الماتى جىل بويى جۇمىس ىستەيتىن تاۋ ءتۋريزمى ورتالىعىنا اينالۋى مۇمكىن. الماتى قالاسىندا «الماتىباسجوسپارى» عزي الاڭىندا ەلىمىزدەگى ەڭ ءىرى تۋريستىك ينفراقۇرىلىمدىق جوبالاردىڭ ءبىرى – الماتى تاۋ كلاستەرى مەن «Almaty Superski» جوباسىنىڭ دامۋ پەرسپەكتيۆالارىنا ارنالعان كەڭەس ءوتتى. ءىس-شارانى «اتامەكەن» قازاقستان رەسپۋبليكاسى ۇلتتىق كاسىپكەرلەر پالاتاسى ۇيىمداستىردى. 

سۋرەت: شارا ۇيىمداستىرۋشىلارىنان الىندى.

تالقىلاۋعا «اتامەكەن» ۇكپ تورالقا توراعاسى قانات شارلاپاەۆ، الماتى قالاسى اكىمىنىڭ ورىنباسارى نۇرلان ءابدىراحىم، Kazakh Tourism Development باس اتقارۋشى ديرەكتورى ەرجان ەركىنباەۆ، تۋريزم جانە سپورت ۆيتسە-ءمينيسترى باۋىرجان راپيكوۆ، ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى دانيار تۇرعامباەۆ، وڭىرلىك جانە سالالىق كەڭەستەردىڭ، سالالىق قاۋىمداستىقتاردىڭ، بيزنەس قاۋىمداستىقتاردىڭ وكىلدەرى، سونداي-اق ساراپشىلار مەن جوبا ازىرلەۋشىلەرى قاتىستى. بۇل كەڭەس ءىس-شاراعا قاتىسۋشىلاردىڭ باسىن قوسىپ، ءوڭىردىڭ تاۋ تۋريستىك ينفراقۇرىلىمىنىڭ بولاشاعىنا ارنالعان كاسىبي ديالوگ الاڭىنا اينالدى.

سۋرەت: شارا ۇيىمداستىرۋشىلارىنان الىندى.

«اتامەكەن» ۇكپ تورالقا توراعاسى قانات شارلاپاەۆ ءوز سوزىندە تاۋ كلاستەرىن دامىتۋعا جۇيەلى ءتاسىل قاجەت ەكەنىن اتاپ ءوتىپ، ونىڭ ەل ەكونوميكاسى مەن تۋريزم سالاسىنىڭ ۇزاقمەرزىمدى دامۋى ءۇشىن ستراتەگيالىق ماڭىزىن ەرەكشە ايتتى. اتاپ ايتقاندا، ول: «الماتى تاۋ كلاستەرىن دامىتۋ – جاي عانا ينفراقۇرىلىمدىق جوبا ەمەس، ءتۋريزمنىڭ، بيزنەستىڭ جانە جۇمىسپەن قامتۋدىڭ تۇراقتى ءوسىمىن قامتاماسىز ەتە الاتىن جاڭا ەكونوميكالىق مودەل قالىپتاستىرۋ. الماتىنىڭ كاسىپكەرلىكتىڭ باستى ورتالىعى ءارى ورتالىق ازياداعى تۋريستەردى تارتاتىن نەگىزگى نۇكتە رەتىندەگى مارتەبەسىن نىعايتۋ قاجەت»، – دەدى پالاتا باسشىسى.

كەڭەس بارىسىندا الماتى قالاسى تۋريزم باسقارماسىنىڭ باسشىسى عاليا توقسەيتوۆا الماتى تاۋ كلاستەرىن دامىتۋ تۇجىرىمداماسىن تانىستىردى. جوبا بىرىڭعاي ءوزارا بايلانىسقان ينفراقۇرىلىم قالىپتاستىرۋدى، جىل بويعى تۋريستىك ۇسىنىستاردى دامىتۋدى، سەرۆيس پەن قاۋىپسىزدىك دەڭگەيىن ارتتىرۋدى، سونداي-اق ءارتۇرلى رەكرەاتسيالىق ايماقتاردى ورتاق جۇيەگە بىرىكتىرۋدى كوزدەيدى.

