قازاقستاننىڭ سىرتقى ىستەر مينيسترلىگى رەسەيدەگى مۇناي وڭدەۋ ينفراقۇرىلىمى نىساندارىنا قازاقستاننان دروندار ۇشىرىلعان دەگەن حابارلاردى "نەگىزسىز جالعان اقپارات" دەپ اتادى. مۇنى مينيسترلىكتىڭ رەداكتسيا ساۋالىنا بەرگەن جاۋابىنا سۇيەنىپ Tengrinews.kz سايتى جازدى.

"قازاقستان رەسپۋبليكاسىنىڭ سىرتقى ىستەر مينيسترلىگى بۇل ايىپتاۋلاردىڭ شىندىققا جاناسپايتىنىن جانە ولاردى راستايتىن ەشقانداي دەرەكتەر نەمەسە فاكتىلەر جوعىن جاۋاپكەرشىلىكپەن مالىمدەيدى. ءبىز مۇنداي جاريالانىمداردى كەشەندى ستراتەگيالىق سەرىكتەستىك پەن وداق رۋحىندا تابىستى دامىپ كەلە جاتقان قازاقستان-رەسەي قارىم-قاتىناستارىنىڭ ءداستۇرلى دوستىق سيپاتىن بۇرمالاۋدى كوزدەگەن نەگىزسىز جالعان اقپارات دەپ سانايمىز", — دەگەن مينيسترلىكتىڭ جاۋابىن كەلتىرگەن باسىلىم.

بۇعان قوسا سىرتقى ىستەر مەكەمەسى قازاقستان تەڭگەرىمدى جانە جاۋاپتى سىرتقى ساياسات جۇرگىزەتىنىن، حالىقارالىق مىندەتتەمەلەرىن ساقتايتىنىن جانە وزگە مەملەكەتتەردىڭ ىشكى ىستەرىنە ارالاسپايتىنىن اتاپ كورسەتكەن.

"قازاقستان رەسپۋبليكاسى ءوز اۋماعىن، اۋە كەڭىستىگىن جانە ينفراقۇرىلىمىن باسقا مەملەكەتتەرگە قارسى باعىتتالعان ءىس-ارەكەتتەردى جۇزەگە اسىرۋ ءۇشىن پايدالانۋعا بولمايدى دەگەن ۇستانىمدا", — دەپ جازعان مينيسترلىك.

وسى اپتانىڭ باسىندا رەسەيدىڭ قازاقستانمەن شەكتەسەتىن ومبى وبلىسىندا بولعان درون شابۋىلدارىنان كەيىن رەسەي باسىلىمدارىندا بۇل شابۋىلدارعا قازاقستاننىڭ قاتىسى جايلى دولبارلار تاراعان ەدى. ونداي حابارلامالاردىڭ اۆتورلارى درون شابۋىلىنا ۇشىراعان ايماقتىڭ گەوگرافيالىق جاعىنان قازاقستانعا جاقىن ورنالاسقانىن ءوز دولبارىنا نەگىز رەتىندە كەلتىرگەن.

6 شىلدە كۇنى اۋەدەن جاسالعان شابۋىلدار سالدارىنان رەسەيدەگى مۇناي وڭدەيتىن ەڭ ءىرى كاسىپورىن – ومبى زاۋىتى زاقىمدالىپ، جۇمىسىن توقتاتۋعا ءماجبۇر بولدى. Reuters اگەنتتىگىنىڭ دەرەگىنشە, زاۋىتتاعى ەكى باستاپقى مۇناي وڭدەۋ قوندىرعىسى ىستەن شىققان.

ومبى مۇناي وڭدەۋ زاۋىتى بەنزين مەن ديزەل وتىنىن سانكت-پەتەربۋرگ تاۋار بيرجاسى ارقىلى كوتەرمە ساۋدا الاڭىندا ساتۋدى توقتاتتى.

Abai.kz