ارمەنيادا بۇرىنعى پرەزيدەنت روبەرت كوچاريان مەن ونىڭ ۇلى سەدراك ۇستالدى، دەپ حابارلادى رەسپۋبليكانىڭ سىبايلاس جەمقورلىققا قارسى كوميتەتى.

ەكس-پرەزيدەنتتىڭ كوميتەتتە قانداي مارتەبەدە ەكەنىن جانە وعان ايىپ تاعىلعان-تاعىلماعانىن مەملەكەتتىك ورگان ناقتىلامادى.

دەگەنمەن، روبەرت كوچاريانعا قاتىستى قىزمەتتىك وكىلەتتىگىن تەرىس پايدالانۋ جانە اقشانى جىلىستاتۋ ءىسى بويىنشا تەرگەۋ ءجۇرىپ جاتقانى بەلگىلى.

سونداي-اق بۇرىنعى پرەزيدەنتتىڭ تاعى ءبىر ۇلى – لەۆون كوچارياندا دا ءتىنتۋ جۇمىستارى جۇرگىزىلىپ جاتىر.

ارمەنيالىق باق-تىڭ مالىمەتىنشە، تاڭەرتەڭ سالىق ورگاندارى اكتسيونەرلەرىنىڭ ءبىرى كوچارياننىڭ ۇلكەن ۇلى سەدراك كوچاريان بولىپ تابىلاتىن Toyota كومپانياسىنىڭ ەرەۆانداعى وكىلدىگىن مورلەپ تاستاعان.

وتكەن دۇيسەنبىدە پارلامەنتتە ارمەنيا پرەمەر-ءمينيسترى نيكول پاشينيان لەۆون كوچاريانعا قاراتىپ سويلەگەن سوزىندە ولاردىڭ وتباسى مۇلكىنەن ايىرىلاتىنىن مالىمدەدى، دەپ حابارلايدى «ينتەرفاكس».

لەۆون كوچاريان 24 تامىزدا پارلامەنتتەگى پىكىرتالاس كەزىندە ەلدىڭ پرەمەر-ءمينيسترى نيكول پاشينياندى «ساتقىن» دەپ اتادى. بۇعان جاۋاپ رەتىندە پاشينيان كوچارياننىڭ وتباسىندا «مۇنداي بايلىق» قايدان پايدا بولعانىن جانە ونىڭ نەگە ميلليونەر ەكەنىن سۇرادى. «ءسىز ميلليوندارىڭىزدى بالالارىڭىزعا، ال بالالارىڭىز ءوز بالالارىنا قالدىرۋى كەرەك دەگىڭىز كەلە مە. كەشىرىڭىز، مەن سىزگە اشىق ايتايىن، بۇلاي بولمايدى. مۇنى قالاي تۇسىنسەڭىزدەر دە ءوز ەرىكتەرىڭىز، بىراق مەن ءۇشىن بۇل جەكە ەمەس، ساياسي ماسەلە»، – دەپ كەلتىرەدى پرەمەردىڭ ءسوزىن News.am.

بيىلعى جىلدىڭ ماۋسىم ايىندا ارمەنيا بيلىگى ەلدىڭ ەكس-پرەزيدەنتى روبەرت كوچاريانعا ەلدەن شىعۋعا تىيىم سالعان.

كوچاريان - ارمەنيانىڭ ەكىنشى پرەزيدەنتى. ول بۇل قىزمەتتى 1998 جىلدان 2008 جىلعا دەيىن اتقاردى. ماۋسىمدا وتكەن پارلامەنتتىك سايلاۋدا كوچارياننىڭ «ارمەنيا» وپپوزيتسيالىق بلوگى 9,9% داۋىس جيناپ، 12 مانداتقا يە بولدى.

Abai.kz