كولىك مينيسترلىگى تەمىرجول كولىگىندە زاماناۋي تسيفرلىق تەحنولوگيالاردى ەنگىزۋ جانە جولاۋشىلارعا كورسەتىلەتىن قىزمەت ساپاسىن ارتتىرۋ جۇمىستارىن جالعاستىرۋدا.

وسىعان وراي الەۋمەتتىك ماڭىزى بار باعىتتار بويىنشا جولاۋشىلار تاسىمالىن جۇزەگە اسىراتىن تاسىمالداۋشىلارمەن جيىن ءوتتى. كەزدەسۋ بارىسىندا سالانىڭ اعىمداعى جىلدىڭ ءبىرىنشى جارتىجىلدىعىنداعى قورىتىندىسى شىعارىلىپ، جولاۋشىلار تەمىرجول تاسىمالىن ودان ءارى دامىتۋدىڭ نەگىزگى ماسەلەلەرى قارالدى.

نەگىزگى ماسەلەلەردىڭ ءبىرى جولاۋشىلار پويىزدارىن ينتەرنەتپەن قامتاماسىز ەتۋ. بۇگىندە قىزىلوردا – پاۆلودار، جەزقازعان – استانا، استانا – سەمەي، الماتى – دوستىق جانە قىزىلوردا – كوكشەتاۋ باعىتتارىنداعى جولاۋشىلار پويىزدارى ينتەرنەتپەن قامتاماسىز ەتىلگەن.

سپۋتنيكتىك بايلانىستى پايدالانۋ ۇيالى بايلانىس وپەراتورلارىنىڭ قامتۋ ايماعى جوق تەمىرجول ۋچاسكەلەرىندە دە ينتەرنەتكە تۇراقتى قولجەتىمدىلىكتى قامتاماسىز ەتەدى. بۇل جولاۋشىلارعا مەسسەندجەرلەردى، الەۋمەتتىك جەلىلەردى، جۇمىس سەرۆيستەرىن جانە باسقا دا ونلاين-پلاتفورمالاردى ەركىن پايدالانۋعا مۇمكىندىك بەرەدى.

سەرۆيسكە قوسىلۋ ءۇشىن جولاۋشىلار پويىزداعى Wi-Fi جەلىسىن تاڭداپ، اۆتوريزاتسيادان ءوتۋى قاجەت. وسىدان كەيىن WhatsApp جانە Telegram مەسسەندجەرلەرى ارقىلى ماتىندىك حابارلامالاردى تەگىن الماسۋ قىزمەتىن پايدالانا الادى. بۇدان بولەك ينتەرنەت-رەسۋرستارعا، الەۋمەتتىك جەلىلەرگە، بەينەسەرۆيستەرگە جانە جۇمىسقا ارنالعان قوسىمشالارعا تولىق قولجەتىمدىلىك بەرەتىن اقىلى ءتاريفتى راسىمدەۋگە مۇمكىندىك بار.

جيىن قورىتىندىسى بويىنشا تاسىمالداۋشىلارعا جولاۋشىلار پويىزدارىن ينتەرنەتپەن جابدىقتاۋ جۇمىستارىن جەدەلدەتىپ، اعىمداعى جىلدىڭ سوڭىنا دەيىن اياقتاۋ تاپسىرىلدى.

Abai.kz