ءبىرى تاڭعى جۇگىرۋگە شىقسا، ەندى ءبىرى قوعامدىق تىڭداۋ وتكىزىپ، اۋىل-ايماقتى ارالاپ ءجۇر. ال كەي پارتيالار كاسىپكەرلەردىڭ ماسەلەلەرىن تالقىلاپ، ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارمەن كەزدەسۋدە.

«ادىلەت» وڭىرلىك ساپارىن جالعاستىرۋدا: باستى نازاردا – اۋىلدى دامىتۋ جانە ادىلەتتى قوعام «ادىلەت» پارتياسىنىڭ وكىلدەرى «ادىلەتتى قازاقستان ءۇشىن» ءموبيلدى كەرۋەنى اياسىندا ءوڭىر تۇرعىندارىمەن كەزدەسۋلەرىن جالعاستىردى. بۇل جولى پارتيا وكىلدەرى سولتۇستىك قازاقستان وبلىسىنا بارىپ، اۋىل تۇرعىندارىمەن جۇزدەسىپ، ەلدى مەكەندەردەگى ەڭ وزەكتى ماسەلەلەردى تالقىلادى. كەزدەسۋلەر قورىتىندىسىندا تۇرعىندار اۋىلدىق اۋماقتاردى دامىتۋعا قاتىستى 100-گە جۋىق ۇسىنىس ايتتى.

سپورتشىلارمەن، ەڭبەك ۇجىمدارىمەن جانە تۋريزم سالاسىنىڭ وكىلدەرىمەن وتكەن كەزدەسۋلەردە پاراسپورتشىلاردى قولداۋ، بالالار جانە بۇقارالىق سپورتتى دامىتۋ، سپورت نىساندارىن سالۋ، اۋىل جاتتىقتىرۋشىلارىنا گرانت ءبولۋ، سونداي-اق ArtSport جانە Damubala باعدارلامالارىن قارجىلاندىرۋ ماسەلەلەرى كوتەرىلدى.

«نوۆوپەك» كاسىپورنىندا پارتيا وكىلدەرى وتاندىق ءوندىرىستى دامىتۋ، كاسىپكەرلىكتى قولداۋ جانە ينۆەستيتسيا تارتۋ جوسپارلارىنا توقتالدى. سونداي-اق ەكونوميكاداعى ورتا بيزنەستىڭ ۇلەسىن قازىرگى 7%-دان 20%-عا دەيىن ارتتىرۋ كوزدەلىپ وتىرعانىن مالىمدەدى.

بۋراباي اۋدانىندا ءتۋريزمدى دامىتۋ ماسەلەلەرى تالقىلاندى. اتاپ ايتقاندا، ينفراقۇرىلىمدى جاڭعىرتۋ، بالالاردىڭ ساۋىقتىرۋ ورتالىقتارىن قولداۋ، ەكوتۋريزم مەن اگروتۋريزمدى وركەندەتۋ، وتباسىلىق قوناقۇيلەر مەن جەرگىلىكتى وندىرۋشىلەرگە قولداۋ كورسەتۋ جايى ءسوز بولدى. «تازا قازاقستان» باعدارلاماسى اياسىندا تابيعاتتى قورعاۋ ماسەلەسىنە دە ەرەكشە نازار اۋدارىلدى.

پارتيا وكىلدەرىنىڭ ايتۋىنشا، وڭىرلىك ساپار بارىسىندا تۇرعىنداردان جينالعان ۇسىنىستار الداعى جۇمىستا ەسكەرىلمەك.كەشكە «ادىلەت» پارتياسىنىڭ مۇشەلەرى «جەڭىس» – «ەلىماي» فۋتبول ماتچىن تاماشالاپ، كوماندالارعا قولداۋ ءبىلدىردى. 700-گە جۋىق بەلسەندى كوپشىلىكپەن بىرگە فۋتبول مەرەكەسىنىڭ كورىگىن قىزدىردى.

