كونستيتۋتسيالىق سوتقا اسكەري قىزمەتشىلەرگە ەڭبەك سىڭىرگەن جىلدارى ءۇشىن زەينەتاقى تاعايىنداۋ شارتتارىن بەلگىلەيتىن الەۋمەتتىك كودەكس نورماسىنىڭ كونستيتۋتسياعا سايكەستىگىن تەكسەرۋ تۋرالى ءوتىنىش كەلىپ ءتۇستى.

ءوتىنىش جاساۋعا 26 جىلدان استام ەڭبەك سىڭىرگەن، بىراق تەرىس سەبەپتەرمەن اسكەري قىزمەتتەن بوساتىلعان بۇرىنعى اسكەري قىزمەتشىگە زەينەتاقى تاعايىنداۋدان باس تارتۋ نەگىز بولدى. بارلىق سوت ساتىلارى بۇل باس تارتۋدى زاڭدى دەپ تانىدى.

ءوتىنىش يەسى قاجەتتى ەڭبەك سىڭىرگەن جىلدارى بولا تۇرا، زەينەتاقى تاعايىنداۋ ءۇشىن شەكتى جاسقا جەتۋ تالابىن قىزمەتتەن بوساتۋدىڭ وزگە نەگىزدەرىمەن سالىستىرعاندا ادىلەتسىز دەپ ەسەپتەيدى.

كونستيتۋتسيالىق سوت اسكەري زەينەتاقى ەكى شارت ساقتالعان جاعدايدا تاعايىندالاتىنىن ءتۇسىندىردى. بىرىنشىدەن، جەتكىلىكتى ەڭبەك سىڭىرگەن جىلدارىنىڭ بولۋى، ەكىنشىدەن قىزمەتتەن شەكتى جاسقا جەتۋىنە بايلانىستى بوساتىلۋى كەرەك. بۇل تالاپتار اسكەري قىزمەتتىڭ ەرەكشە قۇقىقتىق مارتەبەسى ەسكەرىلە وتىرىپ، زاڭمەن بەلگىلەنگەن.

كونستيتۋتسيالىق سوت ءارتۇرلى جاعدايلار ءۇشىن ءارتۇرلى تالاپتاردىڭ بەلگىلەنۋى، ەگەر ولاردىڭ اقىلعا قونىمدى ءارى زاڭدى نەگىزدەرى بولسا، وزدىگىنەن كەمسىتۋشىلىك بولىپ تابىلمايتىنىن اتاپ ءوتتى.

كونستيتۋتسيالىق سوت

Abai.kz