اشا ماتاي: مەن مىنگەن ات سۇلۋ ءارى اساۋ بولدى
قازاقستانداعى تانىمال جاس انشىلەردىڭ ءبىرى - اشا ماتاي. R&B باعىتىنداعى اندەردى جەرىنە جەتكىزىپ ايتاتىن ول بۇگىندە اكتريسا دەگەن اتقا لايىق بولىپ ءجۇر. دوسحان جولجاقسىنوۆتىڭ باسشىلىعىمەن تاسپالانعان «ءبىرجان سال» فيلمىندەگى اشا سومداعان ءلايلىم ءرولى كوپشىلىكتىڭ ىقىلاسىنا بولەندى. «ءبىرجان سال» ءفيلمىنىڭ ءتۇسىرىلۋ بارىسى تۋرالى جاس اكتريسامەن سۇحباتتاسقاندى ءجون كورە وتىرىپ «قانداي ساتتەر ەسىڭدە قالدى؟» دەپ سۇراعانىمىزدا ول «كينودا مەن مىنگەن ات قانشالىقتى سۇلۋ بولسا، سونشالىقتى اساۋ ەدى» دەپ جاۋاپ بەردى. وسى جاۋابىنان-اق ءبىز زامانداس قۇربىمىزدىڭ تۇلپار مىنەزدەس تاكاپپار ونەردىڭ جالىنا قول سالعانىن ىشىمىزدەن بەرىك تۇيدىك...
- اشا، سەنىڭ بۇل رولگە قالاي تاڭدالعانىڭ مەنى قاتتى قىزىقتىرىپ وتىر. قانداي دا ءبىر كاستينگتەن ءوتتىڭ بە؟ ءبارى قالاي باستالىپ ەدى؟
قازاقستانداعى تانىمال جاس انشىلەردىڭ ءبىرى - اشا ماتاي. R&B باعىتىنداعى اندەردى جەرىنە جەتكىزىپ ايتاتىن ول بۇگىندە اكتريسا دەگەن اتقا لايىق بولىپ ءجۇر. دوسحان جولجاقسىنوۆتىڭ باسشىلىعىمەن تاسپالانعان «ءبىرجان سال» فيلمىندەگى اشا سومداعان ءلايلىم ءرولى كوپشىلىكتىڭ ىقىلاسىنا بولەندى. «ءبىرجان سال» ءفيلمىنىڭ ءتۇسىرىلۋ بارىسى تۋرالى جاس اكتريسامەن سۇحباتتاسقاندى ءجون كورە وتىرىپ «قانداي ساتتەر ەسىڭدە قالدى؟» دەپ سۇراعانىمىزدا ول «كينودا مەن مىنگەن ات قانشالىقتى سۇلۋ بولسا، سونشالىقتى اساۋ ەدى» دەپ جاۋاپ بەردى. وسى جاۋابىنان-اق ءبىز زامانداس قۇربىمىزدىڭ تۇلپار مىنەزدەس تاكاپپار ونەردىڭ جالىنا قول سالعانىن ىشىمىزدەن بەرىك تۇيدىك...
- اشا، سەنىڭ بۇل رولگە قالاي تاڭدالعانىڭ مەنى قاتتى قىزىقتىرىپ وتىر. قانداي دا ءبىر كاستينگتەن ءوتتىڭ بە؟ ءبارى قالاي باستالىپ ەدى؟
- شىنىمدى ايتسام، بۇل كينوعا ءتۇسۋ مەنىڭ ويىمدا بولماعان. اكەمنىڭ وتىنىشىمەن ءبىر تويدا ءان ايتىپ بولىپ، كەتكەلى جاتسام ماعان بەيتانىس جان جاقىنداپ كەلىپ: «اينالىپ كەتەيىن، مەن ىزدەگەن ادام ءوزىڭسىڭ. سەنى كينوعا تۇسۋگە شاقىرامىن. مۇمكىن بولسا، قالتا تەلەفونىڭنىڭ نومەرىن قالدىرشى»،-دەدى. مەن بۇل ادامدى ادەتتەگى ونەرىمدى باعالاۋشىلاردىڭ ءبىرى دەپ ويلاپ،ەشتەڭە قالدىرماي جۇرە بەردىم. سول كەزدە جانىمىزعا اكەم كەلدى دە، وسى كىسىمەن سويلەسىڭىز دەپ كەتىپ قالدىم. كەيىن ءبىلدىم، ول كىسى ەرىك جولجاقسىنوۆ ەكەن. ارادا بىرەر كۇن وتكەننەن كەيىن كاستينگتەن «امان-ەسەن» وتكەنىم تۋرالى حابار الدىم. سونسوڭ، اتا-اناممەن كەڭەسىپ، كينوعا ءتۇسۋ كەرەك دەگەن شەشىم قابىلدادىم. ناتيجەسى جاقسى بولعان سياقتى.
