تۇركى الەمىنىڭ ورتاق ادەبي مۇراسىن ساقتاۋ جانە دامىتۋ، تۇركسوي ءۇيىمىنا مۇشە مەملەكەتتەردىڭ جازۋشىلار وداقتارى اراسىنداعى ىنتىماقتاستىقتى نىعايتۋ، سونداي-اق 2027 جىلعا ارنالعان قىزمەتتى ورتاق كوزقاراس نەگىزىندە جوسپارلاۋ ماقساتىندا 2026 جىلعى 19-22 تامىز ارالىعىندا «2026 جىلعى تۇركى دۇنيەسىنىڭ مادەني استاناسى – ءاندىجان» ءىس-شارالارى اياسىندا وزبەكستان رەسپۋبليكاسىنىڭ ءاندىجان قالاسىنداتۇركسوي جازۋشىلار وداعىنىڭ وتىرىسى ءوتتى.

تۇركى دۇنيەسىندە ورتاق ادەبي ساياساتتى قالىپتاستىرۋ جانە ادەبيەت سالاسىنداعى ىنتىماقتاستىقتى دامىتۋ ماقساتىندا وتكىزىلگەنبۇل وتىرىستا تۇركسوي جازۋشىلار وداعىنىڭ 2027 جىلعا ارنالعان ءىس-شارالار باعدارلاماسى ايقىندالدى. سونىمەن قاتار ورتاق باسپا جانە اۋدارما جوبالارى، جاس قالامگەرلەرگە ارنالعان باستامالار، تسيفرلىق ادەبيەت ماسەلەلەرى، سونداي-اق جاساندى ينتەللەكتىنىڭ ادەبيەتكە، جازۋشىلىققا، اۋدارما ىسىنە جانە باسپا سالاسىنا ىقپالى تالقىلاندى.

وتىرىسقا ازەربايجان، قازاقستان، قىرعىزستان، وزبەكستان، تۇركيا جانە تۇرىكمەنستان جازۋشىلار وداقتارىنىڭ توراعالارى مەن وكىلدەرى قاتىستى.

جيىنعا قاتىسقان قازاقستان جازۋشىلار وداعىنىڭ اپپارات جەتەكشىسى ەدىلبەك دۇيسەن تۇركسوي جازۋشىلار وداعىنىڭ 2027 جىلعا ارنالعان ءىس-شارالار باعدارلاماسىنا ەنگىزۋ ماقساتىندا جازۋشىلار وداعى تاراپىنان بىرقاتار جوبا مەن ءىس-شارا جونىندەگى ۇسىنىستى جەتكىزدى.

– بيىل قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن قازاقستان جازۋشىلار وداعى ستراتەگيالىق ارىپتەستىك اياسىندا «تۇركى الەمى ادەبيەتى» جوباسىن جۇزەگە اسىرىپ جاتىر. بۇل جوبا بىلتىر دا قازاق وقىرماندارىنا باۋىرلاس ءتورت قالامگەردىڭ شىعارماشىلىعىن تانىستىرىپ، ءوز ناتيجەسىن بەرگەن بولاتىن.

بۇل جوبادا باۋىرلاس قالامگەرلەردىڭ تاۋەلسىزدىك العان جىلداردان بەرگى عانا جازىلعان شىعارمالارى تۇپنۇسقادان اۋدارىلىپ، كاسىبي سۋرەتشىلەردىڭ يلليۋستراتسيالارى ارقىلى جارىق كورىپ كەلەدى. اتالعان جوبا قازاق ادەبيەتىن عانا تانىتاتىن باستاما ەمەس، تۇركى حالىقتارىنىڭ ادەبي مۇراسىن ءوزارا جاقىنداستىراتىن ۇلكەن مادەني پلاتفورماعا اينالۋى ءتيىس دەپ ەسەپتەيمىز.

سوندىقتان «تۇركى الەمى ادەبيەتى» جوباسىن قازاقستان شەڭبەرىنەن شىعارىپ، تۇركسوي-عا مۇشە جانە باقىلاۋشى تۇركى ەلدەرىنىڭ قاتىسۋىمەن حالىقارالىق جوبا رەتىندە جۇزەگە اسىرۋدى ۇسىنامىز.

جوبا اياسىندا ءار ەلدىڭ كورنەكتى قالامگەرلەرىنىڭ شىعارمالارىن وزگە تۇركى تىلدەرىنە اۋدارۋ، ادەبي كەزدەسۋلەر وتكىزۋ جانە جازۋشىلاردىڭ شىعارماشىلىق ساپارلارىن ۇيىمداستىرۋ مۇمكىن.