وسدپ-نىڭ ازاماتتىق تىڭداۋى: تكش رەفورماسىنان كيبەرالاياقتىقپەن كۇرەسكە دەيىن

وسدپ توراعاسى اسحات راحىمجانوۆ باستاعان پارتيا وكىلدەرىنىڭ كەزدەسۋلەرى قاراعاندىدا وتكەن ازاماتتىق تىڭداۋدان باستالدى. ءىس-شاراعا قالا تۇرعىندارى، تۇرعىن ءۇي-كوممۋنالدىق شارۋاشىلىق سالاسىنىڭ، قوعامدىق ۇيىمدار مەن ەڭبەك ۇجىمدارىنىڭ وكىلدەرى قاتىستى.

تالقىلاۋدىڭ وزەگىنە قاراعاندىلىقتاردى كۇندەلىكتى تولعاندىراتىن ماسەلەلەر ارقاۋ بولدى. اتاپ ايتقاندا، كوممۋنالدىق سالانىڭ جۇمىسى، كيبەرالاياقتىقتىڭ كوبەيۋى جانە ونەركاسىپتىك وڭىردەگى ەكولوگيالىق احۋال ءسوز بولدى.

كانديداتتار ۇسىنعان باستامالاردىڭ قاتارىندا تاريفتەر، كۇردەلى جوندەۋ جانە تۇرعىنداردىڭ قۇقىقتارىن قورعاۋ ماسەلەلەرىمەن اينالىساتىن تكش جانە ميب بويىنشا جەكە پالاتا قۇرۋ بار. سونىمەن قاتار ينتەرنەت الاياقتىقپەن كۇرەس شارالارىن كۇشەيتۋ جانە اۋا مەن سۋدىڭ جاي-كۇيى تۋرالى مالىمەتتەرگە اشىق قولجەتىمدىلىكتى قامتاماسىز ەتۋ ۇسىنىلدى.

پارتيا وكىلدەرى قاراعاندى تۇرعىندارىمەن دە كەزدەسىپ، لايىقتى ەڭبەك جاعدايى، قالا ينفراقۇرىلىمىن دامىتۋ، قوعامدىق كەڭىستىكتەردى اباتتاندىرۋ جانە حالىقتىڭ ءومىر ءسۇرۋ ساپاسىن ارتتىرۋ ماسەلەلەرىن تالقىلادى.

«بايتاق» پارتياسى ەكولوگيالىق باعىتتى جالعاستىرۋدا
«بايتاق» جاسىلدار پارتياسى ەكولوگيالىق باستامالارىن ىلگەرىلەتۋدى جالعاستىرىپ، سايلاۋالدى ناۋقانىن تاڭعى مارافوننان باستادى.

پارتيا ۇيىمداستىرعان مارافوننىڭ العاشقى ايالداماسى ارال بولدى. ەكولوگيالىق قوزعالىس بەلسەندىلەرى تابيعات الدىنداعى جاۋاپكەرشىلىكتى باستى ۇستانىم رەتىندە العا تارتىپ وتىر.

كەلەسى قادام – «بيىك ماقسات – مىقتى كوماندا» اتتى اكتسيانىڭ باستالۋى. قۇرىلتاي دەپۋتاتتىعىنا كانديدات ۇلان مۇساەۆ پەن ونىڭ پىكىرلەستەرى تازا قازاقستان جولىنداعى ورتاق ماقسات توڭىرەگىندە باس قوستى.

ۇگىت-ناسيحات كەزەڭىندە «بايتاق» پارتياسى تازا اۋا مەن سۋدىڭ ماڭىزىن، سونداي-اق ادام دەنساۋلىعىنا قولايلى قورشاعان ورتانى ساقتاۋدى ناسيحاتتاۋعا باسىمدىق بەرىپ وتىر.

