استانا، 19 ماۋسىم، ءماجىلىس ءۇيى. ءماجىلىس توراعاسى ەرلان قوشانوۆ قازاقستانعا جۇمىس ساپارىمەن كەلگەن پولشا رەسپۋبليكاسى سەناتىنىڭ مارشالى مالگوجاتا كيداۆا-بلونسكامەن كەزدەستى. تاراپتار پارلامەنتارالىق ىنتىماقتاستىقتى نىعايتۋ، سونداي-اق ساۋدا-ەكونوميكالىق ءجانە مادەني-گۋمانيتارلىق بايلانىستاردى كەڭەيتۋ ماسەلەلەرىن تالقىلادى.

سۋرەت: ج.جۇمابەكوۆ.

مارتەبەلى مەيماندى قارسى العان ءماجىلىس سپيكەرى ەكى ەل اراسىنداعى ىنتىماقتاستىقتىڭ سىندارلى سيپاتىن اتاپ ءوتتى.

سۋرەت: ج.جۇمابەكوۆ.

– قازاقستان مەن پولشا – ماڭىزدى ستراتەگيالىق سەرىكتەس ەلدەر. ءبىزدىڭ قارىم-قاتىناسىمىز جوعارى دەڭگەيدەگى ءوزارا تۇسىنىستىككە جانە سەنىمگە نەگىزدەلگەن. مەملەكەتتەرىمىزدىڭ باسشىلارى ەكىجاقتى ىنتىماقتاستىقتىڭ زور الەۋەتىن ءتيىمدى ىسكە اسىرۋعا بارلىق كۇش-جىگەرىن سالۋدا. قازاقستان-پولشا ىقپالداستىعىنىڭ قارقىندى دامۋىنا ەكى ەلدىڭ پارلامەنتتەرى دە ءوز ۇلەسىن قوسىپ، بارلىق دەڭگەيدە بىرلەسىپ ءىس-ارەكەت ەتۋدە، – دەدى ەرلان قوشانوۆ.

سۋرەت: ج.جۇمابەكوۆ.

ءماجىلىس توراعاسى پولشالىق ارىپتەسىن پرەزيدەنت قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان ساياسي رەفورمالار تۋرالى مالىمەت بەردى. بۇكىلحالىقتىق رەفەرەندۋمدا جاڭا كونستيتۋتسيانىڭ قابىلدانۋى جاڭعىرتۋ پروتسەسىنىڭ ماڭىزدى كەزەڭىنە اينالدى. كونستيتۋتسيالىق نورمالاردى ءىس جۇزىنە اسىرۋ ماقساتىمەن پارلامەنت اسا ماڭىزدى زاڭداردى قابىلدادى. ولاردىڭ قاتارىندا پرەزيدەنت، قۇرىلتاي، حالىق كەڭەسى تۋرالى جانە باسقا دا زاڭنامالىق اكتىلەر بار. ءماجىلىس سپيكەرى ارىپتەسىن الداعى پارلامەنتتىك سايلاۋدى بايقاۋ جونىندەگى ميسسيالارعا قاتىسۋعا شاقىردى.

ءوز كەزەگىندە پولشا رەسپۋبليكاسى سەناتىنىڭ مارشالى مالگوجاتا كيداۆا-بلونسكا قوناقجايلىق تانىتقانى ءۇشىن العىسىن ءبىلدىرىپ، پولشانىڭ ەكىجاقتى ىنتىماقتاستىقتى ودان ءارى تەرەڭدەتۋگە مۇددەلى ەكەنىن اتاپ ءوتتى. ول قازاقستاننىڭ قول جەتكىزگەن جەتىستىكتەرىنە ەرەكشە اسەر العانىن ايتتى. پولشا دەلەگاتسياسىنىڭ باسشىسى  ەكونوميكا، مادەنيەت، ءبىلىم بەرۋ، سپورت جانە وزگە دە سالالارداعى ارىپتەستىكتى كەڭەيتۋ قاجەتتىگىنە نازار اۋداردى. سونىمەن قاتار قازاقستانداعى پولياكتارعا ءوز انا ءتىلىن جانە ءدىني سەنىمىن ساقتاۋعا قولايلى جاعداي جاساعانى ءۇشىن ريزاشىلىعىن ءبىلدىردى.

تاراپتار ساۋدا-ەكونوميكالىق ىنتىماقتاستىقتى دامىتۋ ماسەلەسىنە ەرەكشە ءمان بەرىپ، وڭدەۋ ونەركاسىبى، ماشينا جاساۋ، ەنەرگەتيكا، مەتاللۋرگيا، تاماق، مۇناي-حيميا جانە حيميا سالالارىنداعى ءوزارا بايلانىستىڭ جوعارى الەۋەتىن اتاپ ءوتتى. سونىمەن قاتار ءماجىلىس توراعاسى IT سالاسىنداعى ىنتىماقتاستىقتىڭ وزەكتىلىگىنە ەرەكشە توقتالىپ، قازاقستاندا 2026 جىلدىڭ تسيفرلاندىرۋ جانە جاساندى ينتەللەكت جىلى بولىپ جاريالانعانىنا نازار اۋداردى. وسىعان بايلانىستى تسيفرلاندىرۋ مەن جاساندى ينتەللەكت سالالارىندا زاڭ شىعارۋ ىسىندە تاجىريبەسىن الماسۋدى كۇشەيتۋ ۇسىنىلدى.

كەزدەسۋ قورىتىندىسى بويىنشا تاراپتار بۇل ساپار ەكى ەل اراسىنداعى پارلامەنتارالىق ديالوگقا جاڭا سەرپىن بەرەتىنىنە سەنىم ءبىلدىردى. 

ءماجىلىستىڭ ءباسپاسوز قىزمەتى 

Abai.kz