2026 جىلعى 2–3 ماۋسىم ارالىعىندا «قازاقستاننىڭ قولجازبا مۇراسى: ساقتاۋ، زەرتتەۋ جانە تسيفرلىق گۋمانيتاريستيكا» اتتى حالىقارالىق كونفەرەنتسيا وتەدى. اۋقىمدى عىلىمي ءىس-شارا قازاقستانداعى قولجازبا قورلارىن ساقتاۋ، ولاردى عىلىمي اينالىمعا ەنگىزۋ، تسيفرلىق فورماتقا كوشىرۋ جانە وسى سالاداعى حالىقارالىق ىنتىماقتاستىقتى نىعايتۋعا باعىتتالعان ماڭىزدى اكادەميالىق باستاما.

كونفەرەنتسيا باعدارلاماسىنا قازاقستان، تۇركيا، اقش، ۇلىبريتانيا، وزبەكستان، رەسەي، كۋبا جانە ازەربايجان سىندى سەگىز مەملەكەتتەن 50-دەن استام عالىمدار مەن سالالىق ساراپشى-ماماندار بايانداما جاسايدى. كونفەرەنتسياعا حارۆارد ۋنيۆەرسيتەتى، وكسفورد ۋنيۆەرسيتەتى، ينديانا ۋنيۆەرسيتەتى، تۇركيا قولجازبالار باسقارماسى، يسلام تاريحى، ونەرى جانە مادەنيەتىن زەرتتەۋ ورتالىعى (IRCICA), وزبەكستان عىلىم اكادەمياسىنىڭ عىلىمي ينستيتۋتتارى، ءال-فارابي اتىنداعى قازاق ۇلتتىق ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، Astana IT University, «عىلىم ورداسى» جانە قازاقستاننىڭ ۇلتتىق كىتاپحانالارى مەن ورتالىق ارحيۆتەرى قاتىسادى.

كونفەرەنتسيادا قازاقستان مەن ورتالىق ازياداعى قولجازبالار مۇراسىن كوپقىرلى تۇرعىدان قاراستىرۋعا باسىمدىق بەرىلەدى. باعدارلامادا ورتاعاسىرلىق مۇسىلمان ەڭبەكتەرىن عىلىمي اينالىمعا ەنگىزۋ، قازاق دالاسىنا قاتىستى اراب، پارسى جانە تۇركى دەرەكتەرىن تالداۋ، قازاقستانداعى اراب جازۋىنداعى قولجازبالاردىڭ تاقىرىپتىق جانە تاريحي ەرەكشەلىكتەرىن اشۋ سياقتى ماسەلەلەر قامتىلعان.

بۇعان قوسا، كونفەرەنتسيانىڭ بولەك ءبىر ۇلكەن باعىتى رەتىندە تسيفرلىق گۋمانيتاريستيكا مەن جاساندى ينتەللەكت تەحنولوگيالارىن قولدانۋ قاراستىرىلادى. Astana IT University زەرتتەۋشىلەرى شاعاتاي تىلىندەگى ماتىندەردى تانۋعا ارنالعان OCR جۇيەلەرى مەن تىلدىك مودەلدەر جاساۋ بويىنشا باياندامالار ۇسىنادى، شەتەلدىك ماماندار مەتريكا كىتاپتار مەن تاريحي قۇجاتتار كورپۋسى نەگىزىندە وپتيكالىق ءماتىن تانۋ مودەلدەرىن وقىتۋدىڭ عىلىمي‑پراكتيكالىق قىرلارىن تۇسىندىرەدى. اقش پەن ەۋروپا عالىمدارى اقش كىتاپحانالارىنداعى يسلام قولجازبالارى قورىمەن جۇمىس ىستەۋ، جىبەك جولى بويىنداعى جازبا مۇرالاردى تسيفرلاندىرۋ، ەلەكتروندى كاتالوگتار قۇرۋ تاجىريبەسىمەن بولىسەدى. بۇل باعىتتار ءداستۇرلى قولجازباتانۋدى دەرەكتەر عىلىمى جانە تسيفرلىق گۋمانيتاريستيكامەن ۇشتاستىرۋعا جاعداي جاسايدى.

كونفەرەنتسيامەن قوسا 4-10 ماۋسىمدا «قولجازباتانۋ جانە تسيفرلىق گۋمانيتاريستيكا» حالىقارالىق جازعى مەكتەبى ۇيىمداستىرىلادى.  جازعى مەكتەپكە قازاقستان، تۇركيا، اقش جانە جاپونيادان كەلگەن كەمىندە 14 جەتەكشى مامان مەن وقىتۋشى قاتىسادى. ولاردىڭ قاتارىندا توكيو شەت تىلدەرى ۋنيۆەرسيتەتىنىڭ، حارۆارد ۋنيۆەرسيتەتىنىڭ، تۇركيا قولجازبالار باسقارماسىنىڭ، IRCICA ورتالىعىنىڭ، ينديانا ۋنيۆەرسيتەتىنىڭ، ءال-فارابي اتىنداعى قازاق ۇلتتىق ۋنيۆەرسيتەتىنىڭ، ق.ا. ياساۋي اتىنداعى حالىقارالىق قازاق-تۇرىك-ۋنيۆەرسيتەتىنىڭ، ۇلتتىق كىتاپحانالار مەن «عىلىم ورداسى» رەستاۆراتسيا ورتالىقتارىنىڭ ساراپشىلارى بار.

جازعى مەكتەپ باعدارلاماسى بىرنەشە نەگىزگى مودۋلدەن تۇرادى. ءبىرىنشى مودۋل شاعاتاي ءتىلىن وقىتۋ ادىستەمەسىنە جانە شاعاتاي تىلىندەگى ماتىندەر كورپۋسىن قازاق زەرتتەۋلەرىمەن بايلانىستىرۋعا ارنالسا، ەكىنشى مودۋلدە تۇركى جانە يسلام قولجازبالارىنا قاتىستى كونسەرۆاتسيا، رەستاۆراتسيا جانە ءپاسسيۆتى ساقتاۋ تاجىريبەلەرى ۇيرەتىلەدى. ءۇشىنشى مودۋلدە اقش پەن تۇركيا كىتاپحانالارى مەن عىلىمي ورتالىقتارىنىڭ يسلام دەرەككوزدەرىمەن جۇمىس ىستەۋ مادەنيەتى، قولجازبالار مەن سيرەك كىتاپتاردى كاتالوگتاۋ، حالىقارالىق ستاندارتتارعا ساي سيپاتتاۋ تاجىريبەسى كورسەتىلەدى.

اتالعان ەكى ءىس-شارا قر عىلىم جانە جوعارى ءبىلىم مينيسترلىگىنىڭ ۆر28712621 «قازاقستاننىڭ قولجازبا مۇراسى: تىركەۋ، رەستاۆراتسيالاۋ، عىلىمي كاتالوگتاۋ، تسيفرلاندىرۋ جانە كەشەندى كوديكولوگيالىق زەرتتەۋلەر» اتتى  باعدارلامانى ىسكە اسىرۋ اياسىندا وتكىزىلىپ جاتىر.

كونفەرەنتسيا مەن جازعى مەكتەپتىڭ مەكەنجايى: الماتى ق.، شەۆچەنكو كوشەسى، 28

«عىلىم ورداسى» رمك، ۇلكەن كونفەرەنتسيا زالى مەن ورتالىق عىلىمي كىتاپحانانىڭ حالىقارالىق زالى

ۇيىمداستىرۋ كوميتەتى

Abai.kz