Associated Press (AP) جانە چيكاگو ۋنيۆەرسيتەتىندەگى ۇلتتىق پىكىردى زەرتتەۋ ورتالىعىنىڭ (NORC) جاقىندا جۇرگىزگەن بىرلەسكەن ساۋالناماسى اقش-تا ونداعان جىلدار بويى ەكى پارتيانىڭ كەڭ قولداۋىنا يە بولعان يزرايلگە دەگەن امەريكالىقتاردىڭ قوعامدىق پىكىرىنىڭ كۇرت وزگەرگەنىن كورسەتكەن.

گازاداعى سوعىس جالعاسىپ جاتقاندىقتان، ءيزرايلدىڭ اسكەري ارەكەتتەرىنە بولعان قوعامدىق قولداۋ ايتارلىقتاي تومەندەگەن.

ساۋالناما قاتىسقان امەريكاندىق ەرەسەكتەردىڭ شامامەن ۇشتەن ءبىرى يزرايل گازا سوعىسى كەزىندە پالەستينالىقتارعا قارسى «گەنوتسيد» جاسادى دەسە، رەسپوندەنتتەردىڭ شامامەن 20%-ى عانا يزرايل گەنوتسيد جاسامادى دەگەن. امەريكاندىق ەۆرەيلەردىڭ شامامەن 30%-ى يزرايل گەنوتسيد جاسادى دەپ سانايتىنىن ايتسا، 49%-ى جاسامادى دەگەن پىكىردە ەكەن.

حالىقارالىق ادام قۇقىقتارى ۇيىمدارى «گەنوتسيد» تۋرالى ايىتپاۋدى ءبىرىنشى بولىپ كوتەردى، ال يزرايل مەن اقش ۇكىمەتتەرى ونداي ايىپتاۋلاردى ۇنەمى جوققا شىعارىپ كەلەدى

دەلاۆەردەن كەلگەن 69 جاستاعى دەموكراتيالىق پارتيانىڭ جاقتاۋشىسى گارولد كالمۋس ەۆرەي وتباسىندا دۇنيەگە كەلگەنىن جانە ءبىر كەزدەرى يزرايلمەن ماقتانعانىن، بىراق قازىر كوزقاراسى مۇلدەم وزگەرگەنىن جايىپ سالعان. ول: «مەن حاماس-تىڭ يزرايلگە قاۋىپ توندىرەتىنىن بىلەمىن، بىراق ەۆرەي بيلىگىنىڭ ىستەپ جاتقانى - ايتىپ جەتكىزۋ مۇمكىن ەمەس قورقىنىشتى مىنەز-قۇلىق. مەنىڭ ويىمشا، ولار وركەنيەتتى جويۋعا تىرىسۋدا» دەگەن.

ساۋالنامالار دەموكراتيالىق پارتيانىڭ يزرايلگە قولداۋىنىڭ ايتارلىقتاي تومەندەگەنىن كورسەتەدى. دەموكراتيالىق پارتيانى قولداۋشىلاردىڭ 58%-ى اقش ءيزرايلدى «شامادان تىس قولدايدى» دەپ سانايدى، بۇل 2024 جىلدىڭ باسىنداعى 45%-دان 13 پايىزعا كوپ ەكەن.

ەكىنشى جاعىنان، قازىرگى ۋاقىتتا 45 جاستان اسقان دەموكراتتاردىڭ 57%-ى اقش پالەستيناعا قولداۋىن ارتتىرۋى كەرەك ەكەنىن ايتقان.

ۆيسكونسين شتاتىنان كەلگەن 73 جاستاعى زەينەتكەر مۇعالىم دجوي دجەننيك اقش-يزرايل قارىم-قاتىناسىن 2023 جىلدىڭ 7 قازانىنداعى وقيعالاردان كەيىن عانا مۇقيات باقىلاي باستاعانى، يزرايل گەنوتسيد جاسادى دەپ سانايتىنىن ايتقان. «گازا سەكتورى تولىعىمەن قيرادى; ادامداردىڭ وندا ءتىرى قالۋى مۇمكىن ەمەس» دەيدى ول.

رەسپۋبليكالىق پارتيا تۇتاستاي العاندا ءيزرايلدى قولدايدى، تەك 13%-ى عانا يزرايل گەنوتسيد جاسادى دەپ سانايدى.

ساۋالناما سونىمەن قاتار يزرايل پرەمەر-ءمينيسترى بينيامين نەتانياحۋدىڭ امەريكا قۇراما شتاتتارىنداعى قوعامدىق بەدەلىنىڭ ناشار ەكەنىن كورسەتكەن، امەريكاندىق ەرەسەكتەردىڭ تەك 20%-ى وعان وڭ كوزقاراس تانىتسا، ەۆرەي ەرەسەكتەرىنىڭ شامامەن 60%-ى نەتانياحۋعا تەرىس كوزقاراستا ەكەنىن اشىق ايتقان.

Abai.kz