قازاقستان Rumavi كومپانياسى جىل سايىن ازىرلەيتىن Global Relocation Index 2026 نۇسقاسى بويىنشا كوشىپ بارۋعا قولايلى ورتالىق ازياداعى ەڭ ۇزدىك ەل اتاندى. جالپى رەيتينگتە ەلىمىز 62,9 بالل جيناپ، 192 مەملەكەتتىڭ ىشىندە 77-ورىنعا يە بولدى، ال ءوڭىر ەلدەرى اراسىندا كوش باستادى.

قازاقستان قانداي ورىنعا يە بولدى؟

ساراپشىلار باعالاۋ بارىسىندا ءتورت نەگىزگى باعىتتى ەسكەردى: قارجىلىق جاعدايلار جانە سالىق سالۋ، ءومىر ءسۇرۋ ساپاسى مەن دەنساۋلىق ساقتاۋ، قاۋىپسىزدىك پەن تۇراقتىلىق، سونداي-اق كوشىپ بارۋ مەن بەيىمدەلۋ مۇمكىندىكتەرى.

وسى كورسەتكىشتەر بويىنشا قازاقستان قارجىلىق جاعدايلار ءۇشىن 79 بالل، ءومىر ءسۇرۋ ساپاسى مەن دەنساۋلىق ساقتاۋ ءۇشىن 60 بالل، قاۋىپسىزدىك پەن تۇراقتىلىق ءۇشىن 60 بالل، ال كوشىپ بارۋ مەن بەيىمدەلۋ جاعدايلارى ءۇشىن 51 بالل جينادى.

وڭىرلىك رەيتينگتە قازاقستاننان كەيىن وزبەكستان (59,9), قىرعىزستان (59,3), تاجىكستان (55,1) جانە تۇرىكمەنستان (52,3) ورنالاستى. ازەربايجان 61,5 بالل، رەسەي – 58,9 بالل، قىتاي – 58,6 بالل الدى.

قاي ەلدەر ەڭ ۇزدىك اتاندى؟

جىل سايىنعى Global Relocation Index 2026 – رەلوكاتسيا ءۇشىن ەڭ ۇزدىك ەلدەردىڭ رەيتينگى. زەرتتەۋ بارىسىندا ساراپشىلار 192 ەل مەن اۋماقتى 24 كريتەري بويىنشا باعالادى. ولاردىڭ قاتارىندا ءومىر ءسۇرۋ قۇنى، قاۋىپسىزدىك دەڭگەيى، دەنساۋلىق ساقتاۋ ساپاسى، سالىق جۇيەسىنىڭ تيىمدىلىگى، بانكتىك ينفراقۇرىلىم جانە شەتەلدىكتەردىڭ بەيىمدەلۋىنە ارنالعان جاعدايلار بار.

زەرتتەۋ اۆتورلارى بارلىق كورسەتكىشتەر ءتورت ءىرى بلوكقا بىرىكتىرىلگەنىن اتاپ ءوتتى: قارجىلىق جاعدايلار مەن سالىق سالۋ، ءومىر ءسۇرۋ ساپاسى مەن دەنساۋلىق ساقتاۋ، قاۋىپسىزدىك پەن تۇراقتىلىق. سونداي-اق كوشىپ بارۋ جانە ارى قاراي قونىستانۋ مۇمكىندىكتەرى. ءاربىر كورسەتكىش 0-دەن 100-گە دەيىنگى بىرىڭعاي شكالاعا كەلتىرىلىپ، سودان كەيىن قورىتىندى رەيتينگ قالىپتاستىرىلدى.

جالپى ەسەپتە ءبىرىنشى ورىندى ەستونيا يەلەندى. ول 72,8 بالل جينادى. Rumavi مالىمەتىنشە، بۇل ەل دامىعان بانكتىك جۇيەسى، قولايلى ىسكەرلىك ورتاسى، باسپانانىڭ قولجەتىمدىلىگى جانە جاسىل ايماقتاردىڭ كوپتىگى بەلگىلەرىنە بايلانىستى جوعارى باعا الدى.

سونىمەن قاتار، زەرتتەۋشىلەر رەيتينگ كوشباسشىسىنىڭ جالعىز ايتارلىقتاي كەمشىلىگى رەتىندە كليماتتى بولە-جارا اتاپ وتەدى. كليماتتىق جايلىلىق كورسەتكىشى بويىنشا ەستونيا سۋىق ءارى قاراڭعى قىستىڭ كەسىرىنەن 100-دەن تەك 20 بالل الدى.

ەكىنشى ورىندى سينگاپۋر (72,6 بالل), ءۇشىنشى ورىندى مالايزيا (72,0) يەلەندى. ۇزدىك بەس قاتارعا سونداي-اق پورتۋگاليا (71,6) – جانە تايۆان (71,4) كىردى.

Global Relocation Index 2026 نۇسقاسى بويىنشا كوشىپ بارۋعا ارنالعان ەڭ ۇزدىك 10 ەلدىڭ تىزىمىنە مىنالار ەندى:

جالپى تىزىمنەن بولەك، Rumavi تاعى بەس مامانداندىرىلعان رەيتينگ دايىندادى. وندا ءدال سول 24 كورسەتكىشكە كوشۋ ماقساتىنا بايلانىستى ءارتۇرلى سالماق بەرىلدى. بولەك تىزىمدەر وتباسىلار، زەينەتكەرلەر، تسيفرلىق كوشپەندىلەر، كاسىپكەرلەر جانە سالىق جۇكتەمەسى ەرەكشە ماڭىزدى ادامدار ءۇشىن جاسالعان.

ماسەلەن، ەستونيا وتباسىمەن كوشىپ بارۋ ءۇشىن ەڭ ۇزدىك ەل اتاندى، ال كاسىپكەرلەرگە ارنالعان ساناتتا تەك سينگاپۋرعا جول بەردى. زەرتتەۋ اۆتورلارى زەينەتكەرلەرگە ەڭ الدىمەن مالايزياعا، ال تسيفرلىق كوشپەندىلەرگە پورتۋگالياعا نازار اۋدارۋدى ۇسىنادى.

Rumavi يندەكس تاۋەلسىز زەرتتەۋ بولىپ تابىلاتىنىن جانە كوممەرتسيالىق مۇددەلەرگە بايلانىستى ەمەستىگىن باسا ايتتى.

ەسكە سالا كەتەيىك، بۇعان دەيىن قازاقستان ءال-اۋقات يندەكسىندە ورتالىق ازيانىڭ كوشباسشىسى اتاندى. 

Abai.kz