قازاقستان حالىق پارتياسىنىڭ باسىمدىقتارى

قازاقستان حالىق پارتياسىنىڭ وكىلدەرى spina bifida دياگنوزى بار بالالاردى تاربيەلەپ وتىرعان وتباسىلاردىڭ ماسەلەلەرىنە نازار اۋداردى. كانديداتتار بولات سماعۇلوۆ، يلياس بولاتوۆيچ جانە ۆيكتور پودنەبەسنىي «Spina Bifida» قوعامدىق قورىنىڭ وكىلدەرىمەن كەزدەستى.

اتا-انالار كۇندەلىكتى كەزدەسەتىن قيىندىقتارى تۋرالى ايتىپ بەردى. ولاردىڭ قاتارىندا مەديتسينالىق كومەك پەن وڭالتۋ قىزمەتتەرىن الۋ، قاجەتتى تەحنيكالىق قۇرالدارمەن قامتاماسىز ەتىلۋ جانە الەۋمەتتىك قولداۋعا قول جەتكىزۋ ماسەلەلەرى بار.

كەزدەسۋ بارىسىندا تاراپتار بالالار مەن ولاردىڭ وتباسىلارىنىڭ ءومىر ءسۇرۋ ساپاسىن جاقسارتۋعا مۇمكىندىك بەرەتىن جۇيەلى شەشىمدەردى تالقىلادى.

فەرمەرلەر، جاستار جانە قىمىز: «اۋىل» پارتياسى اۋىل تۇرعىندارىن نەسىمەن تاڭعالدىردى؟

«اۋىل» پارتياسى اۋىل تۇرعىندارىمەن تىكەلەي ديالوگتى جالعاستىرۋدا. بۇل جولى پارتيا توراعاسى قاليجان ايتۋعانوۆ قۇرىلتاي دەپۋتاتتىعىنا كانديداتتارمەن بىرگە اقمولا وبلىسىنداعى ۇلگى اۋىلىنىڭ تۇرعىندارىمەن كەزدەستى.

پارتيا وكىلدەرى سايلاۋالدى باعدارلاماسىن تانىستىرىپ، فەرمەرلەردى قولداۋعا، اگروونەركاسىپ كەشەنىن دامىتۋعا، زاماناۋي تەحنولوگيالاردى ەنگىزۋگە جانە جاستار ءۇشىن جاڭا مۇمكىندىكتەر جاساۋعا باسىمدىق بەردى.

سونداي-اق جەكە قوسالقى شارۋاشىلىقتاردى دامىتۋعا جانە اۋىلدىق وتباسىلاردىڭ تابىسىن ارتتىرۋعا باعىتتالعان «قۇس: اۋلادان داستارقانعا دەيىن» جوباسىنا ەرەكشە نازار اۋدارىلدى.

ءوز كەزەگىندە اۋىل تۇرعىندارى جولداردى جوندەۋ، الەۋمەتتىك ينفراقۇرىلىمدى دامىتۋ، مەملەكەتتىك قولداۋ جانە جۇمىسپەن قامتۋ ماسەلەلەرىن كوتەردى.

«اق جول» سايلاۋالدى ناۋقانىن پودكاست، ۆەلوشەرۋ جانە سايلاۋشىلارمەن كەزدەسۋلەر ارقىلى جالعاستىرۋدا

«اق جول» دەموكراتيالىق پارتياسى سايلاۋالدى جۇمىسىن بىردەن بىرنەشە فورماتتا جالعاستىرىپ جاتىر. پارتيا قۇرىلتاي دەپۋتاتتىعىنا كانديداتتاردىڭ قاتىسۋىمەن وتەتىن پودكاستتار سەرياسىن جاريالادى. العاشقى قوناق – يۋري لي. ول قارجىلىق قاۋىپسىزدىك، ميكروكرەديتتەۋ جانە الاياقتىقپەن كۇرەس ماسەلەلەرىن تالقىلايدى.