تالقىلاۋدىڭ نەگىزگى ەلەمەنتتەرىنىڭ ءبىرى – «Almaty Superski» جوباسى. جوبا حالىقارالىق دەڭگەيدەگى زاماناۋي جىل بويعى تۋريستىك ينفراقۇرىلىم قالىپتاستىرۋعا جانە الماتىنى ورتالىق ازياداعى تاۋ ءتۋريزمىنىڭ ورتالىعى رەتىندە دامىتۋعا باعىتتالعان.

ۇسىنىلعان ماتەريالدارعا سايكەس، جوبا اياسىندا 1022 گەكتار اۋماقتا ينفراقۇرىلىمدى دامىتۋ، 17 اسپالى كوتەرگىش سالۋ، ءارتۇرلى كۇردەلىلىك دەڭگەيىندەگى 60 شاقىرىمنان استام شاڭعى تراسساسىن جاساۋ، سونداي-اق كولەمى 20 گەكتار بولاتىن زاماناۋي تاۋ اۋىلىن سالۋ جوسپارلانعان. ال الماتى تاۋ كلاستەرىن دامىتۋدىڭ جالپى تۇجىرىمداماسى 30-عا دەيىن اسپالى جول سالۋدى، جالپى ۇزىندىعى شامامەن 151 شاقىرىم بولاتىن تاۋ شاڭعىسى تراسسالارىن دامىتۋدى جانە تاۋلىكتىك قامتۋ قابىلەتىن 30 مىڭ ادامعا دەيىن ارتتىرۋدى قامتيدى.

سۋرەت: شارا ۇيىمداستىرۋشىلارىنان الىندى.

جوبانىڭ جىل بويى پايدالانۋعا باعىتتالعانى ەرەكشە اتاپ ءوتىلدى. قىسقى تۋريزمنەن بولەك، حايكينگ باعىتتارىن، ۆەلوجولداردى، ماۋنتينبايك ينفراقۇرىلىمىن دامىتۋ، زاماناۋي ۆيزيت-ورتالىقتار قۇرۋ جانە تاۋدا بىرىڭعاي قاۋىپسىزدىك جۇيەسىن قالىپتاستىرۋ قاراستىرىلعان.

پرەزەنتاتسيا بارىسىندا جوبا ازىرلەۋشىلەرى ەكولوگيالىق تۇراقتىلىق ماسەلەسىنە ەرەكشە نازار اۋداردى. جوبانى دايىنداۋ كەزىندە ەكولوگيا، گيدرولوگيا، زوولوگيا، توپىراقتانۋ جانە تابيعاتتى تۇراقتى پايدالانۋ سالالارىنداعى عىلىمي ينستيتۋتتار مەن ساراپشىلارمەن بىرلەسكەن جۇيەلى جۇمىس جۇرگىزىلىپ جاتقانى ايتىلدى. ۇسىنىلعان تاسىلدەر تۋريستىك اعىنداردى باسقارۋدى، ۇيىمداستىرىلعان ينفراقۇرىلىمدى دامىتۋدى جانە تاۋ ەكوجۇيەسىنە تۇسەتىن انتروپوگەندىك جۇكتەمەنى ازايتۋدى كوزدەيدى. بۇل ءتۋريزمدى دامىتۋ مەن ءوڭىردىڭ تابيعي ورتاسىن ساقتاۋ اراسىنداعى تەپە-تەڭدىكتى قامتاماسىز ەتۋگە مۇمكىندىك بەرەدى.

«Almaty Superski – الماتى ءتۋريزمىن جاڭا دەڭگەيگە كوتەرۋگە ءتيىس ستراتەگيالىق جوبا. بۇل تەك تاۋ كۋرورتىن سالۋ ەمەس، حالىقارالىق دەڭگەيدەگى زاماناۋي جىل بويعى تۋريستىك ەكوجۇيە قۇرۋ بارىسىنداعى باستاما. قازاقستان ءۇشىن بۇل تۋريستەردى، ينۆەستيتسيالاردى تارتاتىن جانە حالىقارالىق سپورتتىق ءىس-شارالاردى وتكىزۋگە مۇمكىندىك بەرەتىن جاڭا ورتالىق قالىپتاستىرۋ ءتاسىلى. كۋرورت كەڭىستىگى جاسىنا جانە فيزيكالىق مۇمكىندىگىنە قاراماستان، ءار ادامعا قولجەتىمدى ءارى ىڭعايلى بولادى»، – دەپ اتاپ ءوتتى Kazakh Tourism Development باس اتقارۋشى ديرەكتورى ەرجان ەركىنباەۆ.

