ۆەتنامداعى قازاقستان مادەنيەتى كۇندەرى اياسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا ۆەتنام سوتسياليستىك رەسپۋبليكاسى پرەمەر-ءمينيسترىنىڭ ورىنباسارى فام تحي تحان چامەن كەزدەستى. كەزدەسۋ بارىسىندا ەكى ەل اراسىنداعى ىنتىماقتاستىقتى ودان ءارى دامىتۋدىڭ پەرسپەكتيۆالى باعىتتارى تالقىلاندى.

«بۇگىندە ەلدەرىمىز اراسىنداعى قارىم-قاتىناس جاڭا كەزەڭگە قادام باستى. وتكەن جىلى قازاقستان مەن ۆەتنام اراسىنداعى بايلانىستار ستراتەگيالىق ارىپتەستىك دەڭگەيىنە كوتەرىلدى. بۇل ساياسي جانە ەكونوميكالىق ىنتىماقتاستىقپەن قاتار، مادەني-گۋمانيتارلىق ىقپالداستىقتى دا ودان ءارى تەرەڭدەتۋگە مول مۇمكىندىك بەرەدى. ءبىز ۆەتنامداعى مادەني جانە كرەاتيۆتى يندۋستريالاردىڭ دامۋىن ۇلكەن قىزىعۋشىلىقپەن باقىلاپ وتىرمىز. وسى ورايدا كينەماتوگرافيا، ورىنداۋشىلىق ونەر مەن مادەني تۋريزمنەن باستاپ، مادەني مۇرانى ساقتاۋ، ءداستۇرلى قولونەر جانە زاماناۋي ديزاين سالالارىنا دەيىنگى بىرقاتار باعىت بويىنشا ءوزارا ىنتىماقتاستىقتىڭ الەۋەتى زور ەكەنىن كورىپ وتىرمىز. بۇل سالالارداعى تاجىريبە الماسۋ ەكىجاقتى بايلانىستارىمىزعا تىڭ سەرپىن بەرەتىنىنە سەنىمدىمىن»، – دەدى ايدا بالاەۆا.

تاراپتار ءداستۇرلى قولونەرمەن، جەرگىلىكتى سالت-داستۇرلەرمەن جانە ۇلتتىق تاعامدارمەن تانىسۋ، شەبەرلىك ساباقتارى مەن شىعارماشىلىق باعدارلامالارعا قاتىسۋ ارقىلى ساياحاتشىلاردى ەلدىڭ مادەني ورتاسىنا ەتەنە ارالاستىرۋدى كوزدەيتىن كرەاتيۆتى تۋريزم سالاسىنداعى ىنتىماقتاستىققا ەرەكشە نازار اۋداردى.

سونىمەن قاتار ايدا بالاەۆا كينەماتوگرافيا سالاسىنداعى بايلانىستى جانداندىرۋدى ۇسىندى. اتاپ ايتقاندا، ەكى ەلدىڭ كينو اپتالىقتارىن وتكىزۋ، قازاقستان مەن ۆەتنام كينەماتوگرافيستەرىنىڭ فەستيۆالدەرگە قاتىسۋ اياسىن كەڭەيتۋ، ەكى مەملەكەتتىڭ اۋماعىندا كينو تۇسىرىلىمدەرىن ۇيىمداستىرۋ جانە بىرلەسكەن كينوجوبالاردى جۇزەگە اسىرۋ ماسەلەلەرى ءسوز بولدى.

قازاقستان مەن ۆەتنامنىڭ مادەني مۇرا نىساندارىن، تاريحي قالالارىن، مۋزەيلەرىن، قولونەر ورتالىقتارىن، فەستيۆالدەرى مەن زاماناۋي مادەني كەڭىستىكتەرىن قامتيتىن كەشەندى تۋريستىك باعىتتاردى بىرلەسىپ ازىرلەۋ دە پەرسپەكتيۆالى باستامالاردىڭ ءبىرى رەتىندە اتالدى.

كەزدەسۋ قورىتىندىسى بويىنشا تاراپتار ءوزارا ىقپالداستىقتى ودان ءارى نىعايتۋعا جانە بىرلەسكەن باستامالاردى ىلگەرىلەتۋگە مۇددەلى ەكەنىن ءبىلدىردى.

Abai.kz