بۇل ۇسىنىس تۇركسوي-دىڭ ورتاق ادەبي مۇرانى ساقتاۋ، ناسيحاتتاۋ جانە ونى الەم تىلدەرىنە اۋدارۋ باعىتتارىمەن تولىق ۇندەسەدى.

ەكىنشى ۇسىنىس – «بيىكتىك. كەڭدىك. تەرەڭدىك» اتتى ادەبي جوبانى ۇيىمداستىرۋ.

2027 جىلى قازاقتىڭ ءۇش كلاسسيك اقىنى – قادىر مىرزا ءالى، تۇمانباي مولداعاليەۆ جانە جۇمەكەن ناجىمەدەنوۆ شىعارمالارىن تۇركى تىلدەرىنە اۋدارىپ، ال تۇركيادا ارنايى ادەبي كەش وتكىزۋدى ۇسىنامىز.

بۇل اقىنداردىڭ شىعارماشىلىعى – قازاق پوەزياسىنىڭ كوركەمدىك قۋاتىن، ۇلتتىق دۇنيەتانىمىن جانە ادامزاتتىق قۇندىلىقتارىن تانىتاتىن اسا ماڭىزدى رۋحاني مۇرا.

جوبا اياسىندا ءۇش اقىننىڭ تاڭداۋلى شىعارمالارىنان باۋىرلاس ەلدەردىڭ تىلدەرىندە جيناق ازىرلەنىپ، تۇركيادا تانىستىرىلىمى مەن ادەبي كەشى ۇيىمداستىرىلسا، بۇل قازاق ادەبيەتىن تۇرىك وقىرمانىنا كەڭىنەن تانىتۋدىڭ ماڭىزدى قادامى بولار ەدى.

ءۇشىنشى ۇسىنىس – «تۇركى ادەبيەتىنىڭ تسيفرلىق كىتاپحاناسى» جوباسىن ىسكە قوسۋ.

قازىرگى زاماندا ادەبي مۇرانى ساقتاۋ مەن تانىتۋدىڭ جاڭا مۇمكىندىكتەرىن پايدالانۋىمىز قاجەت.

سوندىقتان تۇركى حالىقتارىنىڭ كلاسسيكالىق جانە زاماناۋي ادەبي شىعارمالارىن، جازۋشىلار تۋرالى دەرەكتەردى، ەلەكتروندى كىتاپتاردى، اۋدارما نۇسقالارىن جانە ادەبي ءىس-شارالاردىڭ ماتەريالدارىن بىرىكتىرەتىن ورتاق تسيفرلىق پلاتفورما قۇرۋدى ۇسىنامىز.

بۇل باستاما تۇركى الەمىنىڭ ورتاق ادەبي قورىن جۇيەلەۋگە، ونى جاس ۇرپاققا قولجەتىمدى ەتۋگە جانە الەم وقىرمانىنا تانىستىرۋعا مۇمكىندىك بەرەدى. تۇركسوي كۇن تارتىبىندە دە تۇركى الەمىنىڭ ورتاق تسيفرلىق ادەبي پلاتفورماسى مەن ەلەكتروندىق كىتاپحاناسىن قالىپتاستىرۋ ماسەلەسى ارنايى كورسەتىلگەن.

ءبىزدىڭ ۇسىنىستارىمىزدىڭ بارلىعى ءبىر عانا ماقساتقا – تۇركى الەمىندەگى ادەبي ىنتىماقتاستىقتى ناقتى جوبالار ارقىلى جاڭا دەڭگەيگە كوتەرۋگە باعىتتالعان.

ءبىز ءۇشىن تۇركى حالىقتارىنىڭ ادەبيەتى – ارقايسىسى جەكە-جەكە تۇرعان ۇلتتىق ادەبيەتتەردىڭ جيىنتىعى عانا ەمەس. ول – تاريحي تامىرى ورتاق، رۋحاني قۇندىلىقتارى ساباقتاس، ءبىر-ءبىرىن بايىتىپ كەلە جاتقان ۇلكەن مادەني كەڭىستىك.

سوندىقتان قازاقستان جازۋشىلار وداعى تۇركسوي جازۋشىلار وداعىنىڭ 2027 جىلعا ارنالعان ورتاق ءىس-شارالار باعدارلاماسىن قالىپتاستىرۋعا بەلسەندى تۇردە اتسالىسۋعا دايىن،- دەدى ەدىلبەك دۇيسەن.

Abai.kz