- سەن ءوزىڭ زاماناۋي، اندەرىڭ دە وسى داۋىرگە لايىقتالعان قىزسىڭ. ال كينودا سوناۋ عاسىرداعى بوياماسىز قازاق ارۋىنىڭ وبرازىن جاسادىڭ. وتكەن زامانعا ساپار شەگۋ قيىن بولمادى ما؟ ءلايلىمنءىڭ ءرولىن سەنىمدى الىپ شىعۋ ءۇشىن ءبىراز دايىندالعان بولارسىڭ؟
- ارينە، العاشىندا وتە قيىن بولدى. مەن قازىرگى كۇننىڭ، ءححى عاسىردىڭ «جەمىسىمىن». ال فيلمدە ءحVىىى عاسىردىڭ اياعى مەن ءحىح عاسىردىڭ باس جاعى سيپاتتالادى. ءبىرجان سالدى بۇرىن مەكتەپ وقۋلىعىنداعى شاعىن مالىمەتتەر بويىنشا جانە سارامەن ايتىسى ارقىلى بىلەتىنمىن. ال فيلمگە ءتۇسۋ بارىسىندا تۇتاستاي ءبىرجان الەمىن اشتىم ءوزىم ءۇشىن. كوز قيىعىمەن-اق كوپ نارسەنى ۇعىندىراتىن قازاق قىزىنىڭ وبرازىن الىپ شىعۋ ءۇشىن كوپ ەڭبەكتەنگەنىم راس. ايناعا قاراپ قيمىل-قوزعالىسىمدى رەتتەپ، قايتسەم جاقسى ويناپ شىعامىن دەگەن سۇراققا كۇندىز-ءتۇنى جاۋاپ ىزدەۋمەن بولدىم. ادەبي كىتاپتاردى پاراقتاپ، ىشتەي ۇلكەن پسيحولوگيالىق دايىندىقتى وتكەردىم. ونىڭ ۇستىنە، مەنىڭ كەيىپكەرىم وزىمەن قاتار جىگىتكە ەمەس، ۇلكەن ادامعا عاشىق. وسىنى حالىققا جەتكىزۋدىڭ قيىن سوققانىن جاسىرمايمىن. مەن بۇل وقيعالار ءوز ومىرىمدە بولىپ جاتقانداي سەزىنگەندىكتەن، نانىمدى ويناعان سياقتىمىن. كورەرمەنگە تارتىمدى تۋىندى ۇسىنامىز دەپ تالپىنعان ءتۇسىرۋ الاڭىنداعى قىزمەتكەرلەردىڭ، دوسحان اعانىڭ اقىل-كەڭەسى ماعان قانات بىتىرگەندەي بولدى. ءتۇسىرۋ الاڭىندا ورىن العان وقيعالار ءسوز جوق، ماعان ۇلكەن ساباق بولدى. مەنىڭ ءبىر قادام بولسا دا العا اتتاۋىما سەرپىن بەردى. سونىمەن قاتار، مەن كينوعا ەشقانداي بوياۋ جاقپاي ءتۇستىم. بۇل ءۇشىن قوبالجىدىم، ارينە. سەبەبى، وسىعان دەيىن وپا-دالاپسىز كامەرا الدىندا تۇرماعانمىن. قۋانىشىما وراي، بوياۋسىز دا ادەمى كورىنەدى ەكەنمىن. ادەتتە، 10 دۋبلگە دەيىن جالعاساتىن كورىنىستەردى 3-اق دۋبلدە ءساتتى شىعاردىق. مۇنى دا مەن ونەر جولىنداعى جەڭىستەرىمنىڭ ءبىرى دەپ بىلەمىن.
- كادردىڭ سىرتىندا, تەك ءتۇسىرۋ الاڭىندا قالىپ قويعان قىزىق وقيعالار كوپ بولعان شىعار...
