قۇرىلتاي دەپۋتاتتىعىنا كانديداتتاردىڭ سايلاۋالدى ۇلتتىق تەلەۆيزيالىق پىكىرسايىسىندا «ادىلەت» پارتياسىنىڭ اتىنان قاتىسقان رەنات بەكتۇروۆ شەتەلگە كەتكەن قازاقستاندىقتاردى ەلگە قايتارۋ ءۇشىن ولارعا قولايلى جاعداي قالىپتاستىرۋ كەرەگىن ايتتى.

ول ءۇشىن ۆيزا ساياساتىن جەتىلدىرۋ، شەتەلدىك ديپلومداردى تانۋ ءراسىمىن جەڭىلدەتۋ، تسيفرلاندىرۋدى دامىتۋ جانە ءادىل باسەكەلى ەكونوميكالىق ورتا قالىپتاستىرۋ كەرەك.

پىكىرسايىس بارىسىندا جۇرگىزۋشى كانديداتتاردان جاڭا كونستيتۋتسياعا سايكەس ادام كاپيتالىن، ءبىلىمدى، عىلىم مەن يننوۆاتسيانى دامىتۋ مەملەكەتتىڭ ستراتەگيالىق باعىتى ەكەنىن اتاپ ءوتىپ، قازاقستاندى دارىندى ءارى جوعارى بىلىكتى ماماندار جۇمىس ىستەۋگە ۇمتىلاتىن وڭىرلىك حابقا اينالدىرۋ ءۇشىن قانداي زاڭنامالىق تەتىكتەر قاجەت ەكەنىن سۇرادى.

رەنات بەكتۇروۆتىڭ ايتۋىنشا، «ادىلەت» پارتياسىنىڭ باعدارلاماسى ەڭ الدىمەن قازاقستاندىقتاردىڭ ءال-اۋقاتىن ارتتىرۋعا باعىتتالعان.

«ەلىمىزدىڭ ادامي كاپيتالىن دامىتۋ ءۇشىن باسقا ەلدەردەن بىلىكتى مامانداردى تارتۋمەن قاتار، شەتەلگە كەتىپ قالعان ءوز ازاماتتارىمىزدى دا ەلگە قايتارۋىمىز كەرەك. ول ءۇشىن ولاردىڭ قازاقستانعا ورالىپ، ەڭبەك ەتۋىنە قولايلى جاعداي جاساۋعا ءتيىسپىز»، – دەدى ول.

كانديداتتىڭ سوزىنشە، وسى باعىتتاعى جۇمىستار قازىردىڭ وزىندە باستالىپ كەتكەن. اتاپ ايتقاندا، ەلىمىزدە الەمنىڭ جەتەكشى ۋنيۆەرسيتەتتەرىنىڭ فيليالدارى اشىلىپ، شەتەلدىك ستۋدەنتتەر مەن وقىتۋشىلار كەلە باستادى.

رەنات بەكتۇروۆ ۆيزا بەرۋ جۇيەسىن تولىق تسيفرلاندىرۋدى ۇسىندى. ونىڭ ايتۋىنشا، بۇل باستاما «ادىلەت» پارتياسىنىڭ سايلاۋالدى باعدارلاماسىنىڭ بەسىنشى باعىتى – تسيفرلاندىرۋ بولىمىندە جازىلعان.

«IT سالاسىنىڭ ءبىز ءۇشىن ماڭىزدى ەكەنىن ايتىپ كەتۋ كەرەك. ونى پرەزيدەنتىمىز دە ايتىپ ءجۇر. مىسالى، Nomad Visa دەگەن جاڭا ۆيزا ءتۇرى بار. سونىمەن قاتار، باسقا دا ينۆەستورلار كەلىپ، ەلىمىزگە اقشا سالىپ، ءبىزدىڭ كاپيتالىمىزدى نىعايتىپ جاتىر. ولار ءۇشىن Gold Visa سياقتى باعدارلامالار جاسالعان. ازاماتتارعا ارنالعان ۆيزا تۇرلەرىن تاعى دا كوبەيتۋ كەرەك. ولار كەلگەننەن كەيىن شەتەلدىك ديپلومىن قولدانۋ ماسەلەسى بار. سول ءۇشىن زاڭداعى قيىندىقتار مەن كەدەرگىلەردى جەڭىلدەتۋ كەرەك. بۇل تەك شەتەلدىك ازاماتتارعا عانا ەمەس، ءوزىمىزدىڭ قازاقستاندىق ازاماتتارعا دا قاتىستى. ولار شەتەلدەن ءبىلىم الىپ كەلگەندە نوستريفيكاتسيا دەگەن پروتسەسس بار، سونى دا وڭايلاتۋ جولىن قاراستىرعان ءجون»، - دەدى ول.

