز العان مەدەت بولاتۇلى مۋرالدىڭ تەرەڭ مازمۇنىنا توقتالدى.

– بۇل مۋرالدا باتىرلاردىڭ ءۇش كەزەڭى بەينەلەنگەن. حالقىمىزدىڭ اسىل قۇندىلىعى، بەيبىت ءومىردىڭ كوركەم تۋىندىسى دەپ سانايمىن. مۇنداي دۇنيەلەر جاس ۇرپاقتى پاتريوتتىق سەزىمگە باۋليدى. سەبەبى ەل تاريحىن، باتىر بابالاردىڭ ەرلىگىن ونەر ارقىلى كورسەتۋ – ۇلت رۋحىن كوتەرۋدىڭ ءبىر جولى، – دەدى ول.

ال ارناي راقىمبەردىۇلى مۇنداي باستامالاردىڭ قوعام ءۇشىن ماڭىزى زور ەكەنىن اتاپ ءوتتى.

– بۇگىنگى جاس بۋىننىڭ ساناسىنا ەلدىك رۋح پەن وتانسۇيگىشتىك قاسيەتتى ءسىڭىرۋ – بارشامىزعا ورتاق مىندەت. «بەيبىت ەلدىڭ قالقانى» مۋرالى سول ماقساتقا باعىتتالعان تاعىلىمدى جوبالاردىڭ ءبىرى. قازىرگى جاستار تەحنولوگيا داۋىرىندە ءوسىپ كەلەدى. سوندىقتان ۇلتتىق قۇندىلىقتاردى ناسيحاتتاۋدا زاماناۋي تاسىلدەردى پايدالانۋ اسا ماڭىزدى. وسى ورايدا جاساندى ينتەللەكت ارقىلى ازىرلەنگەن بۇل تۋىندى – شىعارماشىلىق پەن تەحنولوگيانىڭ ۇندەسكەن كورىنىسى. مۇنداي باستامالار جاستاردى ونەرگە جاقىنداتىپ قانا قويماي، ولاردىڭ ەلگە، جەرگە دەگەن قۇرمەتىن ارتتىرادى. بەيبىت ءومىردىڭ قادىرىن سەزىنۋ، وتان الدىنداعى جاۋاپكەرشىلىكتى ۇعىنۋ – ناعىز ازاماتتىقتىڭ بەلگىسى. ءبىز اسكەري قىزمەتشىلەردىڭ ەڭبەگىن دارىپتەۋ ارقىلى وسكەلەڭ ۇرپاقتىڭ بويىندا قايسارلىق پەن ادالدىق قاسيەتتەرىن قالىپتاستىرۋدى كوزدەيمىز. الداعى ۋاقىتتا دا وسىنداي جوبالار جالعاسىن تابۋى كەرەك. ەلگە قىزمەت ەتۋ – تەك قارۋ اسىنىپ شەكارا كۇزەتۋ ەمەس، حالىقتىڭ رۋحىن كوتەرۋ، قوعامدىق سانانى جاڭعىرتۋ، جاستارعا دۇرىس باعىت كورسەتۋ، – دەدى ول.

Abai.kz