- ارينە، ونداي ساتتەر كوپ بولدى. فيلمدە ءلايلىمنىڭ كيىز ءۇيدىڭ ىشىندە وتىرىپ ءان سالاتىن جەرى بار عوي. سول كورىنىستى ءتۇسىرىپ جاتقانبىز.جاز مەزگىلى، كۇن اپتاپ ىستىق. كيىز ءۇيدىڭ قاق ورتاسىندا وت جانىپ جاتىر. ۇستىمدە ەتەك-جەڭى ۇزىن قازاقى كويلەك، باسىمدا باس كيىمىم تاعى بار. وسىنداي ىستىققا قاراماستان، ءانىمدى شىرقاپ تۇرعانمىن. ءبىر كەزدە كيىز ءۇيدىڭ توبەسى قوزعالاتىن سياقتاندى. ءجاي، كوزىمە كورىنگەن شىعار دەپ ءانىمدى توقتاتپادىم. شامالىدان سوڭ قاسىمداعى ادامدار ايعايلاپ، شىڭعىرىپ، قاشىپ جاتىر. تۇك تۇسىنبەي تۇرعانىمدا كيىز ءۇي جالپ ەتىپ قۇلاپ كەتتى.توبەسىندەگى كيىزى قاتتى قالىڭ ءارى اۋىر بولعان ەكەن دە، ۋىقتار ونى كوتەرە الماپتى. وسىدان سوڭ قازاقى كيىز ۇيگە كىرۋگە قورقىپ قالعانىم بار. تاعى ءبىر ەستە قالعان جايت، مەن مىنگەن اتتىڭ قىزىقتارى. ول قانشالىقتى سۇلۋ بولسا، سونشالىقتى اساۋ ەدى. العاش مىنگەندە مەنى ۇشىرىپ اكەتە جازدادى، الايدا مەن تاقىمىمدى بوساتپاي، موينىنا جابىسىپ الدىم. ەش قورىققان جوقپىن.
- «ءبىرجان سالدىڭ» العاشقى كورسەتىلىمىن قاراپ وتىرىپ نە ءتۇيدىڭ؟
- پرەمەرانى كورىپ وتىرىپ كوزىمە جاس الدىم. ءوزىمنىڭ وسىنداي ارقالاعان جۇگى اۋىر ءرولدى جاۋاپكەرشىلىكپەن الىپ شىققانىما سەنبەدىم. «ءبىرجان سال» مەنىڭ رۋحاني بايۋىما، شىعارماشىلىق جاعىنان وسۋىمە، ىشكى دۇنيەمىنىڭ جاڭارۋىنا سەبەپكەر بولدى. مەن ونەر ساحناسىندا بوسقا جۇرمەگەنىمدى، قولىمنان تيتتەي بولسا دا بىردەڭە كەلەتىنىن سەزدىم. ال كينو سالاسىنىڭ مايتالماندارى ماعان جاقسى سوزدەر ارناعاندا قۋانعانىمدى جوققا شىعارمايمىن. وسى رەتتە، دوسحان اعاعا زور العىس بىلدىرگىم كەلەدى.
- ءوزىڭ تۇسكەن «استانا - عاشىقتار مەكەنى»، «وبراتنايا ستورونا» فيلمدەرى جونىندە نە ايتاسىڭ؟
- نەگىزى، ەڭ ءبىرىنشى «ءبىرجان سال»، سوسىن «استانا - عاشىقتار مەكەنى»، ەڭ سوڭىنان بارىپ «وبراتنايا ستورونا» ءتۇسىرىلدى. ال كورەرمەنگە العاش بوپ «استانا - عاشىقتار مەكەنى» مەن «وبراتنايا ستورونا» جول تارتىپ كەتتى. دانيار سالاماتتىڭ جەتەكشىلىگىمەن تۇسىرىلگەن «استانا - عاشىقتار مەكەنىنىڭ» يدەياسى تاماشا، جاستاردى ەسىرتكى مەن تەمەكىدەن، جامان ادەتتەن اۋلاق بولۋعا ۇندەيدى.تەك دۇرىس اياقتالماعانى جونىندە سىن-ەسكەرتپەلەر كوپ ايتىلۋدا. ال «وبراتنايا ستورونا» بوەۆيك جانرىنداعى فيلم بولعاننان كەيىن مەنىڭ كوپتەگەن تريۋكتەرگە، اتىس-شابىستارعا كۋا بولۋىما تۋرا كەلدى.