تالقىلاۋدىڭ ەلەۋلى بولىگى جوبانى جۇزەگە اسىرۋدىڭ الەۋمەتتىك-ەكونوميكالىق اسەرىنە ارنالدى. ۇسىنىلعان باعالاۋلارعا سايكەس، 2028 جىلعا قاراي ىشكى تۋريستەر سانى 1,7 ملن ادامنان 3,4 ملن ادامعا دەيىن، ال شەتەلدىك تۋريستەر سانى 600 مىڭنان 2,5 ملن ادامعا دەيىن ءوسۋى مۇمكىن. بۇل ءوز كەزەگىندە تۋريزم سالاسىنداعى جۇمىسپەن قامتۋدى 89,4 مىڭ ادامنان 119 مىڭ ادامعا دەيىن ارتتىرۋعا جانە سالىق تۇسىمدەرىن 91,5 ملرد تەڭگەدەن 185,9 ملرد تەڭگەگە دەيىن ۇلعايتۋعا مۇمكىندىك بەرەدى.

كەڭەسكە قاتىسۋشىلار سوڭعى جىلدارى ورتالىق ازيا ەلدەرى تاۋ تۋريستىك ينفراقۇرىلىمىن دامىتۋعا بەلسەندى ينۆەستيتسيا سالىپ جاتقانىن دا اتاپ ءوتتى. وزبەكستان مەن قىرعىزستانداعى زاماناۋي كۋرورتتار تۇراقتى تۋريستىك اعىن قالىپتاستىرىپ، شەتەلدىك قوناقتاردى تارتاتىن ورتالىقتارعا اينالىپ كەلەدى. وسى تۇرعىدا الماتىنىڭ ءىرى تۋريستىك ءارى كولىك حابى رەتىندەگى الەۋەتىن ەسكەرە وتىرىپ، قازاقستاندا دا وسىنداي ينفراقۇرىلىمدى جەدەل دامىتۋ قاجەتتىگى تىلگە تيەك ەتىلدى.

كەزدەسۋگە قاتىسۋشىلاردىڭ پىكىرىنشە، الماتى تاۋ كلاستەرىن دامىتۋ شاعىن جانە ورتا بيزنەس ءۇشىن ماڭىزدى درايۆەرگە اينالىپ، قوناقجايلىلىق، قوعامدىق تاماقتانۋ، كولىك، سەرۆيستىك قىزمەتتەر مەن تسيفرلىق شەشىمدەر سالاسىندا جاڭا مۇمكىندىكتەر اشادى. سونىمەن قاتار جوبا ەكونوميكانى ءارتاراپتاندىرۋ جانە شيكىزاتتىق ەمەس سالالاردى دامىتۋ جونىندەگى مەملەكەتتىك باسىمدىقتارعا سايكەس كەلەدى.

سونىمەن بىرگە قاتىسۋشىلار مۇنداي ينفراقۇرىلىمدىق باستامالاردى جۇزەگە اسىرۋ قوعامدىق تالقىلاۋمەن قاتار جۇرەتىنىن اتاپ ءوتتى. وسىعان بايلانىستى اۋماقتى دامىتۋ بارىسىندا ەكونوميكالىق، ەكولوگيالىق جانە الەۋمەتتىك اسپەكتىلەردى ەسكەرەتىن تەڭگەرىمدى ءتاسىلدىڭ ماڭىزدىلىعى ايتىلدى.

جالپى، كەزدەسۋ الماتى تاۋ كلاستەرىن الماتىنىڭ ينۆەستيتسيالىق تارتىمدىلىعىن ارتتىرۋعا، جاڭا جۇمىس ورىندارىن قۇرۋعا جانە قازاقستاننىڭ حالىقارالىق تۋريستىك نارىقتاعى پوزيتسياسىن نىعايتۋعا قابىلەتتى ۇزاقمەرزىمدى جوبا رەتىندە دامىتۋ پەرسپەكتيۆالارى جونىندەگى ورتاق تۇسىنىك قالىپتاستىرۋعا مۇمكىندىك بەردى.

Abai.kz