«التىن وردا – دالا وركەنيەتىنىڭ ۇلگىسى: تاريح، ارحەولوگيا، مادەنيەت، بىرەگەيلىك» اتتى حالىقارالىق سيمپوزيۋم اياسىندا قاتىسۋشىلار التىن وردانىڭ تاريحي مۇراسىنىڭ مادەني جادىنى قالىپتاستىرۋداعى، تاريحي سانانى نىعايتۋداعى جانە ورتالىق ەۋرازيا ەلدەرىندەگى گۋمانيتارلىق عىلىمدى دامىتۋداعى ماڭىزىن تالقىلادى.

پلەنارلىق وتىرىستا وزبەكستان عىلىم اكادەمياسىنىڭ پرەزيدەنتى شاۆكات ايۋپوۆ سيمپوزيۋم تاقىرىبىنىڭ تاريحي عىلىم ءۇشىن عانا ەمەس، ءوڭىر حالىقتارىنىڭ ورتاق وتكەنىن زەردەلەۋ تۇرعىسىنان دا ايرىقشا مانگە يە ەكەنىن اتاپ ءوتتى.

«التىن وردا – ورتاعاسىرلىق داۋىردەگى جاي عانا مەملەكەت ەمەس. بۇل – دالا مەن قالالاردى، كەرۋەن جولدارى مەن قولونەر ورتالىقتارىن توعىستىرعان كەڭ تاريحي كەڭىستىك. مۇندا كوشپەلى جانە وتىرىقشى وركەنيەتتەر ءوزارا ىقپالداسىپ، عاسىرلار بويى ورتالىق ەۋرازيانىڭ ساياسي، مادەني جانە ەتنيكالىق كەلبەتىن قالىپتاستىردى»، – دەدى ول.

شاۆكات ايۋپوۆتىڭ ايتۋىنشا، قازاقستان مەن وزبەكستان حالىقتارى ءۇشىن التىن وردا تاريحى ورتاق تاريحي تاعدىرمەن ساباقتاس. ول دەشتى قىپشاق كەڭىستىگىندە دالا جانە وازيستىك ايماقتاردىڭ ءوزارا ىقپالداستىعى ناتيجەسىندە ساياسي داستۇرلەر، شارۋاشىلىق جۇيەلەرى، تىلدىك جانە مادەني ورتاقتىق قالىپتاسقانىن اتاپ ءوتتى. بۇل ۇدەرىستەر ءوڭىر حالىقتارىنىڭ تاريحي بولمىسىنىڭ نەگىزىن قالادى.

باياندامادا التىن وردا مۇراسىن زەرتتەۋدە عىلىمي وبەكتيۆتىلىكتى ساقتاۋ قاجەتتىگىنە ەرەكشە نازار اۋدارىلدى. تاريح ەۋرازيا حالىقتارىنا ورتاق قۇندىلىق رەتىندە قاراستىرىلىپ، ءوزارا تۇسىنىستىك پەن مادەني ديالوگتى دامىتۋعا، وڭىرلىك ىنتىماقتاستىقتى نىعايتۋعا قىزمەت ەتۋى ءتيىس ەكەنى ايتىلدى.

تالقىلاۋ بارىسىندا التىن وردا ءداۋىرىنىڭ تاريحي تاجىريبەسىن زەردەلەۋ ورتالىق ەۋرازيا حالىقتارىنىڭ ءوزارا بايلانىسىن تەرەڭىرەك تۇسىنۋگە مۇمكىندىك بەرەتىنى جانە بىرلەسكەن عىلىمي زەرتتەۋلەر مەن اكادەميالىق ىنتىماقتاستىقتى دامىتۋعا جول اشاتىنى اتاپ ءوتىلدى.

Abai.kz