- ءبىراز كينونىڭ باسىن قايىرىپ تاستادىڭ. ال سەنىڭ كاسىبي اكتريسا ەمەس ەكەندىگىڭدى بىلەمىز. بۇل سالانى تەرەڭ مەڭگەرۋگە تالپىنىس بار ما؟
- ارينە، بار. بۇگىنگى تاڭدا مەن ءال-فارابي اتىنداعى قازاق ۇلتتىق ۋنيۆەرسيتەتىندە حالىقارالىق زاڭگەر ماماندىعى بويىنشا ءبىلىم الىپ جاتىرمىن. قۇداي قالاسا، بيىل بىتىرەمىن. سونسوڭ، تەمىربەك جۇرگەنوۆ اتىنداعى ونەر اكادەمياسىنا قۇجات تاپسىرۋ - باستا ماقساتتارىمنىڭ ءبىرى. ءبارى بولاشاقتىڭ ەنشىسىندە.
- اشا، سەن ءارى ءانشى، ءارى اكتريسا، ءارى تەلەجۇرگىزۋشىسىڭ. وسىلاردىڭ ىشىندە جانىڭا جاقىنى قايسىسى؟ سونىمەن قاتار، سازگەرلىك قىرىڭمەن تانىلعىڭ كەلمەي مە؟
- ەشقايسىسىن ءبولىپ-جارمايمىن. بىراق، ەلگە ءان ارقىلى تانىلعانىمدى بىلەمىن. ءان - مەنىڭ ءومىرىمنىڭ اجىراماس بولشەگى. ول بارلىعىنان بيىك تۇرادى. ءان شىعاراتىن ونەرىم دە ازداپ بار، الايدا، ول تەك وزىمە عانا ءمالىم، ولاردى جارىققا شىعارمايمىن.
- قازىر انشىلەردى «قازاق» جانە «قازاقستاندىق» دەپ ءبولىپ ءجۇرمىز. سەن قاي توپقا جاتاسىڭ؟
- مەن بۇلاي بولۋگە ءۇزىلدى-كەسىلدى قارسىمىن. كيەلى ساحنادا جۇرگەن ءاربىر «ءاۋ» دەي الاتىن جان قازاق ەستراداسىنىڭ قارىشتاپ، دامۋىنا قىزمەت جاساۋى كەرەك. قالعاندارىنىڭ ءبارى بوس اڭگىمە.
- ايتپاقشى, سەنىڭ «تاعدىر جولى» اتتى انىڭە تۇسىرىلگەن كليپ پەن ايگۇل يمانباەۆا ورىندايتىن «تاڭعى ەلەس» ءانىنىڭ بەينەبايانىندا ءبىراز ۇقساستىقتار بار ەكەنىن بايقاعانمىن...
- مۇنى ماعان ءبىراز ادام ايتقان. مۇمكىن، ەكى تۋىندى ءبىر ادامنىڭ، راشيد اداي سۇلەيمەنوۆتىڭ قولىنان شىققاسىن كىشكەنە ۇقساپ كەتكەن شىعار. ازعانتاي جەرلەرى ۇقساس دەگەنگە كەلىسۋگە بولادى، بىراق «تاڭعى ەلەستىڭ» اينا-قاتەسىز كوشىرمەسى دەي المايمىن.
- شىعارماشىلىعىڭدا نەندەي وزگەرىستەر بولىپ جاتىر؟ جەكە كونتسەرت بەرەتىن ويىڭ جوق پا؟
- جۋىق ارادا العاشقى كۇيتاباعىم جارىق كورەدى. جانە بەينەكليپىم دە بىتۋگە تاياپ قالدى. ءۇش كينوعا شاقىرتۋ العانمىن، سونىڭ بىرەۋىنىڭ ءتۇسىرىلۋ جۇمىستارى باستالىپ كەتتى. جەكە كونتسەرت بەرەتىن ۋاقىتىم ءالى بولعان جوق. ساحناعا كەلگەنىم كەشە عانا، كەلە سالىپ ءتور مەنىكى دەگىم كەلمەيدى. ول ءۇشىن مەن ءبىراز ەڭبەكتەنىپ، كوپ شارۋالاردى تىندىرۋىم كەرەك.
- قازاق قىزدارى كوپ كيە بەرمەيتىن بوكس قولعابىن ءالى شەگەگە ىلگەن جوقسىڭ با?
- جوق، بوكستاسقاندى مەن جاقسى كورەمىن. بۇل قازاق قىزدارى كوپ قۇپ كورمەيتىن سپورت. بىراق، مەن سونىڭ باستاماشىسى بولعىم كەلەدى. ۇلگى تۇتاتىن بوكسشىم ءارى باپكەرىم - مارات مازىمباەۆ. بوكستاعى قازاق جىگىتتەرىنىڭ اياق الىسىن قاداعالاپ وتىرامىن.
سۇحباتتاسقان اقىرىس سەيىتقازى