سونىمەن قاتار دەنە شىنىقتىرۋ ءپانىنىڭ مۇعالىمى ا. ايبولاتوۆتىڭ ۆەلوشەرۋى جالعاسۋدا. باتىس قازاقستان وبلىسىنىڭ تۋماسى ءارى «اق جولدى» قولداۋشى ازامات تۇرعىنداردىڭ امانات-تىلەكتەرىن ارقالاپ، استاناعا بەت العان. قازىر ول اقتوبە وبلىسىنىڭ قوبدا اۋدانىنا جەتتى.

ال پارتيا اتىنان قۇرىلتاي دەپۋتاتتىعىنا كانديدات اندرەي ليننيك الماتىدان جامبىل وبلىسىنىڭ مەركى اۋىلىنا ۆەلوسيپەدپەن جولعا شىقتى. وندا ول سايلاۋالدى شتابتىڭ سايلاۋشىلارمەن كەزدەسۋلەرىنە قاتىسادى.

ماڭعىستاۋ وبلىسىنداعى پارتيانىڭ سايلاۋالدى شتابى دا ەرەكشە اكتسيا ۇيىمداستىردى. شتاب وكىلدەرى قازاقستاننىڭ مەملەكەتتىك تۋى مەن «اق جول» پارتياسىنىڭ تۋىن كوتەرىپ، اشىق تەڭىزگە شىقتى. پارتيا بۇل باستامانى العا نىق قادام باسۋدىڭ، كاسىپكەرلىكتى قولداۋدىڭ، ادىلەتتى ەكونوميكا قۇرۋدىڭ جانە ەل ءۇشىن جاڭا مۇمكىندىكتەرگە جول اشۋدىڭ سيمۆولى دەپ اتادى.

سونىمەن بىرگە قوستاناي مەن كوكشەتاۋدا سايلاۋشىلارمەن كەزدەسۋلەر ءوتىپ، پارتيا وكىلدەرى تۇرعىنداردى سايلاۋالدى باعدارلاماسىنىڭ نەگىزگى باعىتتارىمەن تانىستىردى.

Respublica كاسىپكەرلەرمەن كەزدەسۋدە ءتورت كۇندىك جۇمىس اپتاسىنا قاتىستى ۇسىنىستى سىنعا الدى

Respublica پارتياسى ساياسي قارسىلاستارىنىڭ باستامالارىنا قاتىستى ۇستانىمىن اشىق ءبىلدىرۋدى جالعاستىرۋدا. بۇل جولى وسدپ-نىڭ ءتورت كۇندىك جۇمىس اپتاسىنا كوشۋ تۋرالى ۇسىنىسى سىنعا ىلىكتى.

الماتىدا كاسىپكەرلەرمەن وتكەن بيزنەس-كەزدەسۋدە Respublica پارتياسىنان قۇرىلتاي دەپۋتاتتىعىنا كانديدات ماقسات كيكيموۆ مۇنداي باستاما جۇمىس بەرۋشىلەر ءۇشىن تۋىندايتىن ەكونوميكالىق سالداردى ەسكەرمەيتىنىن مالىمدەدى.

ونىڭ ايتۋىنشا، جۇمىس ۋاقىتى قىسقارعان جاعدايدا جالاقىنى بۇرىنعى دەڭگەيدە ساقتاۋ ۇسىنىلىپ وتىر، الايدا بيزنەستىڭ قوسىمشا شىعىندارىن كىم جانە قالاي وتەيتىنى تۇسىندىرىلمەگەن.

كەزدەسۋ كاسىپكەرلەرمەن اشىق ديالوگ فورماتىندا ءوتتى. جيىن بارىسىندا بيزنەستى دامىتۋ ماسەلەلەرىمەن قاتار، كاسىپكەرلەردىڭ جۇمىسىنا كەدەرگى كەلتىرەتىن قولدانىستاعى توسقاۋىلدار دا تالقىلاندى.

Abai.kz