استانادا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن «كرەاتيۆتى يندۋستريالاردى دامىتۋ قورى» كورپوراتيۆتىك قورى جۇزەگە اسىرعان «ۇلتتىق قولونەر مەكتەبى» ءبىلىم بەرۋ جوباسىنىڭ قورىتىندى ءىس-شاراسى ءوتتى.

27 شىلدە مەن 12 تامىز ارالىعىندا قازاقستاننىڭ ۇلتتىق قولونەر سالاسىنداعى 10 ۇزدىك شەبەر 8-20 جاس ارالىعىنداعى 208 قاتىسۋشىعا ءداستۇرلى قولونەردىڭ تەحنولوگيالارى مەن قىر-سىرىن ۇيرەتتى.

قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا قاتىسۋشىلاردى جوبانىڭ ءساتتى اياقتالۋىمەن قۇتتىقتادى. ول تالىمگەر شەبەرلەرگە، ۇيىمداستىرۋشىلارعا، اتا-انالارعا جانە بارلىق قاتىسۋشىلارعا العىس ءبىلدىردى.

ۇكىمەت باسشىسىنىڭ ورىنباسارى بۇگىندە ديزاين، ءسان، ساۋلەت، تۋريزم جانە كرەاتيۆتى يندۋستريالاردىڭ وزگە دە باعىتتارىندا ۇلتتىق ناقىشقا دەگەن قىزىعۋشىلىق ارتىپ كەلە جاتقانىن اتاپ ءوتتى. ونىڭ ايتۋىنشا، بۇل ءۇردىس شەبەرلەرگە دە، جاستارعا دا جاڭا مۇمكىندىكتەرگە جول اشادى.

«مەملەكەت باسشىسى ۇلتتىق قۇندىلىقتار مەن تاريحي-مادەني مۇرانى ساقتاۋعا، شىعارماشىل جاستاردى قولداۋعا جانە كرەاتيۆتى يندۋستريالاردى دامىتۋعا ەرەكشە نازار اۋدارىپ كەلەدى. قولونەر – حالقىمىزدىڭ عاسىرلار بويى قالىپتاسقان تۇرمىس-تىرشىلىگىن، دۇنيەتانىمى مەن كوركەم تالعامىن تانىتاتىن اسىل قازىنا. سوندىقتان ۇلتتىق قولونەردى ساقتاۋ جەكەلەگەن بۇيىمداردى جيناقتاپ، كورمەگە قويۋمەن عانا شەكتەلمەيدى. ونىڭ ەڭ سەنىمدى جولى – ونەردىڭ قىر-سىرىن شەبەردەن شاكىرتكە ۇيرەتىپ، ۇرپاقتار ساباقتاستىعىن جالعاۋ. «ۇلتتىق قولونەر مەكتەبى» جوباسى وسى ماڭىزدى مىندەتكە ناقتى ۇلەس قوسىپ وتىر. ەندىگى ماڭىزدى مىندەت – ءداستۇرلى قولونەردى ساقتاپ قانا قويماي، وعان زاماناۋي دەم بەرۋ. ءداستۇر وتكەننىڭ جادىگەرى بولىپ قالماي، قازىرگى دامۋدىڭ قۋاتتى رەسۋرسىنا اينالۋى كەرەك»، – دەدى ايدا بالاەۆا.

جوبا قاتىسۋشىلارى ۇلتتىق قولونەردىڭ 10 باعىتى بويىنشا تاجىريبەلىك ءبىلىم الدى. وقۋ باعدارلاماسىنا زەرگەرلىك ونەر، اعاش پەن تەرى وڭدەۋ، كيىز باسۋ، قىش ونەرى، كىلەم توقۋ، سۇيەك ويۋ جانە ءداستۇرلى قولدانبالى ونەردىڭ وزگە دە تۇرلەرى ەنگىزىلدى.

«ۇلتتىق قولونەر مەكتەبى» اياسىندا ينكليۋزيۆتى ءبىلىم بەرۋگە دە ەرەكشە كوڭىل ءبولىندى. ەرەكشە ءبىلىم بەرۋ قاجەتتىلىكتەرى بار بالالار ءۇشىن ارنايى توپ ۇيىمداستىرىلىپ، ساباقتار ولاردىڭ شىعارماشىلىق قابىلەتىن اشۋعا، ۇساق موتوريكاسىن جەتىلدىرۋگە جانە پراكتيكالىق ەڭبەك داعدىلارىن قالىپتاستىرۋعا باعىتتالدى.

قورىتىندى ءىس-شارا بارىسىندا تالىمگەر شەبەرلەر مەن جوبا تۇلەكتەرىنە سەرتيفيكاتتار تابىستالىپ، ولاردىڭ اۆتورلىق جۇمىستارى تانىستىرىلدى. سونداي-اق ءبىلىم بەرۋ باعدارلاماسىنىڭ قورىتىندىسى شىعارىلدى.

ايتا كەتەيىك، جوباعا قاتىسۋعا 450-دەن استام ءوتىنىم كەلىپ ءتۇستى. كونكۋرستىق ىرىكتەۋ ناتيجەسىندە 208 قاتىسۋشى تەگىن ءبىلىم الۋ مۇمكىندىگىنە يە بولدى. تالىمگەر شەبەرلەردى ىرىكتەۋ دە ۇلكەن قىزىعۋشىلىق تۋعىزدى. ەلىمىزدىڭ بارلىق وڭىرىنەن 331 ءوتىنىم قابىلدانىپ، تەحنيكالىق ىرىكتەۋدەن وتكەن 271 ءوتىنىمدى كونكۋرستىق كوميسسيا قارادى. ناتيجەسىندە قازاقستاننىڭ ۇلتتىق قولونەر سالاسىنداعى 10 ۇزدىك شەبەر تاڭدالدى.

«ۇلتتىق قولونەر مەكتەبى» ۇلتتىق مادەني مۇرانى ساقتاپ، ونى جاس ۇرپاققا ساباقتاستىقپەن جەتكىزۋگە، ءداستۇرلى قولونەردى كەڭىنەن دارىپتەۋگە جانە ونى زاماناۋي كرەاتيۆتى يندۋستريانىڭ ماڭىزدى باعىتتارىنىڭ ءبىرى رەتىندە دامىتۋعا ارنالعان.

جوبا بالالار مەن جاستاردىڭ شىعارماشىلىق الەۋەتىن اشۋعا، ۇلتتىق ونەرگە قىزىعۋشىلىعىن ارتتىرۋعا جانە بولاشاق كرەاتيۆتى يندۋستريا وكىلدەرى ءۇشىن جاڭا مۇمكىندىكتەر قالىپتاستىرۋعا جاعداي جاسايدى.

Abai.kz