پارتيا وكىلى قازاقستانعا بىلىكتى مامانداردى تارتۋدا ءادىل ءارى باسەكەلى ەكونوميكالىق ورتانىڭ ءرولى دە ەرەكشە ەكەنىن ايتتى.

«شەتەلدەن ادامدار ءوز ەڭبەگى ءادىل باعالاناتىن، كاسىبىن ەركىن جۇرگىزۋگە مۇمكىندىك بار مەملەكەتكە كەلەدى. سوندىقتان بىزگە ءادىل ءارى باسەكەلى ەكونوميكالىق ورتا قالىپتاستىرۋ قاجەت»، – دەدى رەنات بەكتۇروۆ.

ونىڭ پىكىرىنشە، وسى تەتىكتەردىڭ بارلىعى قازاقستاننىڭ ادامي كاپيتالىن كۇشەيتىپ، ەلدىڭ حالىقارالىق باسەكەگە قابىلەتتىلىگىن ارتتىرادى.

ەسكە سالايىق، 23 شىلدەدەن باستاپ تۇڭعىش قۇرىلتاي دەپۋتاتتارىنىڭ سايلاۋىنا قاتىساتىن ساياسي پارتيالار سايلاۋالدى ۇگىت-ناسيحات جۇمىستارىن باستادى. سايلاۋعا 186 كانديدات ۇسىنعان «ادىلەت» پارتياسى العاشقىلاردىڭ ءبىرى بولىپ ءوزىنىڭ سايلاۋالدى باعدارلاماسىن جۇرتشىلىققا تانىستىردى.

ۇگىت-ناسيحات جۇمىستارى 21 تامىزعا دەيىن جالعاسادى. وسى كەزەڭدە ساياسي پارتيالار ەلىمىزدىڭ بارلىق وڭىرىندە سايلاۋشىلارمەن جۇزبە-ءجۇز كەزدەسىپ، پىكىرسايىستارعا قاتىسادى. زاڭعا سايكەس، 22 تامىز – ۇگىت-ناسيحات جۇرگىزۋگە تىيىم سالىناتىن «تىنىشتىق كۇنى». ال 23 تامىزدا تاڭعى ساعات 07:00-دەن كەشكى 20:00-گە دەيىن بۇكىل ەل بويىنشا سايلاۋ ۋچاسكەلەرى جۇمىس ىستەيدى. قازاقستاندىقتار قۇرىلتاي دەپۋتاتتارىن تىكەلەي داۋىس بەرۋ ارقىلى تاڭدايدى.

ايتا كەتەيىك، 1 شىلدەدەن باستاپ ءماجىلىس پەن سەناتتىڭ وكىلەتتىگى توقتاتىلدى. زاڭ شىعارۋ قىزمەتى قۇرىلتايعا بەرىلەدى. جاڭا ورگان ەندى زاڭداردى قابىلداۋ، رەسپۋبليكالىق بيۋدجەتتى بەكىتۋ جانە ۇكىمەت قىزمەتىنە باقىلاۋ جۇرگىزۋ مىندەتىن اتقارادى.

دايىنداعان:

«ادىلەت» پارتياسىنىڭ ءباسپاسوز قىزمەتى.

«ادىلەت» پارتياسى» قب سايلاۋ قورىنىڭ قاراجاتى ەسەبىنەن تولەندى.

تاپسىرىس بەرۋشى: ن.ت. مىڭجاساروۆ.

Abai.kz