ۇلىبريتانيانىڭ Legatum Institute ساراپتامالىق ورتالىعى Prosperity Index ء(ال-اۋقات يندەكسى) رەيتينگىنىڭ جاڭا شىعارىلىمىن جاريالادى. رەيتينگ ەلدەردى ەكونوميكادان باستاپ ازاماتتاردىڭ جەكە بوستاندىقتارىنا دەيىنگى ونداعان كورسەتكىش بويىنشا باعالايدى.

جاڭارتىلعان رەيتينگتە قازاقستان الەم بويىنشا 66-ورىنعا تۇراقتادى. وسىلايشا ەل پوستكەڭەستىك ورتالىق ازيا مەملەكەتتەرى اراسىندا ەڭ جوعارى كورسەتكىشكە يە بولدى.

ايماقتاعى وزگە ەلدەردىڭ كورسەتكىشتەرى تومەنىرەك. قىرعىزستان 87-ورىنعا، وزبەكستان 94-ورىنعا جايعاسسا، تۇرىكمەنستان 150-ورىنمەن وڭىردەگى ءتىزىمدى تۇيىندەدى. بيىل قازاقستان مەن ورتالىق ازياداعى باسقا مەملەكەتتەردىڭ اراسىنداعى ايىرماشىلىق ايتارلىقتاي ۇلعايعان.

قازاقستان وسى رەيتينگكە قاتىسقان جىلدارى ەڭ جوعارى 63-ورىنعا كوتەرىلگەن. بۇل – ەل تاريحىنداعى ەڭ ۇزدىك ناتيجە. ال ەڭ تومەنگى كورسەتكىشى 82-ورىن بولعان. بارلىق باقىلاۋ كەزەڭىندەگى قازاقستاننىڭ ورتاشا كورسەتكىشى شامامەن 72-ورىن دەڭگەيىندە.

يندەكس نەنى باعالايدى؟

Prosperity Index ءۇش نەگىزگى باعىت بويىنشا قالىپتاستىرىلادى. ءبىرىنشى باعىت ەل ەكونوميكاسى مەن حالىقتىڭ ءومىر ءسۇرۋ ساپاسىن قامتيدى. ەكىنشىسى ازاماتتاردىڭ جەكە بوستاندىقتارىنىڭ دەڭگەيىن باعالايدى. ءۇشىنشى باعىت قوعامنىڭ جاي-كۇيى مەن الەۋمەتتىك بايلانىستاردىڭ بەرىكتىگىن سارالايدى.

باعالاۋ بارىسىندا دەنساۋلىق ساقتاۋ، ءبىلىم بەرۋ، ينۆەستيتسيالىق احۋال جانە باسقا دا ونداعان كورسەتكىش ەسكەرىلەدى. Legatum Institute جىل سايىن رەيتينگپەن بىرگە قازاقستانعا قاتىستى تولىق تالداۋدى دا جاريالاپ وتىرادى.

حالىقارالىق دەڭگەيدە مويىندالعان رەيتينگ

Legatum Institute ەكونوميكا مەن الەۋمەتتانۋ سالالارىن ۇشتاستىرا زەرتتەيتىن بەدەلدى ساراپتامالىق ورتالىقتاردىڭ ءبىرى سانالادى. Prosperity Index 2007 جىلدان بەرى جاريالانىپ كەلەدى جانە بۇگىندە الەمنىڭ 167 ەلىن قامتيدى.

يندەكس ادىستەمەسىن دۇنيەجۇزىلىك بانك پەن ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) ساراپشىلارى دا وزدەرىنىڭ ەلدىك شولۋلارىن ازىرلەۋ كەزىندە پايدالانادى.

قازاقستاننىڭ كورسەتكىشى جاقساردى

2011 جىلدان بەرى قازاقستان رەيتينگتە 17 ساتىعا كوتەرىلدى. ەڭ ۇلكەن ىلگەرىلەۋ دەنساۋلىق ساقتاۋ سالاسىندا بايقالعان. ساراپشىلار بۇل كورسەتكىش بويىنشا سوڭعى ونجىلدىقتاعى ءوسىم يندەكس ساناتتارىنىڭ ىشىندەگى ەڭ جوعارى ناتيجەلەردىڭ ءبىرى ەكەنىن اتاپ ءوتتى.

سونداي-اق Legatum Institute ساراپشىلارى قازاقستاننىڭ ءبىلىم بەرۋ جۇيەسى مەن ەكونوميكالىق ساپا كورسەتكىشتەرى بىرنەشە جىلدان بەرى ەلدىڭ باستى ارتىقشىلىقتارىنىڭ قاتارىندا تۇراقتى ساقتالىپ كەلە جاتقانىن مالىمدەدى.

Abai.kz